Esaaya 46 - Fulfulde Bible

¹ “Beel turake, Nebo yani. Suuraaji maaji ɗon dow dabbaaji. Ko on ndoondino nder jahaaŋgal juulde, laati dimŋgal dabbaaji comɗi.

² Labbi ɗi'i ngibbi, ɗi njani hawtaade, ɗi mbaawataa hisnugo dimŋgal man. Kanji ndahata ko'e maaji.

³ Naneeɗam, onon danygol Yaakubu, onon luttuɓe yimɓe Isra'iila fuu. Min efti on diga reedu daada mon. Mi roondi on diga danyeeki mon.

⁴ Mi wallan on boo haa yotto ndottaaku mon, haa on mbaɗa dandanndi. Mi eftan on, mi wallan on, mi hisnan on.

⁵ Bee ɗume nanndinton yam haa on potna yam bee maako? Bee moy nanndinton yam haa min nanndida?

⁶ Yimɓe maɓɓitan boorooji muuɗum'en, ngurtinan kaŋŋeeri, ɓe awnan cardi bee awnorɗum. Ɓe njoɓan tappoowo kaŋŋeeri haa o wartira ɗum lawru. Nden ɓe teddina ndu, ɓe cujidana ndu.

⁷ Ɓe eftan ndu dow balbe maɓɓe, ɓe ndoondoto ndu, nden ɓe njippina ndu haa nokkuure maaru. Ton ndu daroto, ndu sottataa e pellel maaru. Ɓe ngookanan ndu, ammaa ndu jaabataako, ndu hisnataa goɗɗo e ɓillaare muuɗum.

⁸ Ciftore ɗum, laate suusɓe! Kakkilane ɗum, onon tuurtooɓe.

⁹ Ciftore kuuje aartuɗe, laatiiɗe ɓooyma. Ngam min woni Allah, walaa goɗɗo feere sam. Min woni Allah, walaa nannduɗo bee am.

¹⁰ Diga fuɗɗoode, mi anndini ko tammi laataago, diga ɓooyma mi anndini on kuuje ɗe ciwaa laataago. Nufaye am hiɓɓan. Mi waɗan ko ngiɗmi fuu.

¹¹ Mi ewnoto dutal haa fuunaaŋge, haa lesdi ndaayiindi ewnotoomi goɗɗo kiɓɓinanɗo nufayeeje am. Ko mbi'mi, mi laatinan ɗum boo. Ko nufiimi, mi waɗan ɗum boo.

¹² Naneeɗam, onon saata-ko'e'en, daayiiɓe adilaaku!

¹³ Mi ɗon ɓadina adilaaku am, ngu daayaaki, kisndam am neeɓataa wargo. Mi hokkan kisndam haa Siyona. Mi hokkan Isra'iila daraja am.”