Esaaya 43 - Fulfulde Bible

Jawmiraawo feere muuɗum woni Kisnoowo

¹ Ammaa jonta, an Isra'iila, danygol Yaakubu, ndaa nii Jawmiraawo tagɗo ma wi'i: “Taa hul, mi rimɗini ma, mi ewni ma bee innde ma, an min jeyi.

² To a ɗon ta'a caka ndiyam lugguɗam, min mi wondan bee maaɗa, to a ɗon taƴta maaje, ɗe moɗataa ma. To a nasti yiite, a wulataa, ɗemŋgal yiite naawnataa ma.

³ Ngam min woni Jawmiraawo Allah maaɗa, min Ceniiɗo Isra'iila, mi kisnoowo ma. Mi hokkan Misra ngam soottugo ma, Etiyopiya e Seba mbattudi ma.

⁴ A ɗon bee saman haa gite am, a tedduɗo, mi yiɗi ma boo. Ngam maajum ndokkanmi ummaatooje goɗɗe mbattudi ma ngam hisnugo yoŋki ma.

⁵ Taa hul, ngam min mi ɗon wondi bee ma. Diga fuunaaŋge kooranmi danygol ma, diga hiirnaaŋge boo mooɓtanmi yimɓe ma.

⁶ Mi wi'an woyla: Yooftu ɓe! Mi wi'an fombina boo: Taa jogita ɓe! Acce ɓiɓɓe am worɓe e rewɓe ngara diga daayiiɗum, diga keerol duniyaaru.

⁷ Ɓe ewnaaɓe bee innde am, mi tagi ɓe ngam mawninki tedduŋgal am.”

Isra'iila'en ɓe seedooɓe Jawmiraawo

⁸ Ngurtine ummaatoore nde'e: Nde woodi gite, ammaa nde yi'ataa. Nde woodi noppi boo, ammaa nde nanataa!

⁹ Ummaatooje fuu mooɓotira, jama'aaje fuu kawta. Moy caka ɗowanteeɓe maɓɓe anndinta en kuuje garanɗe? Moy caka maɓɓe anndinta kuuje ɓooymaaje? Sey ɓe ndarna seedooɓe maɓɓe ngam ɓe ngooŋɗina ko'e maɓɓe, haa en nana, en mbi'a: Gooŋga.

¹⁰ Jawmiraawo wi'i: “Onon yimɓe Isra'iila on seedanooɓe yam, onon on sukaaɓe am ɓe cuɓmi ɗum, haa on anndammi, on nuɗɗinammi, on paama ɗum min. Walaa ɗowanteeɗo aarti yam, non boo walaa mo laatoto ɓaawo am.

¹¹ Min woni Jawmiraawo, walaa kisnoowo sonaa min.

¹² Mi anndini, mi hisni, mi wooyni. Walaa ɗowanteeɗo jananno meeɗi waɗugo ɗum caka mooɗon.” Jawmiraawo wi'i: “Onon on seedanooɓe yam, min boo mi Allah.

¹³ Koo yeeso ɗo, ɗum min. Walaa kisnanɗo e juŋngo am. Ko mi waɗi, moy sannjata ɗum?”

Allah hisni yimɓe muuɗum diga Baabila

¹⁴ Jawmiraawo coottoowo on, Ceniiɗo Isra'iila wi'i: “Ngam daliila mooɗon nelanmi goɗɗo haa Baabila, mi do'an jamɗe kaɓɓirgal, mi wartiran seyo Kaldiya'en bojji.

¹⁵ Min woni Jawmiraawo, Ceniiɗo mooɗon, tagɗo Isra'iila, Laamiiɗo mooɗon.”

¹⁶ Jawmiraawo seeki laawol dow mbeela, dow ndiyamji cemmbiɗɗi,

¹⁷ yahri jama'aare konu semmbiɗnde bee mootaaji e pucci haa konu. Yimɓe maare ndo'ake, ɓe ummitittaako, ɓe mbaati, ɓe nyifi bana pittirlayel.

¹⁸ Taa ciftore haala ɓooyma, taa kakkilane ko laati naane.

¹⁹ Ndaa, mi ɗon waɗa kesum, jonta ɗum ɗon fuɗɗa. On anndataa ɗum na? Mi seekan laawol nder ladde, mi waɗanan on maaje haa harde.

²⁰ Dabbaaji ladde teddintam, cuuli e dabbi fuu. Ngam mi ilnan maaje dow harde haa mi yarna ummaatoore am suɓaande.

²¹ Ummaatoore nde mbaɗmi ɗum ngam hoore am anndinan maŋgtoore am.

Sooynde yettoore Isra'iila

²² Jawmiraawo wi'i: “On ewnaaki innde am nder do'a, danygol Yaakubu! On cafti yam, onon Isra'iila'en!

²³ On ngaddanaay yam baali mon guleteeɗi. On teddinaay yam bee kirseteeɗi mon. Mi doolaay on waddango yam dokke nyaamdu, mi somnaay on bee uurle.

²⁴ On majjinaay ceede ngam soodanango yam ƴommbe belɗe. On kaarnaay yam bee ɓellere kirseteeɗi mon. Ammaa on macciɗini yam bee hakkeeji mon, on comni yam bee aybeeji mon.

²⁵ Min mi ittan zunuubaaji mon ngam daliila innde am, mi siftortaa hakkeeji mon.

²⁶ Siftinoram ko a feliri yam, mbaɗen kiita, mbolwe haa ngooŋɗinon ko'e mooɗon.

²⁷ Kaaka mon aartuɗo waɗi hakke, ardiiɓe mon boo tuurtani yam.

²⁸ Ngam maajum coɓnumi ardiiɓe suudu seniindu, mi do'i danygol Yaakubu kiita nattere, mi acci jananɓe kuɗa yimɓe Isra'iila.”