Esaaya 4 - Fulfulde Bible

¹ Nyalaade man rewɓe njoweeɗiɗo naŋngan gorko gooto, mbi'an mo: “Min nyaaman nyaamdu amin, min ɓornoto limce amin boo, ammaa accu min ewnire bee innde maaɗa, ittan min toskaare!”

Tedduŋgal Urusaliima garanŋgal

² Nyalaade man, ko Jawmiraawo fuɗnata laatoto booɗɗum e tedduɗum. Nafuuda lesdi laatoto daliila juro e tedduŋgal haa hisaaɓe Isra'iila.

³ Nden kam luttuɓe Siyona e hisɓe wonɓe nder Urusaliima, ɓe ewneteeɓe seniiɓe, ɓe winndaaɓe ngam haa ɓe ngeeɗa nder Urusaliima.

⁴ To Jawmiraawo itti tuundi rewɓe Urusaliima, to o yiggi ƴiiƴam ndufaaɗam nder Urusaliima bee ruuhu kiita e yiite,

⁵ nden kam, dow nokkuure hooseere Siyona e mooɓorle ton fuu, Jawmiraawo tagan ruulde nyalawma, jemma boo cuurɗe e jayŋgol yiite. Tedduŋgal Allah suddan berniwol bana cuddirɗum.

⁶ Ɗum laatoto bana ɗowdi suudu laymaaru saa'i nguli naaŋge, bana hisrude e ɗowirde saa'i iyeende e henndu saatundu.