Esaaya 36 - Fulfulde Bible

Sanherib taari Urusaliima

¹ Nder nduuɓu laamu Hezekiya sappo e nayaɓu, Sanherib, laamiiɗo Assuura ukkani berniiji Yahuuda cemmbiɗɗi fuu, o nyaami ɗi.

² Laamiiɗo Assuura neli mawɗo yarnooɓe mo bee jama'aare konu mawnde diga Lakis haa Urusaliima haa laamiiɗo Hezekiya. Mawɗo yarnooɓe go dari haa ildugol weendu ɓaŋgiindu, haa buuwol Lootirde.

³ Eliyakim ɓii Hilkiyya, kaliifaajo laamorde e Sebna, binndoowo e Yo'ak ɓii Asaf, hunndukoojo laamiiɗo, ngurti, njehi haa maako.

⁴ Mawɗo yarnooɓe man wi'i ɓe: “Mbi'e Hezekiya: Laamiiɗo mawɗo, laamiiɗo Assuura wi'i: Hoolaare laaɓnde ndeye marɗa?

⁵ A tammi bolle meere ɗum sawari e baawɗe ngam konu na? Kadi, moy kooluɗa haa a tuurtani yam?

⁶ Ndaa, a ɗon hooli Misra, kewal gewaaŋgal. To goɗɗo tuggorake ngal, ngal sumpitan mo juŋngo. Bana non Firawna, laamiiɗo Misra wa'i haa hoolotooɓe mo fuu.

⁷ Ammaa to a wi'i yam: Min ɗon kooli Allah Jawmiraawo amin, naa ɗum kaŋko Hezekiya itti nokkuuje mum towɗe e kirsirɗe mum na? Nden o wi'i yimɓe Yahuuda e Urusaliima: Yeeso hirsirde nde'e tan cujiditton!

⁸ Kadi, narru bee jaagorɗo am, laamiiɗo Assuura. Mi hokkete pucci ujine ɗiɗi, to a woodi wa'otooɓe ɗi.

⁹ Noy a lornirta koo ngomnaajo ɓuranɗo leesugo caka maccuɓe jaagorɗo am? Ammaa a ɗon hoolo Misra ngam daliila mootaaji pucci e wa'otooɓe ɗi.

¹⁰ Kadi, to mi wari halkugo lesdi ndi'i, ɗum laataaki bee muuyo Jawmiraawo na? Jawmiraawo wi'i yam mi nasta lesdi ndi'i, mi halka ndi.”

¹¹ Nden Eliyakim e Sebna e Yo'ak mbi'i mo: “Useni wolwan min Aramiyaare, min nanan nde. Accu wolwango min bee Ibraniŋkeere, ngam yimɓe wonɓe dow mahol ɗon nana en.”

¹² Mawɗo yarnooɓe go wi'i: “On tammi jaagorɗo am neli yam haa jaagorɗo mooɗon e haa mooɗon tan na? Naa ɗum laarani boo jooɗiiɓe dow mahol ɓe'e na? Kamɓe boo naa ɓe nyaaman bu'e maɓɓe, ɓe njaran cille maɓɓe, kal-kal bee mooɗon!”

¹³ Nden o dari, o hooli bee Ibraniŋkeere, o wi'i: “Nane bolle laamiiɗo mawɗo, laamiiɗo Assuura!

¹⁴ Ndaa nii o wi'i: Taa Hezekiya sakla on, ngam o waawataa hisnugo on.

¹⁵ Taa Hezekiya de'itina on bee Jawmiraawo, o wi'a: Jawmiraawo hisnan en sike, o hokkataa berniwol ngo'ol haa laamiiɗo Assuura.

¹⁶ Taa nanane Hezekiya, ngam laamiiɗo Assuura wi'i: Culhotire bee am, ngarte haa am. Nden koo moy mooɗon nyaaman inabooje muuɗum e ibbi muuɗum, koo moy yaran ndiyam ɓulndu muuɗum,

¹⁷ haa mi wara, mi yahra on haa lesdi feere bana ndi mooɗon, lesdi marndi alkamaari e inaboojam ɓennduɗam e tamseere e gese inabooje.

¹⁸ Taa Hezekiya esta on bee wi'go: Jawmiraawo hisnan en. Kadi ɗowanteeɓe ummaatooje goɗɗe meeɗi hisnugo lesɗe muuɗum'en diga juŋngo laamiiɗo Assuura na?

¹⁹ Toy ɗowanteeɓe Hamat e Arpad? Toy ɗowanteeɓe Sefarwayim? Ɓe kisni Samariya diga juŋngo am na?

²⁰ Ɓeye caka ɗowanteeɓe lesɗe ɗe'e fuu kisni lesɗe muuɗum'en e juŋngo am, haa Jawmiraawo hisna Urusaliima diga juŋngo am?”

²¹ Ammaa yimɓe njeeɗi, njaabaaki mo koo wolde. Ngam laamiiɗo Hezekiya umruno: “Taa njaabe mo.”

²² Nden Eliyakim ɓii Hilkiyya, kaliifaajo laamorde e Sebna, binndoowo e Yo'ak ɓii Asaf, hunndukoojo laamiiɗo, ngarti haa Hezekiya bee limce ceekaaɗe, ɓe anndini mo bolle mawɗo yarnooɓe go.