Esaaya 35 - Fulfulde Bible

Jahaaŋgal hisnaaɓe haa Siyona

¹ Harde e lesdi njoorndi ceyoto, ladde welweltan, finnan bana pinndi.

² Nde heewan pinndi, nde welweltan bee gimi e gookaali seyo. Tedduŋgal Libanon laatanto nde, non boo maŋngu Karmel e Saron. Koo moy yi'an tedduŋgal e maŋngu Jawmiraawo meeɗen.

³ Cemmbiɗine juuɗe comɗe e koppi tampuɗi!

⁴ Mbi'e ta'a-ɓerɗe'en: “Cemmbiɗe, taa kule! Ndaa, Allah mooɗon, o ɗon wara ngam waataago konne'en mon, o warjo halleende nde ɓe mbaɗani on. O ɗon wara bee hoore maako hisnugo on.”

⁵ Nden wumɓe ngi'an, fahɓe boo nanan.

⁶ Boosɗo diwan bana lelwa, ɗemŋgal muukaajo waɗan gookaali seyo. Ndiyamji ɓulan nder harde, maahoy boo nder ladde.

⁷ Njaareendi ngulndi laatoto coofol, lesdi njoorndi boo ceeɓooje ndiyam. Waalorde cuuli laatoto nokkuure cannji e kewe.

⁸ Buuwol bi'eteeŋgol Laawol-Ceniiŋgol wonan ton. Coɓɗo yahataa dow maagol, sey tokkotooɓe laawol man tan. Koo faataaɓe boo majjataa ton.

⁹ Walaa mbarooga ton, walaa ndabbaawa paɗɗoowa tokkoto ngol, ɗum tawataake ton. Ammaa soottaaɓe tan tokkoto ngol.

¹⁰ Rimɗinaaɓe Jawmiraawo ngartan, nastan Siyona bee gimi seyo. Seyo duumiiŋgo heewan ɓerɗe maɓɓe. Ɓe keɓan welwelo e seyo, ammaa torra e uumaali ndoggan.