Esaaya 33 - Fulfulde Bible

Jawmiraawo waddan kisndam

¹ Bone laatante, an nattinoowo mo meeɗaay nattineego! Bone laatante, an zammboowo mo meeɗaay zammbeego! To a timmini nattingo, ɓe nattinte, to a timmini zammbaago, ɓe zammbete.

² Yaa Jawmiraawo, hinna min! Min ɗon koolo ma. Laata aynoowo amin cemmbiɗɗo nde weeti fuu, hisnu min nder wakkati ɓillaare.

³ To jama'aaje nani hoolo, ɗe ndoggan, ummaatooje caŋkititto nde ummotoɗa fuu.

⁴ Woɗɓe ɓoftan keɓal mooɗon bana baɓɓatti ɓoftirte, ɓe ndiwan dow maagal bana ndo'uuji ndiwrata.

⁵ Jawmiraawo o Ɓaŋiiɗo, ngam o ɗon jooɗi nder ɓaŋgiiɗum, o ɗon hebbina Siyona bee kiita ngooŋɗuka e adilaaku.

⁶ An Siyona, balɗe ma fuu ɗe tabitɗe. Marugo hikma e anndal, ɗum risku, ɗum hisnan. Haa kulol Jawmiraawo, ndesaari ma woni.

⁷ Nane, semmbiɗɓe ɗon ngooka haa yaasi, nelaaɓe sulhindirooɓe ɗon mboya bojji caatuɗi.

⁸ Buuwi perwi, walaa saalotooɓe fahin. Yimɓe piisti alkawalji, ɓe ɗon njawo seedooɓe, ɓe paalataa koo moye.

⁹ Lesdi ɗon nder suno, yoori. Libanon toski, ɗon ɗayla. Waadiwol Saron laati bana ladde meere, Baasan e Karmel ɗon cammina haakooji maaji.

¹⁰ Jawmiraawo wi'i ummaatooje: “Jonta mi ummoto! Jonta mi daroto! Jonta maŋngu am waŋgan!

¹¹ Onon reedu'en bee huɗo yoorko, on ndanyan tiitiiji. Foofaaŋgo mooɗon woni yiite nge tammi nyaamugo on.

¹² Ummaatooje laatoto ndoondi ɓolinirɗe e gi'e pe'aaɗe gulanɗe nder yiite.

¹³ Nane ko mbaɗanmi, onon daayiiɓe! Onon ɓadiiɓe boo, annde baawɗe am!”

¹⁴ Marɓe hakke nder Siyona ɗon kultora, diwnol naŋngi yedduɓe Allah. Ɓe ɗon mbi'a: “Moy caka meeɗen waawata faɓɓugo kommbi yiite wulanŋge? Moy waawata faɓɓugo kommbi nguli maage haa foroy?”

¹⁵ Mo ɗon yeeɗa nder adilaaku e ɗon wolwa gooŋga, mo njaɓataa keɓal rikiciwal e mo ɗon salo ngeenaari zammba, mo ɗon sukka noppi muuɗum ngam taa nana haala mbar-hoore, mo ɗon maɓɓa gite muuɗum ngam taa o laara kalluɗum,

¹⁶ irin goɗɗo oo jooɗoto haa nokkuuje towɗe, cuuɗi cemmbiɗɗi mahaaɗi dow tapaare laatoto hisrude maako, o heɓan nyaamdu, ndiyam ŋakkantaa mo.

Tedduŋgal garanŋgal

¹⁷ Gite ma ngi'an laamiiɗo nder tedduŋgal muuɗum fuu. A laaran lesdi peeciindi.

¹⁸ Ɓernde ma siftoran kultoreeŋgol naane: Toy binndoowo? Toy jaɓoowo jomorgol? Toy linyoowo cuuɗi towɗi?

¹⁹ A meetataa yi'ugo ummaatoore elewnde, marnde wolde saɗnde e ɗemŋgal me'oowal ngal faamataake.

²⁰ Laar Siyona, berniwol juulɗe men. Gite ma ngi'an Urusaliima, pellel de'uŋgel, laymaaru ndu meetataa sottineego. Tiggirɗe maaru meetataa ɗoofeego, ɓoggol maaru boo meetataa fiisteego.

²¹ Jawmiraawo mawɗo wondan bee meeɗen ton! Ngol laatoto nokkuure ɓulannde ilaali jaasɗi e maaje. Koommbooje marɗe laanyirɗe tokkataako ton, koommbowal maŋngal saalataako.

^22-23 Ɓoggi maagal tirti, ɗi njogataako daŋraŋgal haa caka koommbowal, ɗi mbe'itittaa leppi mawɗi cemmbiɗɗi ɗi ngerɓata koommbowal bee henndu. Jawdi konne'en fuu laatoto keɓal konu, koo woosɓe boo keɓan geɗe muuɗum'en. Ngam Jawmiraawo woni kiitoowo en, Jawmiraawo woni umroowo en, Jawmiraawo woni laamiiɗo men. Kaŋko o hisnan en.

²⁴ Walaa jooɗiiɗo haa lesdi men meetata wi'go o tampuɗo. Ngam ummaatoore wonnde haa ɗo heɓan yaafuye hakkeeji maare.