Esaaya 26 - Fulfulde Bible

Yimre hisnaaɓe

¹ Nyalaade man ɓe ngiman yimre nde'e nder lesdi Yahuuda: En ngoodi berniwol cemmbiɗŋgol. Ngam hisnugo en, Jawmiraawo taarni ngol mahi ɗiɗi.

² Maɓɓite dammuɗe haa ummaatoore adili'en e hoolaaɓe nasta.

³ Mo ɓernde mum tabiti, a ɗon hokka ɗum jam timmuɗam, yaa Jawmiraawo, ngam an o hooli.

⁴ Koole Jawmiraawo haa foroy, ngam Allah Jawmiraawo woni tapaare duumiinde.

⁵ O leesni jooɗiiɓe dow towndiije, o jippini berniwol towŋgol, o yibbini ngol haa lesdi, o wallini ngol nder mbulwuldi.

⁶ Kosɗe talaka'en e laafuɓe ɗon njaaɓa ngol jonta.

⁷ Laawol adili'en, ngol darnuŋgol, an a ɗon dartina ngol ngam maɓɓe.

⁸ Yaa Jawmiraawo, min ɗon koolo ma dow laawol ngol a darnani min. Ewnaago innde ma kanjum ɓerɗe amin ngiɗi.

⁹ Koo jemma boo ɓernde am e ruuhu am ɗon ngele. Ngam to kiitaaji ma njippanake lesdi, jooɗiiɓe haa duniyaaru ekkititto adilaaku.

¹⁰ To kalluɗo heɓi mo'ere, o ekkitittaako adilaaku. Koo nder lesdi gooŋga'en boo o tokkoto waɗugo kalluɗum, o yi'ataa maŋngu Jawmiraawo.

¹¹ Yaa Jawmiraawo, a ɓaŋgtani konne'en juŋngo, ammaa ɓe cali yi'ugo ɗum. Yi'nu ɓe no a yiɗiri ummaatoore ma, ɓe cemta. Yiite nyaama ɓe!

¹² Yaa Jawmiraawo, a hokkan min salaaman. Ko min mbaɗata fuu, an a timminan ɗum ngam amin.

¹³ Yaa Jawmiraawo, Allah amin, jaagorɓe woɗɓe laamani min, ammaa min ɗon ewno innde maaɗa tan.

¹⁴ Maayɓe ngeeɗitittaa, mbeeluuji maɓɓe ummitittaako. A hiiti ɓe, a halki ɓe, a nattini ciftorki maɓɓe fuu.

¹⁵ Ammaa a mawnini ummaatoore amin, yaa Jawmiraawo, a yaajini keeri lesdi fuu. Bana nii a teddiniri innde ma.

¹⁶ Yaa Jawmiraawo, nde yimɓe ma ɗon nder ɓillaare, ɓe ɗakkotiri bee ma. Nde elto ma heɓi ɓe, ɓe ɗuɗɗini do'aaje.

¹⁷ Bana reeduujo ɓadiiɗo danyugo ɗon ɓoslo, ɗon woya nder luuwe muuɗum, non min laatori yeeso maaɗa, yaa Jawmiraawo.

¹⁸ Min laati reedu'en, luuwe naŋngi min, ammaa min ndanyi henndu. Min mbaawataa wallugo lesdi koo danyugo hisnanɓe duniyaaru.

¹⁹ Ammaa maayɓe maaɗa ngeeɗitan, ɓalli yimɓe ma maayɓe ummititto. Pine, ngime, onon waaliiɓe nder mbulwuldi! Jawmiraawo hokkete saawawre ɗelkoore, barka maare lesdi yeeɗitinan maayɓe.

Kiita e bo'itinki

²⁰ Yimɓe ummaatoore am, naste cuuɗi mon, maɓɓe dammuɗe mon ɓaawo mooɗon, cuuɗe wakkati seɗɗa, haa tikkere Jawmiraawo saalo!

²¹ Ngam ndaa, o ɗon wurto nokkuure maako haa o hiito aybe yimɓe duniyaaru. Lesdi sudditan ƴiiƴam ndufaaɗam dow muuɗum, ndi accan suddugo mbaraaɓe.