Esaaya 25 - Fulfulde Bible

Maŋgtoore ngam mbooɗeeŋga Jawmiraawo

¹ Yaa Jawmiraawo, an woni Allah am. Mi maŋgtete, mi teddinan innde ma. Ngam a waɗi kaayeefiiji. Ko a annini diga ɓooyma, a timmini ɗum bee gooŋga e hoolaare.

² A laatini berniwol waagaare kaa'e, berniwol cemmbiɗŋgol boo bille, a halki laamorde jananɓe, taa nde ndaro bana berniwol. Ɓe meetataa nyiɓtaago ɗe haa foroy.

³ Ngam man ummaatoore semmbiɗnde teddinte. Berniiji ummaatooje toonyooje kulete.

⁴ A laati aynirde laafuɓe e talaka'en nder ɓillaare maɓɓe, hisrude to naargewol ummake, ɗowdi to nguleeŋga waɗi. Ngam tikkere toonyooɓe laati bana henndu saatundu dow mahol,

⁵ bana nguleeŋga dow lesdi njoorndi. Ammaa an a naŋgti fitina jananɓe, bana ɗowdi ruuldere feewtinirta nguleeŋga, a je'ini gimi toonyooɓe.

Mbeernaari Jawmiraawo

⁶ Dow hooseere Siyona nde'e Jawmiraawo honooɓe asama taaskanto ummaatooje fuu nyaamduuji belɗi, bee inaboojam ɓennduɗam e kusel ɗigguŋgel e ɓellere e inaboojam mbooɗɗam laaɓɗam.

⁷ Dow hooseere nde'e o ittan cuddirɗum ɗum jama'aaje cuddata fuu e wiirndallo wiirnanŋgo ummaatooje.

⁸ O nattinan maayde haa abada. Allah Jawmiraawo woostan gonɗi haa geese fuu, o ittanan ummaatoore maako mbustu nder duniyaaru fuu. Jawmiraawo wi'i ɗum.

⁹ Nyalaade man yimɓe fuu mbi'an: “Kaŋko woni Allah meeɗen! Kaŋko kooliiɗen, o hisna en. Ndaa Jawmiraawo mo kooliiɗen. Mbelmbelten, en ceyoro kisndam maako.”

Allah hiiti Mo'ab

¹⁰ Juŋngo Jawmiraawo ɗon ayna hooseere nde'e. Ammaa o yaaɓan yimɓe Mo'ab haa nokkuure maɓɓe, bana goɗɗo jiiɓirta loope bee huɗo.

¹¹ Ɓe mbeeɗan juuɗe maɓɓe nder maajam, bana ginoowo weeɗirta ɗe ngam nginam. Ammaa Jawmiraawo leesnan mawnitiiɓe koo to juuɗe maɓɓe kaɓdi.

¹² Mahi maɓɓe towɗi cemmbiɗɗi, Allah turnan ɗi, yibbinan ɗi, wallinan ɗi nder mbulwuldi.