Esaaya 22 - Fulfulde Bible

Koŋngol dow Urusaliima

¹ Ndaa koŋngol dow Waadiwol Wahayuuji. Koni yimɓe ma fuu mba'i dow soorooji,

² an berniwol keewŋgol hoolo e laanyotiral, berniwol ceyiiŋgol? Mbaraaɓe ma, naa ɗum mbaraaɓe kaafahi, naa ɗum do'iiɓe nder haɓre.

³ Ardiiɓe konu ma fuu ndoggi. Fiɗooɓe lagaaje kaɓɓi ɓe. Yimɓe ma fuu kaɓɓidaama hawtaade yaake ɓe ɗonno ndogga daayiiɗum.

⁴ Ngam maajum mbi'mi: Taa ndaareeɗam, haa mi woya bojji naawɗi! Taa tiine de'itingo yam dow halkere ummaatoore am!

⁵ Ngam Allah, Jawmiraawo honooɓe asama waddi nyalaade saklere e nattere e njiiɓru nder Waadiwol Wahayuuji: Mahi ngibbinaama e gookaali ɗon ummo heedi kooseeje.

⁶ Honooɓe Elam ngardi bee lagaaje e kuri, bee mootaaji pucci e wa'iiɓe pucci. Honooɓe Kir taaskitini bawarɗe muuɗum'en.

⁷ Waadiiji Yahuuda ɓurɗi wooɗugo keewi mootaaji pucci, wa'iiɓe pucci ɗon ndari yeeso dammuɗe Urusaliima, ɓe taaskanake kippol.

⁸ Jawmiraawo itti aynol Yahuuda. Saa'i man on kuuciti gal balmi mon haa Suudu Laynde.

⁹ On ngi'i gibbe ɗuuɗɗe nder mahi berniwol Daawuda. On mooɓti ndiyamji haa weendu lesru.

¹⁰ On limi cuuɗi Urusaliima, on ngibbini cuuɗi ngam semmbiɗingo mahol taariiŋgol berniwol.

¹¹ On mbaɗi okoloore hakkunde mahi ɗiɗi ngam mooɓtugo ndiyamji ilanɗi diga weendu ɓooymaaru. Ammaa on ngartanaay Allah baɗɗo kuuje ɗe'e, on ndaaraay taaskitinɗo ɗum diga ɓooyma.

¹² Allah Jawmiraawo honooɓe asama ewni on nyalaade man haa on mboya, on cuno, on pemmba ko'e mon, on kadda limce buhuuje.

¹³ Ammaa onon on ceyi, on mbelmbelti, on kirsi na'i e baali, on nyaami kusel, on njari inaboojam. On mbi'i: “Nyaamen, njaren, ngam jaŋngo en maayan!”

¹⁴ Jawmiraawo honooɓe asama wolwani yam, wi'i: “On njaafantaake aybewol ngo'ol haa to on maayi. Min Allah Jawmiraawo honooɓe asama wi'i ɗum.”

Eliyakim heɓan joonde Sebna

¹⁵ Ndaa nii Allah, Jawmiraawo honooɓe asama wi'i yam: “Umma, yah haa saraakiijo oo, haa Sebna, kaliifaajo laamorde, wi' mo:

¹⁶ Ɗume a mari haa ɗo, bannda moy ɗon wondi bee ma, haa ngasana hoore ma yenaande dow towndiire e keɓana hoore ma saare nder tapaare?

¹⁷ Ndaa, Jawmiraawo sakkinte daayiiɗum! O naŋngete bee semmbe,

¹⁸ o taggete bana taggol gaaraaji, o sakkinte bana tamre haa lesdi njaasndi, ton maayata. Ton boo mootaaji pucci ma booɗɗi njahata, an gadduɗo toskaare dow saare jawma.

¹⁹ Jawmiraawo riiwete e joonde ma, jippinte e nokkuure ma townde.”

²⁰ Jawmiraawo anndini Sebna: “Nyalaade man mi ewnoto suka am Eliyakim ɓii Hilkiyya.

²¹ Mi ɓornan mo limce ma, mi taadan mo taadorgol ma. Mi waɗan baawɗe ma haa juŋngo maako. O laatanto jooɗiiɓe nder Urusaliima e yimɓe Yahuuda baaba.

²² Mi wallinan maɓɓitirɗum saare Daawuda dow balawal maako. To o maɓɓiti, walaa maɓɓoowo. To o maɓɓi boo, walaa maɓɓitoowo.

²³ Mi ɗisan mo bana suufuure haa nokkuure saatunde. O laatanto saare baaba maako daliila tedduŋgal.

²⁴ Ammaa deerɗiiko'en e banndiiko'en fuu laatanto mo doŋngal. Ɓe ɓiloto haa maako bana payanɗe e bulki e taasaaje e pehe ɓilirte haa suufuure ɗisiinde.”

²⁵ Jawmiraawo honooɓe asama wi'i: “Saa'i man suufuure ɗisiinde haa nokkuure saatunde ɗistoto, yanan. Doŋngal ɓilaaŋgal dow maare nattan.” Jawmiraawo wi'i ɗum.