Esaaya 19 - Fulfulde Bible

Koŋngol dow Misra

¹ Ndaa koŋngol dow Misra. Jawmiraawo ɗon wara haa Misra bee jaawal, o ba'iiɗo ruuldere. Labbi Misra ɗon ndiwna yeeso maako, ɓerɗe Misra'en ɗon ɓolwa nder muuɗum'en.

² “Mi umminan Misra'en dow Misra'en, ɓe kaɓan hakkunde maɓɓe, koo moy bee deerɗum, koo moy bee keeddiɗɗum, berniwol bee berniwol e laamu bee laamu.

³ Misra'en ellititto, mi wilan nufayeeje maɓɓe. Ɓe ƴaman labbi e sarwotooɓe maayɓe e hiila'en e laarooɓe.

⁴ Mi hokkan Misra'en haa juŋngo jaagorɗo caatuɗo, laamiiɗo mo walaa enɗam laamanto ɓe. Min Allah Jawmiraawo honooɓe asama wi'i ɗum.”

⁵ Ndiyam mbeela leestan, maayo ɓeeɓan, yooran.

⁶ Maaje fuu kaccan, ilduɗe Misra ustoto, ɓeeɓan, huɗo e kewe ɗaylan.

⁷ Durduɗe maayo Niil gonɗe haa pomoole maago e ko aawa ton njooran, caŋkititto, mbilan.

⁸ Waawooɓe liɗɗi uuman, sakkinooɓe biccirgal nder maayo Niil ngonan nder mettamɓeram, wubooɓe zubaaji dow ndiyam cunoto.

⁹ Mottooɓe hottollo e leŋ mbemmboto.

¹⁰ Sannyooɓe tampan, ɓerɗe huuwooɓe ngam ngeenaari fuu ta'an.

¹¹ Ardiiɓe berniwol Co'an, ɓe faataaɓe. Sarwooɓe Firawna ɓurduɓe hakkiilo mbaɗan sawari meere. Noy mbi'roton Firawna: “Mi ɓii hikma'en, mi danygol laamiiɓe ɓooyma”?

¹² An laamiiɗo Misra, toy hikma'en maaɗa? Sey ɓe mbolwa, ɓe anndine ko Jawmiraawo honooɓe asama nufi dow Misra.

¹³ Ardiiɓe Co'an laati faataaɓe, ardiiɓe Memfis ɗon nder saklere, ardiiɓe le'i Misra ɗon majjina ummaatoore.

¹⁴ Jawmiraawo loowi ruuhu njiiɓru nder maɓɓe, haa ɓe majjina Misra nder kuuɗe muuɗum fuu, bana guykuɗo tallirta nder tuure mum.

¹⁵ Walaa kuugal booɗŋgal nder Misra ngal hoore malla wicco malla dibinoohi malla kewal.

¹⁶ Nyalaade man Misra'en nanndan bee rewɓe, ɓe kulan, ɓe ndiwnan to Jawmiraawo honooɓe asama ɓaŋgti juŋngo mum dow maɓɓe.

¹⁷ Lesdi Yahuuda laatanto Misra daliila kultoreeŋgol. Koo ndeye goɗɗo wolwata haala Yahuuda, ɓe ndiwnan ngam nufo Jawmiraawo honooɓe asama ngo o nufani ɓe.

¹⁸ Nyalaade man, nder berniiji Misra jowi yimɓe mbolwan Ibraniŋkeere, ɓe kunorto bee innde Jawmiraawo honooɓe asama. Innde gootol maaji Ir-Heres.

¹⁹ Nyalaade man hirsirde Jawmiraawo wonan haa caka lesdi Misra, hayre siftinorde ngam Jawmiraawo wonan baŋnge keerol maari.

²⁰ Ɗum alaama e seedamku ngam Jawmiraawo honooɓe asama nder lesdi Misra. To toonyooɓe ɓilli ɓe, ɓe tori Jawmiraawo, kaŋko o nelanan ɓe goɗɗo ngam jiŋngugo ɓe e hisnugo ɓe.

²¹ Jawmiraawo anndinan hoore muuɗum haa Misra'en, nyalaade man ɓe anndan mo. Ɓe njagganto mo bee kirseteeɗi e dokke nyaamdu. Ɓe toganto Jawmiraawo togayeeje, ɓe kebbinan ɗe boo.

²² Jawmiraawo fiyan Misra'en. O fiyan ɓe, ammaa o hurgan ɓe boo. Ɓe ngaylititto haa Jawmiraawo, kaŋko o jaɓan tornde maɓɓe, o hurgan ɓe.

²³ Nyalaade man buuwol ummoto diga Misra haa Assuura. Assuura'en e Misra'en ngillotiran. Misra'en hawtaade bee Assuura'en njagganto Jawmiraawo.

²⁴ Nyalaade man Isra'iila laatoto daliila barka ngam duniyaaru fuu, o tataɓo ɓaawo Misra e Assuura.

²⁵ Jawmiraawo barkiɗinan bee wi'go: “Barka laatanto Misra, ummaatoore am, Assuura, kuugal juuɗe am e Isra'iila, maral am.”