Esaaya 14 - Fulfulde Bible

Jancoore dow laamiiɗo Baabila

¹ Fakat, Jawmiraawo hinnoto danygol Yaakubu, o suɓan Isra'iila fahin. O jo'itinan ɓe nder lesdi maɓɓe fahin. Jananɓe ɗakkotiran bee maɓɓe, kawtanan danygol Yaakubu.

² Ummaatooje goɗɗe koocan e njahran ɓe haa lesdi maɓɓe, Jawmiraawo marnan ɓe ndi. Ton yimɓe ummaatooje ɗe'e laatoto maccuɓe e horɓe maɓɓe. Ɓe kaɓɓan haɓɓooɓe ɓe, ɓe laamoto dow ɓillooɓe ɓe.

³ Isra'iila, nyannde nde Jawmiraawo siwtinte e laruura e torra e maccuŋgaaku naawŋgu ngu torriiɗa,

⁴ a yimanan laamiiɗo Baabila gimol jancowol ngo'ol: “Yowwa, toonyoowo do'ake, toonyaare timmi!

⁵ Jawmiraawo yewi ɓoccol halluɓe e sawru toonyooɓe.

⁶ O fiyi ummaatooje bee tikkere, bee piyɗe ɗuuɗɗe. O dooli ummaatooje bee ɓernuki e toonyaare, bilaa naŋgtaare.

⁷ Lesdi fuu foofti, ɗon siwto, yimɓe ɗon mbaɗa gookaali seyo.

⁸ Koo leɗɗe booɗɗe boo ɗon ceyoro do'ere ma. Leɗɗe cemmbiɗɗe haa Libanon fuu ɗon mbi'a: Diga a ɗon waali, walaa garɗo hippaago min.

⁹ Joonde maayɓe haa les ɗon dimmbo ngam jaɓɓaago ma. Nde ummini mbeeluuji waato mawɓe lesdi fuu ngam maaɗa, nde ummini laamiiɓe ummaatooje fuu e leese laamu muuɗum'en.

¹⁰ Ɓe fuu ɓe mbi'ete: Jonta an boo a tampuɗo, a nannduɗo bee amin.

¹¹ Daraja ma do'ake nder joonde maayɓe bee hoolo moolooji ma fuu. Gilɗi laati be'itte ma, ɗi laati boo suddaare ma.”

¹² Noy ndo'oriiɗa diga asama, an horre ɗelkoore, ɓii-beɗgol! Noy njanirɗa haa lesdi, an jaaliiɗo ummaatooje!

¹³ A numi nder ɓernde ma: Mi eeŋgan haa asama, mi ɓaŋgtan leeso laamu am towɗum haa dow koode Allah, mi jooɗoto dow hooseere mooɓorde ɗowanteeɓe daayiiɗum haa woyla.

¹⁴ Mi eeŋgan dow duule ɓaŋgiiɗe, mi nanndinan hoore am bee Allah Ɓaŋiiɗo.

¹⁵ Ammaa a do'aama nder joonde maayɓe, nder ngaska ɓurka luggugo.

¹⁶ Yi'anɓe ma fuu cutete, tiimete. Ɓe ƴaman: “Ɗum gorko dimmbuɗo lesdi e laamuuji go na?

¹⁷ O wartiri duniyaaru ladde meere, o yibbini berniiji, o yoofaay haɓɓaaɓe maako ɓe koota lesdi maɓɓe.”

¹⁸ Laamiiɓe ummaatooje fuu ɗon mbaali nder tedduŋgal, koo moy nder yenaande mum.

¹⁹ Ammaa an, a wudinaama bana lisal nyidduŋgal, daayiiɗum bee yenaande. A cuddaaɗo bee mbaraaɓe, bee yuwaaɓe kaafahi, wudinaaɓe dow kaa'e nder ngaska, bana caaɗŋgu ngu yimɓe njaaɓi.

²⁰ A hawtataa bee laamiiɓe woɗɓe nder yenaande, ngam a wonni lesdi ma, a mbari yimɓe ma. Danygol halluɓe ewnataake haa abada.

²¹ Taaskitine mbareeki ɓiɓɓe maako daliila zunuuba kaakiraaɓe muuɗum'en. Taa ɓe ummito, ɓe mara lesdi, ɓe kebbina duniyaaru bee berniiji.

²² Jawmiraawo honooɓe asama wi'i: “Mi ummanto Baabila. Mi nattinan daraja ma e luttuɓe ton e danygol maɓɓe fuu. Min Jawmiraawo wi'i ɗum.

²³ Mi wartiran ngol maral camnale e waalowol. Mi wuuwan ngol bee buurɗi ɗi halkere. Min Jawmiraawo honooɓe asama wi'i ɗum.”

Koŋngol dow Assuura

²⁴ Jawmiraawo honooɓe asama huni, wi'i: “Fakat, bana numrumi, non ɗum laatorto, bana nuforiimi, non ɗum timmirta:

²⁵ Mi fusan Assuura'en nder lesdi am, mi yaaɓan ɓe dow kooseeje am. Kaɓɓirgal maɓɓe sottan e yimɓe am, doŋngal maɓɓe boo e balbe maɓɓe.

²⁶ Kanjum mi nufi ngam duniyaaru fuu. Kanjum woni juŋngo am fortaaŋgo dow ummaatooje fuu.”

²⁷ Jawmiraawo honooɓe asama waɗi anniya, moy waawata haɗugo ka? O forti juŋngo maako, moy haɗata ngo?

Koŋngol dow Filistiya

²⁸ Hitaande nde laamiiɗo Akas maayi, koŋngol ngo'ol wari:

²⁹ Onon yimɓe Filistiya fuu, sawru fiyndu on yewi. Ammaa taa ceye! To mboodi waati, foosokre waran haa pellel maari. Haa yeeraande foosokre, mboodi piiroori ngiiteeleeri wurtoto.

³⁰ Jawmiraawo nyaamnan yimɓe muuɗum miskini'en bana gaynaako, ɓe mbaaloto bee de'ere. Ammaa onon Filisti'en, o mbaran iwde mon bee weelo, o mbaran luttuɓe mon fuu.

³¹ Ngooke ngam ballal, onon berniiji Filisti'en fuu! Kultore on fuu! Cuurɗe ɗon ngara diga woyla, walaa dimmbotooɗo nder caffuuji maɓɓe.

³² Ɗume en njaaboto nelaaɓe Filisti'en? En mbi'an ɓe: “Jawmiraawo jo'ini Siyona, yimɓe maako laafuɓe tawan hisrude ton.”