Balndi 7 - Fulfulde Bible

Dabareeji debbo daakaareejo

¹ Ɓiŋngel am, hakkilan bolle am, joga umrooje am nder ɓernde ma.

² Ɗowtana umrooje am haa ngeeɗa, hakkilan anndinol am bana ɓiŋngel yiitere ma.

³ Haɓɓu ɗum haa juŋngo ma, winndu ɗum dow alluha ɓernde ma.

⁴ Wi' hikma: “An woni adda am”, ewna hakkiilo boo, soobaajo ma.

⁵ Ɗum aynete e debbo keeddiɗɗa e debbo jananno belnanɗo bolle mum.

⁶ Nyannde feere mi yurni yaasi suudu am, haa kasaryel ndaarmi:

⁷ Nder suka'en sooyɓe anndal ngi'mi gooto mo hakkiilo mum famɗi.

⁸ O ɗon saalo haa laawol baŋnge pellel debbo feere, o seli laawol go, o ɗon yaha haa suudu maako.

⁹ Ɗum maŋngariba, mutki naaŋge, jemma nyiɓɓi.

¹⁰ Ndaa, debbo go fotti bee maako, o ɗon haddi bana daakaareejo, o ƴoyɗo,

¹¹ O nanaro, o walaa de'ere, o jooɗataako haa suudu maako.

¹² Jonta o ɗon haa laawol, jonta haa luumo, haa kawtirɗe laabi fuu o ɗon reena.

¹³ O naŋngi suka go, o hebbi mo, o wi'i mo bee gite dartiiɗe:

¹⁴ “Haaje kirseteeŋga ɗonno dow am, hannde njoɓmi togayeere am.

¹⁵ Ngam maajum ngurtiimi haa mi fotta bee ma, haa mi ɗaɓɓite, jonta tawmaami.

¹⁶ Mi suddi be'itte am bee borgooje, mi we'iti gude Misra ɗigguɗe.

¹⁷ Mi uurni waalorde am bee baɗaadi e uurle belɗe.

¹⁸ War, nguyken yiide haa fajiri, maaten belɗum bee huufindirgo.

¹⁹ Gorko am walaaɗon, o dilli jahaaŋgal daayiiŋgal.

²⁰ O hoo'i booro ceede haa juŋngo maako, sey to lewru senndi o wartata.”

²¹ O esti mo bee bolle maako ɗuuɗɗe, o waawti mo bee haala maako mbelka.

²² Ɗon nii suka tokki mo, bana ngaari yahrata haa hirsirde, bana kooba nastirta tuuforgol

²³ haa kurol yuwa heŋre maaga, bana sonndu yaawirta heedi tuuforgol, ndu anndaa yoŋki maaru ɗon yeeso joote.

²⁴ Ngam maajum naneeɗam, onon suka'en, kakkilane bolle am.

²⁵ Taa ɓerɗe mon ngaylito haa laabi irin debbo oo, taa ngiile haa laabi maako.

²⁶ Ngam o do'i ɗuuɗɓe masin, koo semmbiɗɓe, mbaraaɓe maako ɗuuɗi, ɓuri limeego.

²⁷ Suudu maako woni laawol haa joonde maayɓe, ngol yahran haa cuuɗi waade.