Balndi 6 - Fulfulde Bible

Deentinki dow nyamaale

¹ Ɓiŋngel am, to a laatake dammaaniiɗo ngam keeddiɗɗa, to a fiyi dammaana ngam goɗɗo feere,

² to a haɓɓaama bee bolle hunnduko ma,

³ nden kam a nasti juŋngo keeddiɗɗa. Ndaa nii a hisnirta hoore ma: Yah law, ɓillu keeddiɗɗa,

⁴ taa duŋana gite ma ɗaanaago, haɗ hoore ma koo siwtaago boo.

⁵ Hisnu hoore ma e ngamngam bana lelwa, bana sonndu haa juŋngo tuufnoowo.

⁶ Yah haa hondorde, an mbaateendamjo, laar kuuɗe maare, keɓa hakkiilo!

⁷ Kayre nde walaa ardiiɗo, koo aynoowo, koo umroowo.

⁸ Ammaa nde taaskan nyaamdu maare bee ceeɗu, wakkati codol nde mooɓta nyaamdu maare.

⁹ Haa ndey a ɗon waali, an mbaateendamjo? Ndey a ummoto e ɗoyɗi ma?

¹⁰ “Sey mi ɗaano seɗɗa, mi siwto seɗɗa, mi falindira juuɗe am seɗɗa dow be'itte.”

¹¹ Yowwa! To bana non, talakaaku juhete bana pasoowo, laafere boo bana taaskaniiɗo konu.

Deentinki dow faasikaare

¹² Noy faasikiijo wa'i? O ɓalwa-ɓerndeejo, kalluɗo,

¹³ o ɗon himƴa bee gite, o ɗon fiya bee kosɗe, o ɗon sappina bee kooli,

¹⁴ ɓernde maako faasikiire ɗon nufo kalluɗum foroy, ɗon ummina jokkirli koo toy.

¹⁵ Ngam maajum halkere juhan mo, o puseteeɗo nder ma'annde yiitere, o heɓataa hurgaago.

¹⁶ Jawmiraawo ɗon wanya kuuje joweeɗiɗi, ɗe laati nyidduɗe haa maako:

¹⁷ Gite mawnitiiɗe e ɗemŋgal pewoowal e juuɗe dufanɗe ƴiiƴam neɗɗo mo walaa aybe

¹⁸ e ɓernde haɓɓannde dabareeji kalluɗi e kosɗe jaawananɗe halleende

¹⁹ e bolwanɗo seedamku fewre e umminanɗo jokkirli caka banndiraaɓe.

Deentinki dow njeenu

²⁰ Ɓiŋngel am, ɗowtana umroore baaba ma, taa yejjitit anndinol daada ma.

²¹ Haɓɓu ɗum foroy nder ɓernde ma, ɓil ɗum haa daande ma.

²² To a ɗon yaha, ɗum ɗowete. To a ɗon waali, ɗum aynete. To a fini boo, ɗum wolwante.

²³ Ngam umroore woni pittirla, anndinki boo jayŋgol, feloore e elto ɗum laawol ngeendam.

²⁴ Ɗum faddete e debbo keeddiɗɗa, e bolle belɗe estooje ɗe debbo jananno.

²⁵ Taa ɓernde ma suuna ŋarol maako, taa gite maako naaŋge.

²⁶ Debbo daakaare ɗaɓɓan ngeenaari deydey soodugo nyaamdu seɗɗa, ammaa debbo te'aaɗo nyaaman yoŋki ma fuu.

²⁷ To goɗɗo nastini yiite haa jiiba mum, limce mum ngulataa na?

²⁸ Malla to o yaaɓi dow ƴulɓe yiite, kosɗe maako ngulataa na?

²⁹ Bana non boo mo nasti haa debbo keeddiɗɗum: Walaa meemanɗo mo hisata kiita.

³⁰ To goɗɗo wujji nyaamdu ngam o beelaaɗo, yimɓe njawataako mo.

³¹ Ammaa to ɓe naŋngi mo, doole o lorna ɗum cowi joweeɗiɗi, o hokka jawdi saare maako fuu.

³² Fakat, baɗɗo njeenu bee debbo, o walaa hakkiilo. Sey giɗɗo halkugo yoŋki mum waɗata bana non.

³³ Kuuduuje e toskaare keɓan mo, mbustu maako ittataako.

³⁴ To gorko ɗon haaja, tikkere maako saatan, saa'i o waatoto, o marataa enɗam.

³⁵ O laarataa coottaari sam. Koo to a ɗuɗɗini dokke, o jaɓataa.