Balndi 25 - Fulfulde Bible

Balndi Suleymaanu goɗɗi

¹ Ndaa balndi Suleymaanu goɗɗi ɗi yimɓe taariiɓe Hezekiya, laamiiɗo Yahuuda mbinnditi:

² Suuɗugo huunde, ɗum tedduŋgal Allah, ammaa tedduŋgal laamiiɓe, ɗum wiɗitaago huunde.

³ Bana towirka asama e luggeeŋga lesdi, bana non numooji laamiiɗo, ɗi keɓtataake.

⁴ Ittu ko jillindiri bee cardi, nden kam tappoowo cardi laatinan ndi taasayel.

⁵ Daaynu dawroowo kalluɗo haa laamiiɗo, nden kam leeso laamu maako tabitan bee adilaaku.

⁶ Taa manta yeeso laamiiɗo, taa dara haa pellel mawɓe.

⁷ Ngam wi'eego: “War gaa'e”, ɓuri famɗitineego yeeso mawɗo.

⁸ To a yi'i huunde haa keeddiɗɗa, taa yaawɗa wullaago mo. Noy mbaɗata to o fewni ma?

⁹ To a ɗon waɗa kiita bee keeddiɗɗa, taa waŋgin ko goɗɗo feere wi'i ma bee sirri.

¹⁰ Ngam to a waɗi ɗum, yimɓe fuu kallinte, innde ma woonde halki haa foroy.

¹¹ Bana fawne kaŋŋeeri dow taasaaje cardi, non wolde wolwaande bee pottuɗum wa'i.

¹² Bana halagaare kaŋŋeeri e koɗel kaŋŋeeri laaɓndi, non feloore kakkilɗo wa'i to a jaɓi nde.

¹³ Bana heɓugo peewol yaake seeto, non nelaaɗo koolaaɗo wa'i haa nelɗo mo, o seynan ɓernde jaagorɗo maako.

¹⁴ Duule e henndu bilaa iyeende, bana non jurotooɗo bee dokkal bilaa hokkugo wa'i.

¹⁵ Munyal jaaloto kiitoowo, ɗemŋgal ɗelemŋgal yewan i'e.

¹⁶ To a ɗuɗɗini nyaamugo njumri, ndi naawan reedu ma, a tuutan ndi.

¹⁷ Taa ɗuɗɗin yillaago keeddiɗɗa, to naa non o haaɓete, o fuɗɗan wanyugo ma.

¹⁸ Bana wandayre e kaafahi e kurol ceeɓŋgol, non bolwanɗo seedamku fewre dow keeddiɗɗum wa'i.

¹⁹ Hoolaago faasikiijo nder nyannde ɓillaare, ɗum bana ƴakkugo bee nyiindere nyawnde malla waancugo bee kosŋgal boosŋgal.

²⁰ Ɓortaago alkibbaare nder nyannde peewol, rufugo lammuɗam dow huuduure, yimango cuniiɗo gimi seyo – ginnaaɗo tan waɗata irin ɗu'um.

²¹ To konneejo ma dolaama, nyaamnu mo, to o ɗomɗaama, yarnu mo.

²² Bana nii cemtinirta mo, Jawmiraawo boo warjoto ma.

²³ Henndu loowru waddan iyeende, bolle tufle umminan tikkere woɗɓe.

²⁴ Jooɗaago dow seɓatto soorowol ɓuri jooɗaago nder suudu bee debbo giɗɗo jokkirli.

²⁵ Bana ndiyam peewɗam haa kondondol ɗomɗuɗo, non kubaruwol booɗŋgol iwŋgol lesdi ndaayiindi wa'i.

²⁶ Bana seeɓoore nyiddunde e ɓulndu wonniindu, non adiliijo tokkiiɗo esto kalluɗo wa'i.

²⁷ Ɗum haanaay goɗɗo nyaama njumri ɗuuɗndi, ɗum haanaay goɗɗo tefana hoore mum tedduŋgal ɗuuɗŋgal.

²⁸ Bana berniwol bilaa mahol taariiŋgol ɗum, non gorko cooyɗo naŋgtaare wa'i.