Balndi 24 - Fulfulde Bible

Hikmaajo e kalluɗo 19

¹ Taa haaju hayru halluɓe, taa ɗaɓɓu gondal maɓɓe,

² ngam ɓerɗe maɓɓe ɗon numa toonyaare tan, nde ɓe mbolwata fuu, ɗum haala sarru.

20

³ Hikma nyiɓan saare, hakkiilo tabitinan nde.

⁴ Bee anndal goɗɗo hebbinirta cuuɗi mum bee kuuje booɗɗe e marɗe saman feere feere.

21

⁵ Hikmaajo woodi baawɗe, jawmu anndal ɗuɗɗinan semmbe mum.

⁶ Giɗɗo waɗugo haɓre, sey aarta numugo, jaalorgal iwan haa ɗuuɗal dawrooɓe.

22

⁷ Paataaɗo waawataa jokkaago hikma, nder dawriinde o fotaay maɓɓititgo hunnduko.

23

⁸ Nufotooɗo kalluɗum foroy, ɓe mbi'an mo umminoowo fitina.

⁹ Anniyaaji paataaɗo fuu laatoto hakke, jancoowo woni nyidduɗo haa yimɓe.

24

¹⁰ To a tampi nder nyannde ɓillaare, nden kam semmbe ma ɗuuɗaay.

25

¹¹ Hisnu mo walaa aybe, mo ɓe ndasata ngam mbareego, daɗnu mo.

¹² Taa wi': “Asee, mi anndaano ɗum”, ngam Allah anndi to a wi'i gooŋga malla a fewi. Linyoowo ɓerɗe warjoto koo moy deydey kuugal mum.

26

¹³ Ɓiŋngel am, nyaam njumri, ngam ndi wooɗi, njumri kesri welanan hunnduko ma.

¹⁴ Anndu, bana non hikma wa'i ngam yoŋki ma. To a heɓi ka, saa'iire warannde ɗon, tammunde ma boo halkataa.

27

¹⁵ An kalluɗo, taa ɗaɓɓu jaɓtugo saare adiliijo, taa nattin nokkuure siwtaare maako.

¹⁶ Adiliijo, koo to do'i nde joweeɗiɗi, o ummititto. Ammaa halluɓe njanan nder sarru.

28

¹⁷ Taa seyora do'ere konneejo ma, taa ɓernde ma welwelta to o fergake.

¹⁸ Ngam to Jawmiraawo yi'i ɗum, ɗum fottantaa mo, nden o sottina tikkere maako haa oya.

29

¹⁹ Taa ɓernan waɗooɓe zunuuba, taa haaju hayru halluɓe,

²⁰ ngam hayru maɓɓe duurataa, ngu jinnan bana pittirlayel nyifanŋgel.

30

²¹ Ɓiŋngel am, hul Jawmiraawo, hul laamiiɗo boo, taa hawtu bee tuurtooɓe, taa tuurtan ɗiɗo fuu,

²² ngam halkere tuurtooɓe waran bee juhuki. Num sarru ngu Allah malla laamiiɗo mbaawata ukkango ɓe.

Sawariiji hikma'en goɗɗi

²³ Ndaa, kanje boo ɗe bolle hikma'en: Senndindirgo yimɓe yeeso kiita, wooɗaay.

²⁴ Bi'anɗo kalluɗo: “A waɗi ko fotti”, yimɓe kuɗan mo, ummaatooje fuu naalan mo.

²⁵ Ammaa hiitotooɓe aybuɗo keɓan welwelo, barka e hayru laatanto ɓe.

²⁶ Jaawaabuwol belŋgol nanndi bee kebbaaki hunnduko.

²⁷ Taaskitin kuugal ma haa yaasi, timmin kuuɗe ngesa ma fuu, ɓaawo maajum nyiɓ suudu ma.

²⁸ Taa seeda dow keeddiɗɗa to daliila woodaa. Taa waɗ mo rikici bee bolle ma.

²⁹ Taa wi': “Sey mi waɗa mo ko o waɗi yam, mi warjo mo fodde kuugal maako.”

No mbaateendamjo wa'i

³⁰ Mi yaali ngesa mbaateendamjo e ngesa inabooje ka sooya-hakkiiloojo.

³¹ Ndaa, ka heewi gi'e, geene cuddi ka, mahol maaka ngol kaa'e yibbi.

³² Mi yi'i ɗum, mi numi, mi laari, ndaa ko mi faami:

³³ Ɗaanaago seɗɗa, ngoŋngugo seɗɗa, falindirgo juuɗe, siwto seɗɗa,

³⁴ bana non talakaaku juhirte, laafere ma boo bana taaskaniiɗo konu.