Balndi 23 - Fulfulde Bible

6

¹ To a jooɗake haa a nyaamda bee mawɗo, taa yejjitit moy ɗon jooɗi yeeso ma.

² To a ɗuuɗa-nyaamɗeejo, sey a wallina laɓi haa kondondol ma.

³ Taa suuna nyaamdu maako welndu, teema o ɗaɓɓan estugo ma bee maaru.

7

⁴ Taa somnu hoore ma ngam riskugo, accu numugo haala man.

⁵ To a tiitini gite ma dow risku, walaa ko keɓata, ngu waɗan bileeji, ngu fiiran haa asama bana dutal.

8

⁶ Taa nyaamdu bee ɗawɗo, taa suuna nyaamduuji maako belɗi,

⁷ ngam o ɗon waɗa lisaafi haa ɓernde maako. O wi'ete: “Nyaam, yar”, ammaa ɓernde maako wondataa bee maaɗa.

⁸ Loŋngere nde moɗɗa, a tuutan nde, a mani nyaamdu maako meere non.

9

⁹ Taa wolwu haa noppi paataaɗo, ngam o samɗintaa bolle ma.

10

¹⁰ Taa sottin keerol ngesa atiime'en ngam mawningo maral ma.

¹¹ Ɓe ngoodi balloowo cemmbiɗɗo: Allah jiŋngan ɓe, haala man loroto dow maaɗa.

11

¹² Nanan anndinoowo ma, heɗita bolle anndinki fuu.

12

¹³ Taa sala eltugo derkeejo. A mbarataa mo to a ɓocci mo.

¹⁴ Fakat, to a ne'i mo bana nii, a hisnan yoŋki maako e halkere.

Sawariiji baaba ngam ɓiyum 13

¹⁵ Ɓiŋngel am, to a laatake kakkilɗo, ɓernde am seyoto.

¹⁶ To mi nani bolle hikma haa hunnduko ma, mi juroto ngam daliila maaɗa.

14

¹⁷ Taa ɓernde ma haaja hayru hakke'en, ammaa nde heewa kulol Jawmiraawo nyalɗe fuu.

¹⁸ Nden kam jaŋngo ɗon ngam maaɗa, tammunde ma boo halkataa.

15

¹⁹ Nan, ɓiŋngel am, laata hikmaajo, yahru ɓernde ma dow laawol darnuŋgol.

²⁰ Taa wondu bee yarooɓe nguykinoojam e ɗuɗɗinooɓe nyaamɗe kusel,

²¹ ngam guykoowo e ɗuuɗa-nyaamɗeejo talkiɗan, ɗuuɗal ɗoyɗi boo ɓornan goɗɗo bance.

16

²² Nanan baaba ma, danyɗo ma, taa yawa daada ma boo to o naywi.

²³ Soodu gooŋga, taa soorru ka, non boo hikma, anndinki e hakkiilo.

²⁴ Baaba goɗɗo adiliijo welweltan, danyɗo hikmaajo boo seyorto mo.

²⁵ Accu baaba ma e daada ma ceyo, danyɓe ma keɓa welwelo.

17

²⁶ Ɓiŋngel am, heɗitam bee ɓernde ma fuu, kuuɗe am laatano ma misaalu.

²⁷ Reenta e debbo daakaare, ngam o ngaska lugguka, debbo jananno boo woni ɓulndu ɓilliindu.

²⁸ Ɓe ɗon mbaaltano ma bana fasooɓe, ɓe ɗon ɗuɗɗina faasiki'en caka worɓe.

No guykoowo wa'i 18

²⁹ Moy wi'ata foroy: “Ayye” malla: “Kayya”? Moy ɗon bee jokkirli e uumaali tum? Ɓanndu moy heewi kuuduuje meere? Moy mari gite boɗeeje?

³⁰ Ɗum hiirdooɓe bee inaboojam, ɗaɓɓitooɓe njaramji guykinooji koo ɗiye.

³¹ Taa laar inaboojam no ɗam woojiri, no ɗam yaynirta nder jardugel. Ɗam moɗoto bee koyɗum,

³² ammaa ɓaawoɗon ɗam ŋatan bana mboodi, hoore ma yiilan bana to foosokre ŋati ma.

³³ Gite ma ngi'an kuuje kayɗiniiɗe, a wolwan haalaaji paataaɗi.

³⁴ A laatoto bana baaliiɗo caka mbeela, bana ɗaaniiɗo haa wicco koommbowal.

³⁵ To hakkiilo ma warti, a wi'an: “Ɓe piyi yam sike, ammaa ɗum naawaay yam, ɓe tappi yam, ammaa mi maataay ɗum. Ndey pinanmi booɗɗum? Mi yiɗi njaram fahin.”