Ayuba 42 - Fulfulde Bible

Tuubu Ayuba

¹ Nden Ayuba jaabi Jawmiraawo:

Ayuba

² Jonta anndumi an a mari baawɗe fuu, ko a annini waɗugo, a waɗan ɗum.

³ Ndaa, a ƴami koni mi seki hikma ma, mi ceediiɗo faataare am bee haala ka'a. Gooŋga maaɗa! Mi wolwi bilaa faamugo haala kuuje ɗe calortammi anndugo.

⁴ An a wi'no: “Accu mi wolwa. Min mi ƴamete, an boo sey a jaabammi.”

⁵ Nanɗe noppi tan, non mi nani haala ma, ammaa jonta, bee gite am mi yi'i ma.

⁶ Ngam daliila man cemtiranmi bolle am, ndaa mi tuubi, mi meetataa waabaago sam.

Jawmiraawo mo'ani soobiraaɓe Ayuba

⁷ Ɓaawo Jawmiraawo wolwani Ayuba bolle ɗe'e fuu, Jawmiraawo wi'i Elifas Temaniijo: “Mi ɗon ɓernane, an e sooba'en ma ɗiɗo. Ngam on ceedanaaki yam gooŋga bana jaggiiɗo am Ayuba seedori.

⁸ Jonta kam, koo'e ga'i kalhali joweeɗiɗi e jawɗi baali joweeɗiɗi. Njehe haa jaggiiɗo am Ayuba, lii'e ɗi guleteeɗi ngam ko'e mooɗon. Ayuba boo do'ano on. Mi jaɓan do'a maako, ngam taa mi waɗa on fodde faataare mon. Ngam on ceedanaaki yam bana no haani, bana kaŋko o seedori.”

⁹ Nden Elifas Temaniijo e Bildad Suhiijo e Cofar Na'amatiijo njehi, mbaɗi ko Jawmiraawo umri ɓe. Jawmiraawo boo jaɓi do'a Ayuba.

Hayru Ayuba hesɗiti

¹⁰ Ɓaawo Ayuba do'ani sooba'en mum, Jawmiraawo hesɗitini hayru maako. O hokki mo ko o marno fuu cowi ɗiɗi.

¹¹ Deerɗiiko'en worɓe e rewɓe fuu ngari haa maako e annduɓe mo diga naane fuu. Ɓe nyaamdi bee maako nder saare maako. Ɓe njurmini mo, ɓe nde'itini mo dow sarru ngu Jawmiraawo ukkanno mo fuu. Koo moy maɓɓe hokki mo suleyre cardi e halagaare kaŋŋeeri.

¹² Jawmiraawo barkiɗini Ayuba ko ɓuri naane. Ayuba heɓi dammooji ujine sappo e nayi e geelooɗi ujine joweego e ga'i cindaaɗi ɗiɗi ɗiɗi nde ujineere e bamɗe debbe ujineere.

¹³ O danyanaama ɓiɓɓe worɓe njoweeɗiɗo e ɓiɓɓe rewɓe tato.

¹⁴ Arano ɓiɓɓe rewɓe, o inndi mo Yemiima. Ɗiɗaɓo, o inndi mo Keci'a. Tataɓo boo, o inndi mo Keren-Happuka.

¹⁵ Rewɓe wooɗɓe bana ɓiɓɓe Ayuba tawaaka nder lesdi fuu. Baaba maɓɓe yeɗi ɓe ndonŋgu caka deerɗiraaɓe maɓɓe worɓe.

¹⁶ Ɓaawo maajum Ayuba wuuri duuɓi teemerre e cappanɗe nayi. O yi'i ɓiɓɓe maako e ɓiɓɓe ɓiɓɓe maako, gide nayi.

¹⁷ Nden Ayuba maayi, o ndottiijo, kaarɗo balɗe.