Ayuba 40 - Fulfulde Bible

¹ Jawmiraawo wi'i Ayuba:

Ayuba

² An peloowo, a jokkiran bee Baawɗo na? An gaabotirɗo bee Allah, a waawan jaabaago na?

³ Ayuba jaabi Jawmiraawo:

⁴ Min mi he'aay koo ɗume. Ɗume mi jaaboto? Sey mi waɗa juŋngo am dow hunnduko.

⁵ Mi wolwi nde woore, haa nde ɗiɗi. Jonta mi wolwataa, mi jeeɗake.

Baŋginki baawɗe Allah

⁶ Nden Jawmiraawo gonɗo nder duluuru wi'i Ayuba:

⁷ Sey a taasko, a daro bana gorko, haa mi ƴame, an boo a jaabo yam.

⁸ A jaɓaay kiita ka mi ta'i na? A yiɗi aybingo yam ngam haa a adilina hoore ma na?

⁹ An a laati cemmbiɗɗo bana Allah na? An a rigga-sawtuujo bana maako na?

¹⁰ Bee ɓaŋgaare e tedduŋgal a jaagnoro, non bee maŋngu e daraja a ɓornorto.

¹¹ Laar mawnitiiɓe, leesnu ɓe, a rufa tikkere dow maɓɓe fuu boo.

¹² Laar mawnitiiɓe fuu, toskin ɓe. do'u kalluɗo haa nokkuure mum.

¹³ Nder mbulwuldi uw mooɓgal maɓɓe fuu, maɓɓu ɓe fuu nder joonde maayɓe.

¹⁴ Nden kam min boo mi maŋgtete ngam baawal ma, ngam bee nyaamo ma a jaaloto.

¹⁵ Laar ngabbu ngu tagmi bana maaɗa. Bana nagge ngu nyaamrata huɗo hecco boo.

¹⁶ Laar no semmbe nder keeci maagu ɗuuɗiri, laar no kusel haa reedu maagu tekkiri.

¹⁷ Ngu ɗon saatina wicco bana leggal, ɗaɗi dawɗe maagu laati bana bamaaɗi cemmbiɗɗi.

¹⁸ I'e maagu ɗon caati bana njamndi, kosɗe maagu boo bana daŋraŋge njamndiije.

¹⁹ Kaŋgu woni kaayeefi caka tagle fuu, sey min tagɗo ngu he'i doolugo ngu.

²⁰ Haa kooseeje nyaamdu maagu iwata, haa nokkuuje ɗe'e kuuje ladde fuu pijata.

²¹ Haa waalorde les jaaɓe ngabbu waaloto, nder tolooje e waalowol ngu nyukkoto.

²² Leɗɗe jaaɓe bee ɗowdi mum'en cuddan ngu e leɗɗe haa maayo fuu ɗon taari ngu.

²³ Ndaa, to maayo ɗon ɓesdo, ngu diwnataa boo. Ngu ɗon de'i to ndiyam nasti ngu hunnduko.

²⁴ Moy wumnata gite maagu, naŋnga ngu? Moy tuufanto kine maagu tuuforgol?

²⁵ Ngilanŋgeewa, a dasan nga bee ngalum na? Ɗemŋgal maaga, a haɓɓan ngal bee ɓoggol na?

²⁶ Kine maaga, a haɓɓan ɗe bee bamol na? Haa nder galaŋgal mbaɗata nga jeeldu na?

²⁷ Kadi kaŋga nga toroto ma enɗam na? Nga wolwante koŋnguɗi ɗelemɗi na?

²⁸ Kadi a haɓɓan alkawal bee maaga, haa a heɓa nga huuwane haa foroy na?

²⁹ Noy? A fijan bee maaga bana bee collel na? Daande maaga, a haɓɓan nde bee ɓoggol, ngam haa ɓikkoy ma ndehoy keɓa ko koy pijira na?

³⁰ Loohotooɓe nga njahran nga haa luumo, geɓe geɓe, nga laato huunde filu na?

³¹ Laral maaga, a waawan yuwugo ngal bee labbo na? Hoore maaga, a waawan tufugo nde bee jaaral na?

³² Toonya nga bee yowugo juŋngo ma dow maaga nde woore tan! Fakat a meetataa ɗum sam!