Ayuba 35 - Fulfulde Bible

¹ Elihu tokki wolwugo, wi'i:

Elihu

² Kayya, Ayuba! Haala ma fotti na? A ɗon tammo a adiliijo yeeso Allah na?

³ Ngam a ƴami: “Ɗume ɗum nafi yam to mi laaɓɗono e hakke?”

⁴ Mi tammi jaabaago ma, an e sooba'en ma wonduɓe bee ma.

⁵ Ɓaŋgtu gite ma heedi asama, laar duule ɓaŋgiiɗe dow hoore ma!

⁶ Ɗume mbaɗata Allah bee hakke ma? Ɗuuɗki aybe ma waɗan mo asar na?

⁷ Ɗume ndokkata Allah bee laaɓki ma? Malla ɗume o jaɓi haa juŋngo ma?

⁸ Yimɓe bana maaɗa tan hakke ma naawnata, mbooɗeeŋga ma nafan sey ɓii-Aadama.

⁹ Ngam ɗuuɗeeŋga ɓillaaje ɓe mboyata, baawɗe mawɓe, ngam maajum ɓe ngookata.

¹⁰ Ammaa walaa ƴamanɗo toy tagɗo mo, mo hokkata mo gime koo jemma boo.

¹¹ Kaŋko hokkata anndal e faamu fuu, haa en ɓuri dabbaaji e colli fuu.

¹² To ɓe ngooki boo, Allah jaabataako, ngam mawnitaare halluɓe.

¹³ Tornde meere! Allah Baawɗo saloto nanugo nde, o hakkilantaako ɓe.

¹⁴ Koo nde mbi'ɗa a waawataa yi'ugo mo, haala fuu ɗon haa maako. Sey ndeena mo!

¹⁵ Ngam ɓernuki maako fiyaay tawon, a ɗon tammi o laarataa kalluɗum.

¹⁶ Ngam daliila man maɓɓititɗa hunnduko, a ɗon ɗuɗɗina bolle meereeje.