Ayuba 34 - Fulfulde Bible

Elihu gooŋɗini Allah

¹ Elihu tokki wolwugo, wi'i:

Elihu

² Onon hikma'en, keɗite bolle am! Onon annduɓe, noppi mon nanammi!

³ Nofru neɗɗo ɗon senndira bolle fuu, bana hunnduko mettorto nyaamdu fuu.

⁴ Sey en cenndira jonta ko fotti, caka meeɗen en keɓtu ko wooɗi.

⁵ Ndaa nii Ayuba wi'i: “Mi adiliijo, ammaa Allah kam sottini gooŋgaaku am.

⁶ Koo mi gooŋɗuɗo, kaŋko o fewnatam, meere non mi juwaaɗo, mi nyawndataa sam.”

⁷ Neɗɗo moye ɗon nanndi bee Ayuba? Bana ndiyam o yardata yawaare.

⁸ O ɗon tokkodo laawol bee aybuɓe, o ɗon yaha nder kawtal bee halluɓe.

⁹ Ngam o wi'i: “Ɗum nafataa neɗɗo sam, to o ɗaɓɓiti yerduye Allah tan.”

¹⁰ Onon marɓe hakkiilo on nanammi! Kadi Allah ɗon waɗa zunuuba na? Kadi Allah Baawɗo ɗon sottina gooŋgaaku na?

¹¹ O ɗon warjo koo moy fodde kuuɗe mum, o ɗon hiito koo moy fodde laabi mum.

¹² Gooŋga, Allah waɗataa zunuuba sam, walaa sottingo gooŋgaaku haa maako sam.

¹³ Moy laamini Allah dow lesdi? Moy halfini Allah duniyaaru?

¹⁴ Ndaa, to Allah oo numani hoore mum, naŋgti poofɗe e Ruuhu haa ɓernde mum,

¹⁵ nden kam ɓalli fuu njaawanan maayugo, koo moy fuu boo loroto haa mbulwuldi.

¹⁶ To a mari hakkiilo, a nana! Sey a heɗito boo ko mi wi'ete:

¹⁷ Ganyɗo gooŋga kam waawan ɗowugo yimɓe na? An a aybinan Baawɗo, Adiliijo na?

¹⁸ Kaŋko tan wi'ata laamiiɗo: A meereejo! Haa mawɓe boo: “On halluɓe!”

¹⁹ O ɓurnataa koo gooto nder tedduɓe, o ɓurnataa diskuɗo dow laafuɗo. Ngam kaŋko tagi ɓe fuu.

²⁰ Nden ɓe maaya law, caka jemma. Yimɓe ndiwnan, toonyooɓe fuu majjidan, koo to juŋngo meemaay ɓe, ɓe kalkidan.

²¹ Gite Allah ɗon ayna yahdu ɓiɓɓe Aadama, o ɗon yi'a ko ɓe mbaɗata.

²² Walaa nyiɓre koo ɗowdi ɓaleeri boo ngam haa baɗɗo zunuuba fuu nyukko.

²³ O maraay haaje linyugo goɗɗo hiddeko o ewno mo yeeso kiita.

²⁴ Bilaa linyuki, o ɓortan marɓe baawɗe, haa pellel maɓɓe, o jo'inan woɗɓe feere.

²⁵ Kuuɗe maɓɓe, fakat Allah anndi ɗe, Allah hippan ɓe jemma, o nama ɓe.

²⁶ Allah maaran ɓe fuu bana halluɓe caka wuro, haa yimɓe fuu ngi'a ɓe.

²⁷ Ngam ɓe celi, ɓe acci tokkaago mo, ngam ɓe kakkilanaay laabi maako fuu.

²⁸ Haa ɓe ngerɓi laafuɓe wookango mo, Allah nani gookaali man, walli ɓe.

²⁹ To o sirwake, moy foti felugo mo? To o wiirnake, moy heɓata yi'ugo mo? Ammaa Allah men suklanto yimɓe fuu,

³⁰ ngam taa gejjititɗo mo heɓa laamu sam, taa o nastina yimɓe nder hakke sam.

³¹ Ammaa to goɗɗo wi'i Allah: “Mi aybuɗo, mi meetataa waɗugo halleende fahin,

³² hakkeeji ɗi mi waawaay anndugo, hollam ɗum. Halleende nde mbaɗmi, mi meetataa waɗugo ɗum.”

³³ Allah warjo mo deydey numo maaɗa na? Ngam a sali, a wudini haala ka'a. Jonta suɓ, an, naa ɗum haala am. Ko a numata, yeccam ɗum, anndinam!

³⁴ Marɓe hakkiilo non boo hikma'en nanɓe yam, mbi'atam:

³⁵ “Walaa anndal nder koŋnguɗi Ayuba, bolle maako ɗe'e, ɗe paataaɗe.”

³⁶ Sey Ayuba foonde haa yotto kaakaadi man, ngam o jaabi bana halluɓe njaaborto.

³⁷ Dow hakke maako, o ɓesdi tuurtol, o hallini Allah bee bolle maako ɗuuɗɗe, o aawi seko caka meeɗen.