Ayuba 30 - Fulfulde Bible

Ayuba woyi sarru muuɗum jontaawu

¹ Ammaa jonta, sukaaɓe ɓe mi ɓurdi duuɓi ɗon njalammi, Mi laaraay baabiraaɓe maɓɓe heƴiiɓe hawtaneego dawaaɗi am haa tokkere.

² Walluru nduye ndeenanmi diga juuɗe maɓɓe? Ngam kamɓe ma semmbe maɓɓe timmi.

³ Daliila sooynde e weelo ɓe tampuɓe, ɓe ɗon tefa ko nyaame haa harde, nder ladde, nder yeeweende nde'e.

⁴ Ɓe teɓan haako lammuko kommbi wumre, bee ɗaɗi kaaɗɗi, ɓe nguurirta.

⁵ Yimɓe woɗɓe ɗon ndiiwa ɓe bee wookugo, bana koo moy wookirta dow wuyɓe.

⁶ Nder gaaruuji kulniiɗi ɓe njooɗoto, haa nder lowi kooseeje e nder gasɗe ton.

⁷ Ɓe ɗon koola nder guuɓe, caka gi'e fuu, ɓiɗɗotirɓe les gi'e boginaaje fuu.

⁸ Mooɓre meere'en non, ɓe ngalaa inɗe boo, ɓe riiwaaɓe bee ɓoccol yaasi lesdi.

⁹ Ammaa jonta, jancoore laataniimi ɓe, mi taalirteeɗo caka yimɓe ɓe'e.

¹⁰ Mi ganyniiɗo haa maɓɓe, ɓe ɗon ndaayo yam, ɓe ɗon tuutammi haa yeeso, ammaa ɗum ɓillataa ɓe sam.

¹¹ Allah fiisti lagaawal am, o leesni yam, bilaa naŋgtaare, ɓe ɗon toonyo yam.

¹² Mooɓre ummanake yam, ɗon dasa kosɗe am, ɓe ɗon taaskani kippol haa ɓe kalka yam.

¹³ Ɓe ɗon ta'ammi laawol, taa mi daɗa sam, ɓe ɗon kawta ngam timmitingo sarru am.

¹⁴ Ɓe ɗon caloro ceekgol, ɓe ɗon njaɓa gibbe, ɓe ɗon ngara dow am.

¹⁵ Kultoreeŋgol ɗon ummo, ngol ɗon naŋngammi, bana henndu, non tedduŋgal am dilliri, bana ruulde, non kisndam am fuu majjiri.

¹⁶ Kadi jonta ɓadiimi keerol ngeendam am, nyalɗe fuu mi ɗon torro bee mettamɓeram.

¹⁷ Nder jemmaaje fuu, i'e am ɗon naawammi, naaworlaaji toonyooji ciwtataako sam.

¹⁸ Juŋngo Allah ɗon jogi ngapaleewol am, o ɗon ɗeɗɗammi bana daande limce am.

¹⁹ Allah hoo'i yam, sakkini yam nder loope, haa mi nanndi bee ndoondi e mbulwuldi.

²⁰ Mi ɗon wookane – an a jaabaaki yam, mi ɗon dari yeeso ma, ammaa an, a laaraay yam sam.

²¹ Ndaa, a wayli, a laati toonyotooɗo yam, ngam bee juŋngo ma saatuŋgo a ɗon honammi.

²² Haa dow henndu a ɗon ɓaŋgtammi, a ɗon wa'inammi, nder hoolo duluuru man a ɗon halkammi.

²³ Mi anndi a ɗon yahrammi haa maayde, haa nokkuure nde marɓe yoŋki fuu mooɓoyto.

²⁴ An a ukkanto tampuɗo do'iiɗo na? Goɗɗo nastuɗo halkere ƴamata ballal na?

²⁵ Naa mi boyduɗo bee nastuɗo ɓillaare na? Naa joonde talakaajo ɓilli yam foroy na?

²⁶ Mi tammino mi heɓan hayru, sarru tawmi. Mi heɗi annoora, mi heɓi nyiɓre.

²⁷ Jonta ɓernde am saklake, de'ataa sam, nyalɗe ɓilluki ɓaditi, ɗe njottake yam.

²⁸ Mi ɗon yaha nder nyiɓre, walaa naaŋge, yeeso jama'aare mi daroto ngam wookugo.

²⁹ Cuuli ladde laati deerɗiraaɓe am, non boo dabbi laati soobiraaɓe am.

³⁰ Laral ɓanndu am furɗiti, ngal ittoto, jonte ukkani i'e am, ɗon ngula ɗe.

³¹ Gimi moolooru am ngayli, laati bojji, algaytaaru am boo fuɗɗi yooynugo.