Ayuba 28 - Fulfulde Bible

Maŋgtoore hikma

¹ Woodi pellel ngam wasugo cardi, non boo pellel ngam lallugo kaŋŋe.

² Nder lesdi ɓe ngurtinta njamndi, caka kaa'e boo njamndi mboɗeeri.

³ Ɓe ɗon nastina jayŋgol nder nyiɓre, ɓe ɗon mbiɗito kaa'e gonɗe nder lugguɗum maare, nder nyiɓre ɓaleere.

⁴ Ɓe ɗon ngasa haa yaasi berniiji, haa saalotooɓe meeɗaay tokkaago, ɓe ɗon ɓili haa ɓoggol nder ngaska.

⁵ Nyaamdu yimɓe ɗon fuɗa dow lesdi, ammaa nder maari yimɓe ɗon ngasa, ɓe ɗon ceeka ndi bana bee yiite.

⁶ Kaa'e maari ɗum pellel safira, ton ɓe tawata ngabboy kaŋŋeeri.

⁷ Laawol yahugo ton, dutal yi'aay ngol, koo colli mawɗi keɓtaay laawol maajum sam.

⁸ Kuuje ladde njahataa dow maagol, koo mbarooga saalaaki dow maagol.

⁹ Juŋngo neɗɗo ɗon seeka tapaaje, o ɗon wasa, ɗon hippa kooseeje.

¹⁰ Nder kooseeje o wasata laabi, ko gite maako ngi'ata fuu, marɗum saman.

¹¹ O ɗon sukka ɓulduɗe ceeɓooje, haa o wurtina kuuje cuuɗiiɗe.

¹² Ammaa toy tagu tawata hikma? Malla toy woni iwde hakkiilo?

¹³ Walaa annduɗo saman hikma, ka tawataake haa yimɓe duniyaaru.

¹⁴ Luggeeŋga ɗon wi'a: “Walaa haa ɗo”, mbeela boo ɗon wi'a: “Nder am boo ka walaa.”

¹⁵ Ka waawataa soodeego bee kaŋŋe, walaa mo soodata hikma bee cardi.

¹⁶ Kaŋŋe Ofir he'aay coggu maaka, non boo onikis malla safira.

¹⁷ Ka nanndintaake bee daarorgal laaɓŋgal, ka sannjataako bee fawne kaŋŋeeri,

¹⁸ sakkomaa bee murjamje e ciralle, saman maaka ɓuri luuluuje.

¹⁹ Ka nanndintaake bee tupas Etiyopiya, koo kaŋŋeeri he'aay coggu maaka.

²⁰ Kadi hikma, haa toy ka iwi? Malla toy woni iwde hakkiilo?

²¹ Ka ɗon suuɗani yiitere neɗɗo, koo colli piirooji ngi'aay ka.

²² Waade e pellel halkere mbi'an: “Haala maajum, min nani ka.”

²³ Allah tan anndi laawol maaka, kaŋko tan anndi haa ka tawete.

²⁴ Kaŋko yi'ata keeri duniyaaru e kuuje gonɗe les asama fuu.

²⁵ Nde o ta'ana henndu teddeeŋga, nde o foondana mbeela luggeeŋga,

²⁶ nde o waɗana iyeende umroore, nde o seekana ma'ere laawol,

²⁷ saa'i maajum o wiɗiti hikma, Allah yerdi ka, hokki ka joonde.

²⁸ Nden o wolwani neɗɗo, o wi'i: “Hulugo Allah, ɗum hikma! daayaago aybe boo woni hakkiilo.”