Ayuba 22 - Fulfulde Bible

Elifas aybini Ayuba

¹ Nden Elifas Temaniijo wi'i:

Elifas Temaniijo

² Woodi neɗɗo mo nafata Allah na? Hoore maako kakkilɗo nafata!

³ To a laaɓɗo, ɗum saman haa Allah Baawɗo na? To a adiliijo, ɗum riba haa maako na?

⁴ Allah ɗon fele ngam a ɗon hula mo na? O ɗon hiite ngam adilaaku ma na?

⁵ Naa non sam! Ngam ɗuuɗal halleende ma, ngam hakkeeji ɗi mbaɗata ɗi limataake.

⁶ Meere non njaɓɗa jawdi haa bannda'en, an a ɓorti koo sooya-ɓornuce'en.

⁷ A yarnaay goɗɗo tampuɗo ndiyam ma, a salani beelaaɗo nyaamdu ma.

⁸ Marɗo baawɗe tan marata lesdi, goɗɗo tedduɗo heɓan jooɗaago ton.

⁹ Juŋngo sooko a riiwi rewɓe yurumɓe, ndaa, a sali koo tornde atiime'en.

¹⁰ Ngam maajum tuuforli taarake ma koo toy fuu, kulol naŋngi ma, a ɗon diwna.

¹¹ Nyiɓre hulnete, walaa ko ngi'ata, ilam mawɗam ɗon wara dow hoore ma.

¹² Allah ɗon jooɗi haa asama! Laar no koode ɓaŋgiiɗe boo towri!

¹³ An a wi'i: “Noy Allah oo anndirta? Kiita maako ɗon saalo nder duule na?

¹⁴ O yi'ataa, ngam duule ɗon mbiirna mo. O ɗon waanca, ɗon taaro nder asama.”

¹⁵ Kay! A tokkoto laabi ɓooymaaji, ɗi waɗɓe zunuuba fuu tokki na?

¹⁶ Ɓe mbiftaama diga wakkati siwaa sam, bana caɓɓaaje ɗe maayo ilnata.

¹⁷ Ɓe ɗonno mbi'a Allah: “An, daaya min! Ɗume Allah Baawɗo oo waawata waɗugo min?”

¹⁸ Naa kaŋko hokki ɓe risku na? Ammaa nufaye halluɓe daayi mo.

¹⁹ Adili'en ceyorto do'ere halluɓe, non boo laaɓɓe ngi'an nde, njala ɓe.

²⁰ Walaa seko sam, wanyɓe ɓe kalkidi, jawdi maɓɓe boo, yiite nyaami ndi.

²¹ Sey a narra bee Allah, nden a heɓan jam, nii keɓtirta hayru ma naane.

²² Jaɓ ekkitinol ngol o ekkitinte, jaɓ koŋnguɗi maako haa ɓernde ma.

²³ Sey a lortano Baawɗo, sey a daayna halleende e saare ma, haa joonde ma warta bana naane,

²⁴ a sakkina kaŋŋe fuu haa mbulwuldi, kaŋŋe Ofir boo caka kaa'e nder maayo.

²⁵ Allah Baawɗo laatoto kaŋŋe ma, kaŋko laatoto cardi ma.

²⁶ Sey haa Baawɗo tan seyo ma iwoyta, heedi Allah a ɓaŋgtata yeeso ma.

²⁷ A toro mo, o jaɓan tornde ma, nden hebbitin togayeeje ɗe a togi.

²⁸ To a nufake huunde, nde laatoto, jayŋgol maako yaynanan laabi ma.

²⁹ Koo moy mawniti, Allah ɗon leesna ɗum. Koo moy yaŋkini hoore mum, Allah hisnan ɗum.

³⁰ Nde nii Allah ɗon hisna laaɓɓe diga halleende, o hisnete to juuɗe ma laaɓɗe.