Ayuba 21 - Fulfulde Bible

Hayru kalluɗo

¹ Ayuba jaabi:

Ayuba

² Naneeɗam, keɗite bee hakkiilo ko mi yiɗi wolwango on, ɗum he'an ngam de'itingo yam.

³ Duŋaneeɗam mi wolwa, ɓaawo maajum on tokko bee jancugo.

⁴ Kadi mi ɗon siŋka dow yimɓe na? Sooynde munyal am walaa daliila na?

⁵ Ndaareeɗam, nden kam on cakloto, on mbaɗan juŋngo dow hunnduko.

⁶ Min boo, to mi numi ko heɓi yam, mi hultoran, mi diwnan.

⁷ Koni halluɓe ngeeɗata? Koni semmbe maɓɓe ɗon ɓesdo, ɓe ɗon ndottida?

⁸ Ɓe njooɗoto jam bee ɓiɓɓe maɓɓe, ɓe ngi'an koo ɓiɓɓe ɓiɓɓe maɓɓe boo.

⁹ Ɓe ɗon njooɗi jam nder ci'e maɓɓe, walaa kulol sam, masiibo boo warataa dow maɓɓe.

¹⁰ Kalhali ɗon ndimna, non na'i boo ɗon ndima, ndootataa sam.

¹¹ Halluɓe ɓe'e ngurtinan ɓikkoy bana tokkere, derke'en ngaman.

¹² Ɓe ngiman bee mbaggu e moolooru, haa hoolo algayta ɓe ceyoto.

¹³ Bee hayru ɓe nyallirta balɗe fuu, bee jam ɓe ɗon nasta joonde maayɓe boo.

¹⁴ Ɓe mbi'an koo Allah boo: “Daaya min, min ngalaa haaje anndugo muuyo ma.

¹⁵ Moy Baawɗo kadi, haa min tokko mo? Ko nafata min haa min toro mo?”

¹⁶ Asee boo, hayru maɓɓe wonaay haa juuɗe maɓɓe! Nufaye halluɓe daayake yam!

¹⁷ Kay, nde noy Allah nyifi jayŋgol halluɓe? Malla ndey o ukkani ɓe halkere? Kadi ndey o hiiti ɓe bee ɓernuki?

¹⁸ Ndey ɓe meeɗi laataago bana tiitiiho, bana nyaande nde henndu maako saatundu ruuyni ɗum?

¹⁹ Allah siganto ɓiɓɓe kiita aybe baaba na? Sey o hiito mo, kaŋko baɗɗo aybe, haa o maata ɗum!

²⁰ Kalluɗo laarana yiitere mum kiita majjere mum, sey o maata ɓernuki Allah Baawɗo.

²¹ To o maayi, ko yaali mo bee saare boo, to o timmini limgal lebbi maako fuu?

²² Goɗɗo anndinan Allah muuɗum anndal na? Naa ɗum kaŋko hiitoto ɓaŋgiiɓe na?

²³ Goɗɗo maayan bee semmbe muuɗum keewɗe, o ɗon jooɗi bee jam, o walaa ɓilla.

²⁴ O ɗon fayi, buttuli maako keewi ɓellere, bee mbosam i'e maako soofiri.

²⁵ Oya maayan bee laskal ɓernde, bilaa mettaago hayru sam.

²⁶ Nder mbulwuldi ɓe mbaaloto ɓe ɗiɗo fuu, saa'i maajum, gilɗi cuddan ɗiɗo fuu.

²⁷ Ndaa, bee laaɓɗum mi anndi ko numoton, miccayeeji ɗi on mbaɗata ngam aybingo yam.

²⁸ On ɗon mbi'a: “Toy saare goɗɗo mawɗo oo? Toy laymaaru ndu kalluɗo oo jooɗino?”

²⁹ On meeɗaay ƴamugo wartuɓe jahaaŋgal na? On nanaay kubaruuji ɗi ɓe ngaddi na?

³⁰ Goɗɗo kalluɗo daɗan nyalaade halkere, nyalaade tikkere Allah, o heɓan hisrude.

³¹ Moy aƴata wi'go mo bee baŋguɗum o kalluɗo? Moy warjoto halleende nde o waɗi?

³² To o maayi, ɓe uwan mo, nden ɓe aynan yenaande maako booɗɗum.

³³ Ɓoɗe ngaska man cuddan mo bee hakkiilo. Yimɓe ɗuuɗɓe tokkoto waade maako haa pellel man, non boo aartuɓe yeeso limataake sam.

³⁴ Kay! On mbaɗi yam de'itinki meere non. Walaa gooŋga, sey rikici nder bolle mon!