Ayuba 18 - Fulfulde Bible

Ko heɓata kalluɗo

¹ Nden Bildad Suhiijo wi'i:

Bildad Suhiijo

² Haa ndeye a accata hoolo bolle ɗe'e? A jeeɗo, a numa, ngam haa min mbolwane.

³ Kadi a ɗon nanndina min bee dabbaaji na? Koni ndaarata min bana min faataaɓe?

⁴ Bee tikkere ma, a ɗon naawna hoore ma. A tammi ngam maaɗa duniyaaru ferwan na, hooseere sottan haa pellel muuɗum na?

⁵ Fakat, Allah nyiɓɓinan jayŋgol kalluɗo, nden yiite haa saare maako meetataa yaynugo.

⁶ Jayŋgol haa suudu maako laatoto nyiɓre, ngam pittirla ngonka dow maako nyifan.

⁷ Palanɗe maako cemmbiɗɗe puɗɗan rammugo, dabare sawari maako do'an mo.

⁸ O tokkoto laawol, o nasta zubaawol, o waancan haa yaasi, o meema piɗitol.

⁹ Nder tuuforgol, teppere maako jomoto, zubaawol boo yiifoto mo.

¹⁰ Haa lesdi ɓoggol naŋnganŋgol mo suuɗoto, haa laawol maako tuuforgol maako nyukkoto.

¹¹ Bakeeje fuu kuuje kulniiɗe kulnan mo, koo toy ɗe ɗon tokko palanɗe maako fuu.

¹² Laatinooɗo cemmbiɗɗo go, ndaa, o beelaaɗo, sarru taari mo bakeeje fuu,

¹³ sarru nyaaman laral maako, nde nyaaman juuɗe e kosɗe maako.

¹⁴ Ɓe ndiiwan mo diga saare nde o wonno nder de'ere, ngam yahrugo mo haa laamiiɗo waade.

¹⁵ Nder saare maako, jananɓe njooɗoto, kibiriita ɓe camminta haa saare maako fuu.

¹⁶ Haa les, ɗaɗi maako fuu puɗɗi yoorugo, haa dow, lice maako boo puɗɗi ɗaylugo.

¹⁷ Haa lesdi fuu ciftorki maako nattidan, haa saare e haa wuro, o walaa innde sam.

¹⁸ O wurtinte jayŋgol, o nasta nyiɓre, ɓe ndiiwan mo daayiiɗum diga duniyaaru.

¹⁹ O accataa danygol nder ummaatoore sam, walaa luttanɗo bee yoŋki haa saare maako.

²⁰ Hiirnaaŋge'en ndiwnan ngam nyalaade maako nde'e, jooɗiiɓe fuunaaŋge boo, kulol naŋngan ɓe.

²¹ Ndaa, kanjum ɗum ukkanto goɗɗo kalluɗo, non kiita keɓanka caliiɗo Allah.