Ayuba 17 - Fulfulde Bible

¹ Poofɗe am ɗon ta'a, balɗe am ɗon timma, yenaande taaskanake yam.

² Jancooɓe tan ɗon taari yam. Daliila kuudi maɓɓe, mi waawataa ɗaanaago.

³ Useni yaa Allah, soottam! To naa an, moy jaɓata daranaago yam?

⁴ A haɗi ɓerɗe maɓɓe faamugo, jonta haɗ humaki'en jaalaago boo.

⁵ Bana cennduɗo keɓal mum bee sooba'en saa'i weelo ɗon tampina ɓiyiiko'en,

⁶ non mi laatanake yimɓe woɗɓe nyidduɗo, ɓe ɗon tuutammi tuuɗe haa yeeso.

⁷ Gite am ngi'ataa booɗɗum, mettamɓeram wonni ɗe, terɗe am fuu tampi.

⁸ Ngam daliila man gooŋga'en fuu mbemmboto, sooyɓe aybe fuu ndaaratam mi kalluɗo.

⁹ Ammaa adiliijo tabitan dow laawol mum, goɗɗo laaɓa-juuɗeejo ɓesdan semmbe mum.

¹⁰ To on ngari on fuu, on mooɓti yeeso am, mi tawataa hikmaajo caka mooɗon sam.

¹¹ Balɗe am njinni, nufooji am nattinaama, mi heɓaay ko ɓernde am yenwi.

¹² Ɓe ɗon mbi'ammi: “Jemma ɗum nyalawma non, jayŋgol ɗon ɓadi ma”, alhaali boo nyiɓre ɗon tawon.

¹³ Joonde maayɓe tan laatoto waalordu am, haa nder nyiɓre tan mbaɗanmi be'itte am.

¹⁴ Heedi nyolɗum mbi'anmi: “A baaba am”! Heedi gilɗi: “A daada am e adda am!”

¹⁵ Kadi, toy tammunde am woni? Moy ɗon yi'a tammunde am fahin?

¹⁶ Kayya! Tammunde man ɗoftatam nder joonde maayɓe. Mi nastidan bee maare nder mbulwuldi.