Ayuba 14 - Fulfulde Bible

Ayuba tinndini dammuki ngeendam

¹ Koo moy neɗɗo, to daada mum danyi ɗum, balɗe mum ɗuuɗataa, cakle ɗuuɗɗe ɗon.

² Bana pinndi o fuɗa, o ɗayla, o ɗon saalo law bana ɗowdi, o duurataa.

³ Irin maako a accataa hakkilango mo, a ɗon yahra mo kiita bee maaɗa.

⁴ Moy waawata wurtingo huunde laaɓnde diga huunde soɓnde? Walaa koo goɗɗo.

⁵ Ndaa, a ta'ani neɗɗo nyalɗe mum, lebbi maako limaaɗi, an waɗi ɗum, o waawataa ƴaɓɓaago keerol man.

⁶ Accu ɓillugo mo, hokku mo fooftere, o seyo bana goɗɗo kuuwoowo timminɗo kuugal muuɗum.

⁷ Lekki koo kiye fuu mari tammunde, ngam ki wilitan, koo to ɓe pe'i ki, lice kecce boo puɗan haa tuggere.

⁸ Ɗaɗi maaki to nduuri nder lesdi kam, koo to tuggere waati nder ngesa man,

⁹ to ɗum mettake ndiyam, ɗum hesɗitan, bana fuɗŋgo jubaaŋgo ɗum wilitan.

¹⁰ Ammaa neɗɗo, to maayi, ɗum timmi non. Nde poofɗe maako timmi, toy mo kadi?

¹¹ Teema nyalaade woɗnde, beeli fuu ɓeeɓoto, maaje boo njooran.

¹² Ammaa maayɓe fuu ummitittaako sam, saa'i asama ɗon, ɓe pinataa sam, walaa maayɗo pinanɗo diga ɗoyŋgol mum.

¹³ Ko mi yiɗi kam: Suuɗam haa joonde maayɓe, nyukkam ton haa to ɓernde ma feewti. Ta'anam wakkati ki ciftortaami.

¹⁴ Kadi ɓii-Aadama yeeɗitan to maayi na? Sey mi reena, mi munyana torraaji, haa to nyalɗe ɓuranɗe hoygo ngari.

¹⁵ Saa'i maajum a ewno yam, mi jaabo ma, nden a tefan yi'ugo kuugal juuɗe ma.

¹⁶ Saa'i maajum a suklanto palanɗe am, nden a acca boo suklanaago hakkeeji am.

¹⁷ Haa nder booro a maɓɓata tuurtol am, a yaafoto hakkeeji am.

¹⁸ Ammaa ndaa, koo hooseere boo nde yibbinte, sampititto, koo tapaaje tabitɗe boo ɗe cottinte.

¹⁹ Ndiyam ɗon nyaamta kaa'e caatuɗe, loope lesdi boo, ilam iyeende ilnan ɗe, non boo tammunde neɗɗo, an a halkan nde.

²⁰ A do'an mo haa lesdi, o dilla a wonnan mo yeeso, nden a riiwan mo.

²¹ Ɓiɓɓe maako teddinaama, o anndaa sam malla boo ɓe leestinaama, o maatataa ɗum sam.

²² Sey torraaji nder ɓanndu maako naawata mo, sey ngam maako tan ɓernde maako sunoto.