Ayuba 13 - Fulfulde Bible

Ayuba gooŋɗini kuuɗe muuɗum

¹ Ndaa, gite am ngi'i ɗum fuu kadi, noppi am nani e faami ɗum.

² Ko on anndi fuu, min boo mi anndi, mi sakkitaaki ɓaawo mooɗon boo.

³ Ammaa min, haa Baawɗo ngiɗmi wolwango, haa maako boo mbaŋginanmi hujja am.

⁴ On cuddi faataare bee pewe tan, on fuu on hurgooɓe ɓe anndaa koo ɗume sam!

⁵ Asee, to on naŋgtuno ɗemɗe mon, ɗum waŋginanno on hikma'en!

⁶ On nana hujja am, on keɗito bolle seedamku am.

⁷ Bee pewe on mballirta Allah na? On laati fewooɓe ngam maako na?

⁸ On ndaroto wakeere maako na? On ceedanto Allah haa kiita na?

⁹ Ɗum fottanan on to o wiɗiti on na? On cargan mo bana ɓe cargirta neɗɗo na?

¹⁰ Fakat o felan on bee caatal, ngam on ɗon cenndindira yimɓe nder cuuɗiiɗum haa kiita.

¹¹ Bee maŋngu maako o hulnirta on, bee baawɗe maako o diwnirta on.

¹² Ndaa, balndi mon nanndi bee ndoondi, gaabi mon fuu ngalaa semmbe bana mahdi loope.

¹³ Sey on njeeɗo, on nana ko mbolwanmi, ko waɗata fuu waɗa.

¹⁴ Ndaa, mi taaskake jootingo koo ngeendam am, haa nder newre am kalfinanmi yoŋki am.

¹⁵ Koo to o mbari yam ma, kaŋko mi hooloto, haa mi gooŋɗina laabi am yeeso maako.

¹⁶ Ammaa kanjum ɗum laatanto yam kisndam: Ngam naafikiijo aaƴataa wargo yeeso Allah sam.

¹⁷ Sey on nana, on keɗito haala am, paame ko mi faamtinta.

¹⁸ Ndaare, mi taaskake waŋgingo hujja am. Mi anndi min mari gooŋga.

¹⁹ Moy yiɗi wullaago yam kadi? Nden kam mi jeeɗoto, mi taaskanto maayde am.

²⁰ Allah am, faddam diga kuuje ɗiɗi ɗe'e, nden mi accan nyukkaago yeeso ma:

²¹ Ittanam juŋngo ma teddananŋgo yam, kultoreeŋgol ma boo, ngam taa ngol hulnammi.

²² Ɓaawo maajum a ewno, min mi jaaboto malla min boo mi ƴama, an a jaaboto.

²³ Noy limgal aybeeji am e boofi am? Kadi anndinam tuurtol am e hakke am.

²⁴ Ɗume waɗi haa cuuɗana mi yeeso ma, haa a laarammi bana mi konneejo ma?

²⁵ Ɗume ngiɗɗa? A taasna kuɗel joorŋgel na? Malla haakoyel meereyel a riiwata?

²⁶ A winndi bolle caatuɗe dow am ngam do'ugo yam kiita, a limani yam boofi nderkaaku am.

²⁷ Callalluuji a haɓɓata haa kosɗe am, a ɗon wiɗito kuuɗe am e laabi am, koo batteeji palanɗe am boo.

²⁸ Bana leggal nyolanŋgal, bana limce ɗe mooƴi nyaami, mbonni ɗum non neɗɗo timmirta.