Asta 4 - Fulfulde Bible

Mardokay nufi hisnugo Yahuudu'en

¹ Nde Mardokay nani haala man fuu, o seeki limce maako, o ɓorni limce buhuuje, o rufi ndoondi dow hoore maako. Nden o yehi nder berniwol, o ɗon woya bee sawtu,

² haa o ɓadi yolnde laamiiɗo, ngam ɓorniiɗo limce buhuuje duŋanaaka nastugo nder maare.

³ Nder lesdi koo ndiye, haa umroore laamiiɗo nde'e yotti fuu, suno maŋngo ukkani Yahuudu'en. Ɓe cuumi, ɓe mboyi bee gonɗi, ɗuuɗɓe mbaali dow buhuuje e doɗɗe.

⁴ Horɓe e sortaaɓe Asta, debbo laamiiɗo ngari, anndini mo haala man. O sakli masin, o neldi Mardokay limce ngam haa o itta limce buhuuje maako, o ɓorno ɗe, ammaa o sali.

⁵ Nden Asta ewni Hatak, gooto nder sortaaɓe mo laamiiɗo umri ɗum huuwango mo. O neli mo haa Mardokay ngam anndugo ko waɗi mo e ngam ɗume o waɗi bana non boo.

⁶ Hatak yehi haa Mardokay, haa daldal berniwol yeeso yolnde laamiiɗo.

⁷ Mardokay yecci Hatak ko heɓi ɗum fuu. O anndini mo boo limgal cardi ndi Hamman iinino waddugo nder ndesaari laamiiɗo ngam mbarugo Yahuudu'en.

⁸ O hokki mo boo misaalu bataakewol umroore ngam nattingo Yahuudu'en, baŋgunooŋgol haa Suuza, ngam o holla ngol Asta, o umri mo o yaha haa laamiiɗo, o toro ɗum mo'ere, o seetto Yahuudu'en ummaatoore maako.

⁹ Hatak warti haa Asta, yecci mo bolle Mardokay.

¹⁰ Asta umri mo o lorto haa Mardokay, o wi'a mo:

¹¹ “Sukaaɓe laamiiɗo e yimɓe nder lesɗe laamiiɗo fuu anndi ɗu'um: Umroore haɗi koo moy gorko malla debbo nastugo daldal ɓadiiŋgal suudu laamiiɗo, sonaa to o ewnaama. Nastanɗo fuu o mbareteeɗo, sonaa to laamiiɗo forti sawru laamu ndu kaŋŋeeri dow maako hisni mo. Waɗi nyalɗe cappanɗe tati jonta, ɓe ewnaaki yam ngam haa mi yotto haa laamiiɗo.”

¹² Ɓe anndini Mardokay bolle Asta.

¹³ Mardokay lorni mo bee jaawaabu ni'i: “Taa tamma an feere ma a hisan caka Yahuudu'en fuu ngam a ɗon nder saare laamiiɗo.

¹⁴ To a jeeɗake nder saa'iire bana nde'e, ballal e kisndam iwanan Yahuudu'en haa nokkuure feere, ammaa an e saare baaba ma on kalkan. Moy anndi? Teema a heɓi nastugo saare laamu ngam saa'iire bana nde'e!”

¹⁵ Asta neldi mo jaawaabu ni'i:

¹⁶ “Yah, mooɓtu Yahuudu'en wonɓe haa Suuza fuu. Cuume ngam am, taa nyaame, taa njare nyalɗe tati, jemma bee naaŋge fuu. Min e horɓe am boo, min cuumoto. Nden mi yahan haa laamiiɗo, koo to ɗum luuti umroore. Koo to ɗum yahratam haa maayde boo, mi hasdi!”

¹⁷ Mardokay yehi, waɗi ko Asta umri mo fuu.