Amos 9 - Fulfulde Bible

Walaa mo hisata kiita Jawmiraawo

¹ Mi yi'i Jawmiraawo ɗon dari kommbi hirsirde. O umri: “Fiy dow ko'e daŋraŋge, haa caɓɓaaje maaje fuu dimmbo! Sampitit ɗe dow ko'e yimɓe fuu! To goɗɗo lutti, mi mbaran mo bee kaafahi, walaa mo daɗata, walaa mo hisata sam!

² To ɓe ceeki laawol nastugo joonde maayɓe, juŋngo am naŋngan ɓe ton. To ɓe mba'ake haa asama, mi jippinan ɓe diga ton.

³ To ɓe cuuɗake dow hooseere Karmel, mi ɗaɓɓitan ɓe, mi naŋnga ɓe ton. To ɓe nyukkake haa lugguɗum mbeela, mi umran mboodi ton ndi soppa ɓe.

⁴ To ɓe acci ko'e maɓɓe, ɓe njehi yeeso konne'en maɓɓe, mi umran kaafahi mbara ɓe. Mi hakkilanan ɓe ngam sarru, naa ngam hayru.”

⁵ Allah woni Jawmiraawo honooɓe asama. To o meemi lesdi, ndi majjan, jooɗiiɓe maari koo toy fuu cunoto. Ndi towtan, ndi leesta bana maayo Niil haa Misra.

⁶ O nyiɓi jooɗorde maako haa asama, daŋraŋge maare ɗon tabiti dow lesdi. O ɗon ewno ndiyamji mbeela, haa o waanja ɗi dow lesdi. Innde maako Jawmiraawo.

⁷ Jawmiraawo wi'i: “Onon Isra'iila'en, on laatani yam kal-kal bee Etiyopiya'en na? Naa min wurtini Isra'iila'en e lesdi Misra, Filisti'en e Kaftor, Siriya'en boo e Kiir na?

⁸ Ndaa, gite am ɗon ndaara laamu Isra'iila marŋgu hakke, mi halkan ngu, mi halkan ngu dow lesdi. Ammaa mi nattintaa danygol Yaakubu fuu.” Non Jawmiraawo wi'i:

⁹ “Ndaa, mi umran dimmbugo Isra'iila'en caka ummaatooje fuu, bana goɗɗo dimmbirta ceɗirgel, walaa kaa'el do'oto haa lesdi.

¹⁰ Koo moy marɗo hakke caka ummaatoore am, bi'ɗo: Sarru ɓaditittaako min, yottataako min, – fakat, o maayran bee kaafahi.”

Allah wo'itinan Isra'iila

¹¹ “Nyalaade man nyiɓtotoomi suudu Daawuda yibbunoondu. Mi sukka ceekli maaru, mi ummitina bille maaru. Mi nyiɓtoto ndu bana ndu wa'no.

¹² Nden ɓe maran luttuɓe Edoom e ummaatooje ɗe innde am ewna dow muuɗum'en fuu.” Min Jawmiraawo mi wi'i ɗum, mi waɗan ɗum boo.

¹³ Jawmiraawo wi'i: “Annde, nyalɗe ɗon ngara, haa codol neeɓa haa yotto wakkati remugo, ɓiɗɗol inabooje neeɓa haa yotto wakkati aawugo. Nden kam kooseeje fuu cimtan inaboojam, towndiije fuu keewan haa rufa.

¹⁴ Mi wartiran joonde yimɓe am Isra'iila'en bana naane, ɓe mahitan berniiji gibbuɗi, ɓe njooɗoto nder maaji, ɓe njuboto inabooje, ɓe njaran inaboojam maaje, ɓe mbaɗan jarne, ɓe nyaaman ƴaamle maaje.

¹⁵ Min mi tabitinan ɓe nder lesdi maɓɓe, walaa mo dahata ɓe nder lesdi ndi ndokkumi ɓe.” Non Allah Jawmiraawo mon wi'i.