Amos 3 - Fulfulde Bible

Kuugal annabiijo

¹ Onon Isra'iila'en, nane wolde nde Jawmiraawo wolwi dow mooɗon, dow yimɓe fuu ɓe o wurtini lesdi Misra. Ndaa nde:

² “Sey onon tan cuɓmi caka ummaatooje duniyaaru fuu. Ngam maajum kiitotoomi on ngam aybeeji mooɗon fuu.”

³ To yimɓe ɗiɗo narraay, ɓe njahdan na?

⁴ To mbarooga heɓaay ko nyaama, nga ubboto nder laynde na? To mbarooga cemmbiɗŋga faɗɗaay huunde, nga hoolan nder lowol na?

⁵ To ndabbaawa meemaay piɗitol, ngol fiɗan na? To tuuforgol naŋngaay sonndu, ndu yanan haa lesdi na?

⁶ To goɗɗo fuufi luwal konu, ummaatoore nder wuro hultortaa na? To sarru ukkanake wuro, naa ɗum Jawmiraawo ukki ngu na?

⁷ Allah Jawmiraawo waɗataa koo ɗume, sonaa o aarta o waŋgina sirriiji maako haa annabi'en jagganooɓe mo.

⁸ Mbarooga ubbi. Moy hulataa? Allah Jawmiraawo wolwi. Moy waɗataa annabaaku?

Kiita dow Samariya

⁹ Ngooyne haa cuuɗi cemmbiɗɗi nder Asdod e nder Misra habaru bana ni'i: “Mooɓe dow kooseeje taariiɗe berniwol Samariya. Ndaare torra makka e toonyaare haa caka maagol!”

¹⁰ Jawmiraawo wi'i: “Ɓe anndaa waɗugo ko fotti, sey hebbingo ndesaaji nder cuuɗi maɓɓe cemmbiɗɗi bee waɗugo toonyaare e jaɓtol.”

¹¹ Ngam maajum Jawmiraawo wi'i: “Konne'en taaroto lesdi. Ɓe ngibbinan cuuɗi mon cemmbiɗɗi, ɓe njaɓta ko woni nder laamorɗe mon.”

¹² Ndaa nii Jawmiraawo wi'i: “Bana gaynaako jaɓtirta kosɗe mbaalu ɗiɗi malla seɓatto nofru tan nder hunnduko mbarooga, bana non Isra'iila'en kisrata, kamɓe jooɗiiɓe haa Samariya haa sera leeso, dow be'itte ɗigguɗe.”

¹³ Allah Jawmiraawo, honooɓe asama wi'i: “Nane, mbaɗe seedamku dow yimɓe Yaakubu ni'i:

¹⁴ Nyannde kiitotoomi Isra'iila'en ngam aybeeji maɓɓe, mi hiitoto ɓe daliila kirsirɗe Baytila boo, mi fusan luwe hirsirde, ɗe njana haa lesdi.

¹⁵ Mi yibbinan cuuɗi ɗi laamiiɓe mon nyiɓi ngam taa gulɗum malla jaaŋgol ɓilla ɓe. Cuuɗi mahraaɗi bee nyii'e nyiibi, kalkan. Cuuɗi mawɗi boo nattan.” Non Jawmiraawo wi'i.