3 Yuhanna 1 - Fulfulde Bible

Fuɗɗoode

¹ Min ndottiijo, mi ɗon winndana soobaajo am Gayus mo ngiɗmi bee gooŋga bataakewol ngo'ol.

² Soobaajo am giɗaaɗo, mi ɗon yelano ma hayru nder koo ɗume fuu, a yamɗa bana no ɓernde ma boo ɗon ɓesdoro nder hayru.

³ Mi seyi masin nde deerɗiraaɓe ngari, ceedi gooŋga maaɗa, no a yeeɗiri nder gooŋga.

⁴ Walaa ko ɓuri seynugo yam bana nanugo ɓikkoy am ɗon ngeeɗa nder gooŋga.

Yuhanna mani Gayus

⁵ Soobaajo am giɗaaɗo, a ɗon huuwa bee gooŋgaaku ngam wallugo deerɗiraaɓe, koo jananɓe.

⁶ Kamɓe ceedi haala yiide maaɗa yeeso jama'aare nuɗɗinɓe. Ɗum wooɗan to a walli ɓe dow haaje jahaaŋgal maɓɓe bana ko fottanta Allah.

⁷ Ngam ɓe ɗon mbaɗa jahaaŋgal nga'al ngam Almasiihu, bilaa jaɓugo koo ɗume diga tampa-diina'en.

⁸ Enen boo, sey en njaɓɓo irin yimɓe ɓe'e, ngam haa en kuuwda bee maɓɓe nder kuugal nuɗɗinki.

Diyoterefes bee Demetiriyus

⁹ Woodi ko mi winndani jama'aare nuɗɗinɓe, ammaa Diyoterefes mo yiɗi laataago mawɗo nder jama'aare man, jaɓɓaaki min.

¹⁰ Ngam man, to mi wari, mi waŋginan kuuɗe ɗe o huuwi, waato pewe e bolle kalluɗe ɗe o wolwata dow amin. Naa kanjum tan, ammaa o jaɓɓataako deerɗiraaɓe to ɓe ngari, o ɗon haɗa yiɗɓe jaɓɓaago ɓe, o ɗon faarta ɓe diga jama'aare nuɗɗinɓe.

¹¹ Soobaajo am giɗaaɗo, taa tokka halleende, ammaa tokka mbooɗeeŋga. Baɗanɗo mbooɗeeŋga woni goɗɗo Allah, baɗanɗo halleende meeɗaay anndugo Allah.

¹² Yimɓe fuu ngerdi Demetiriyus. Koo fodde gooŋgaaku boo o booɗɗo. Nden minin boo min ɗon ceedo ɗum. A anndi seedamku amin, ɗum gooŋga.

Koofli ragareeji

¹³ Woodi kuuje ɗuuɗɗe ɗe mi yiɗi winndango ma, ammaa mi yiɗaa winndugo ɗe dow ɗereewol.

¹⁴ Mi tammi en ngiidan nii seɗɗa. En ngeewtidan hunnduko bee hunnduko.

¹⁵ Salaaman laatano ma! Soobiraaɓe ma koofni ma. An boo hoofnu soobiraaɓe meeɗen haa ton gooto gooto.