2 Timote 3 - Fulfulde Bible

Nyalɗe ragareeje

¹ Anndu, nder nyalɗe ragareeje, wakkatiiji caɗɗi laatoto.

² Ngam yimɓe laatoto yiɗɓe ko'e muuɗum'en, suunaaɓe ceede, jurotooɓe meere, mawnitittooɓe, wolwanɓe bolle kalluɗe, tuurtananɓe saaro'en muuɗum'en. Ɓe ngettataa koo moy, ɓe camɗintaa ceniiɗum sam,

³ ɓe marataa yiide, ɓe marataa enɗam, ɓe mbolwan kalluka dow woɗɓe, ɓe marataa naŋgtaare, ɓe saatuɓe, ɓe nganyan mbooɗeeŋga,

⁴ ɓe zammbotooɓe, ɓe gikkuma'en, ɓe keewi mawnitaare, ɓe ɓuri yiɗugo welwelo dow Allah.

⁵ Gite yimɓe, ɓe nanndi bee hulɓe Allah, ammaa gooŋga man kam, kulol Allah walaa nder maɓɓe sam. Daaya yimɓe ɓe'e!

⁶ Woɗɓe maɓɓe ɗon nasta cuuɗi yimɓe boo, ɓe ɗon naŋnga rewɓe humaki'en nder tuuforli maɓɓe. Rewɓe ɓe'e ɓe roondiiɓe hakkeeji maɓɓe ɗuuɗɗi, suunooji koo ɗiye dasi ɓe,

⁷ ɓe ɗon ekkito tum, ammaa ɓe mbaawataa anndugo gooŋga sam.

⁸ Bana no Yannes e Yamberes ndartani Muusa, bana non boo yimɓe ɓe'e ndartanto gooŋga. Hakkiilooji maɓɓe mbonnake, nder nuɗɗinki boo ɓe meere'en.

⁹ Ammaa ɓe keɓataa yahugo yeeso, ngam faataare maɓɓe waŋganan koo moy, bana faataare Yannes e Yamberes boo.

Wasuyeeji ragareeji

¹⁰ Ammaa an, a tokki ekkitinol am booɗɗum, non boo gikku am e anniyaaji am e nuɗɗinki am e munyal am e yiide am e dartaare am

¹¹ e toonyaaŋgeeji e boneeji ɗi njarmi haa Antakiya e Ikoniya e Listira. Toonyaaŋgeeji ɗiye mi munyanaay ɗum? Ammaa nder maaji fuu Jawmiraawo hisni yam.

¹² Yiɗɓe yeeɗugo bee kulol Allah nder kawtal bee Almasiihu Yeesu fuu, ɓe toonyeteeɓe.

¹³ Ammaa foroy halluɓe e hiilooɓe ɓesdan yahugo yeeso nder halleende, ɓe majjinan woɗɓe e ɓe majjinteeɓe kamɓe boo.

¹⁴ Ammaa an kam, sey a tokko daraago dow ko a ekkiti e ko a jaɓi bilaa seko. A anndi ekkitinɓe ma ɗum.

¹⁵ A anndi defte ceniiɗe diga a ɓiŋngel. Kanje ɗe mbaawan hokkugo ma hikma haa a heɓa kisndam bee nuɗɗinki nder Yeesu Almasiihu.

¹⁶ Ko winnda nder Deftere Allah fuu iwi haa Ruuhu Allah. Ɗum nafan ngam ekkitingo gooŋga, waŋgingo e wo'itingo aybeeji e eltugo goɗɗo nder laawol adilaaku,

¹⁷ ngam haa goɗɗo Allah laato taaskiiɗo timmuɗo ngam kuuɗe booɗɗe koo ɗeye.