2 Timote 2 - Fulfulde Bible

Soojeejo Almasiihu koolaaɗo

¹ An kam, ɓiŋngel am, semmbiɗiɗ nder mo'ere nde keɓɗen haa Yeesu Almasiihu.

² E ko nanɗa haa am yeeso seedooɓe ɗuuɗɓe, halfin ɗum yimɓe hoolaaɓe, waawanɓe ekkitingo woɗɓe.

³ Munyan bone bana am, bana soojeejo Yeesu Almasiihu koolaaɗo.

⁴ Walaa soojeejo suklanto kuuje goɗɗe, ngam o yiɗi jaagorɗo maako yerdo mo.

⁵ Non boo baɗoowo gala. To o ɗowtanaaki umrooje gala, o heɓataa keɓal jaalorgal.

⁶ Haandi demoowo torriiɗo ɗuuɗɗum aarta yimɓe nyaamugo ƴaamle ngesa muuɗum.

⁷ Numtu ko mbi'mi, ngam Jawmiraawo faamtinte koo ɗume fuu.

⁸ Siftor Yeesu Almasiihu, ummitiiɗo diga maayde, mo danygol Daawuda, fodde Linjiila ka ngaazinanmi.

⁹ Ngam daliila Linjiila ka'a mi ɗon munyana bone, koo jonta boo mi kaɓɓaaɗo bee callallu bana kalluɗo. Ammaa wolde Allah kam haɓɓaaka.

¹⁰ Ngam man mi ɗon munyana koo ɗume fuu daliila suɓaaɓe Allah, ngam haa kamɓe boo ɓe keɓa kisndam ngonɗam nder Yeesu Almasiihu e tedduŋgal duumiiŋgal.

¹¹ Ndaa wolde hoolniinde: To en maaydi bee maako, en ngeeɗidan bee maako boo.

¹² To en ɗon munyana bone, en laamoto bee maako boo. To en ngeddi mo, kaŋko boo o yeddan en.

¹³ To en laataaki hoolaaɓe, kaŋko o tabiti o koolniiɗo, ngam o waawataa yeddugo ko o wi'i.

Kuuwoowo gerdaaɗo

¹⁴ Ndaa ko a siftinorta nuɗɗinɓe bee hunnugo ɓe yeeso Allah: Taa ɓe njokkira dow bolle. Jokkirli man nafataa koo ɗume, sey wonnugo nanooɓe.

¹⁵ Tiina haa a waŋga yeeso Allah a gerdaaɗo, a kuuwoowo mo semtataa huuwugo kuugal mum, a anndinoowo kubar gooŋga kal-kal bana no fotti.

¹⁶ Seedu bee haalaaji baaɗɗi geddooji, ngam waɗooɓe ɗi ɗon ɓesdo daayaago kulol Allah.

¹⁷ Ekkitinol maɓɓe nanndi bee huuduure layannde. Himeneyus e Filetus ɗon nder maɓɓe.

¹⁸ Kamɓe ɓe celi laawol gooŋga, ɓe ɗon mbonna nuɗɗinki woɗɓe bee wi'go ummitineeki maayɓe waɗi, timmi.

¹⁹ Ammaa caɓɓawal cemmbiɗŋgal ngal Allah wallini, ɗon tabiti. Ndaa ko winnda dow maagal: “Jawmiraawo anndi yimɓe muuɗum.” Non boo: “Ewnotooɗo innde Jawmiraawo fuu, sey acca waɗugo halleende.”

²⁰ Nder saare mawnde, woodi kuuwruɗe ɗe cardi malla kaŋŋeeri, ammaa naa kanje tan, woodi boo ɗe leɗɗe e ɗe loope. Goɗɗe ɗon ngam kuuɗe marɗe saman, goɗɗe boo ngam kuuɗe famɗa-samanje.

²¹ To goɗɗo laɓɓini hoore mum diga kuuje kalluɗe ɗe mbi'mi, nden kam o laatoto kuuwruɗum marɗum saman, cenaaɗo, nafanɗo jawmiiko, taaskitinaaɗo ngam kuuɗe booɗɗe fuu.

²² An, reenta e suunooji sukaaku, ɗaɓɓu adilaaku e nuɗɗinki e yiide e salaaman bee torotooɓe Jawmiraawo bee ɓerɗe laaɓɗe.

²³ Ammaa sala gaabi paataaɗi, kumaaɗi ngam a anndi ɗi umminan jokkirli tan.

²⁴ Ammaa maccuɗo Jawmiraawo, taa jokkira, sey o laato ɗelma-gikkuujo haa koo moy fuu, baawɗo ekkitingo, munyɗo,

²⁵ sey o elta dartanooɓe gooŋga bee yaŋkinaare. Teema Allah hokkan ɓe laawol haa ɓe tuuba, ɓe paama gooŋga,

²⁶ ɓe keɓta hakkiilooji maɓɓe, ɓe kisa tuuforgol Iblisa naŋngunooɗo ɓe, haa ɓe tokko muuyo maako.