2 Samuyila 9 - Fulfulde Bible

Mbooɗeeŋga Daawuda haa Mefiboset

¹ Nyannde feere Daawuda ƴami: “Woodi goɗɗo luttuɗo nder saare Sawulu na? Mi waɗana mo mbooɗeeŋga daliila Yonatan.”

² Ɓe tawi goɗɗo mo laatino suka saare Sawulu, innde maako Siba. Ɓe ngaddi mo haa Daawuda. Laamiiɗo ƴami mo: “An woni Siba na?” O jaabi: “Ooho, barkaama.”

³ Laamiiɗo ƴami: “Kadi walaa luttuɗo nder saare Sawulu na? Mi yiɗi hebbitingo amaana fodde ko mbi'mi yeeso Allah.” Siba jaabi: “Lutti ɓii Yonatan gooto, o jiijiiɗo haa kosɗe maako ɗiɗi fuu.”

⁴ Laamiiɗo ƴami: “Toy mo?” Siba wi'i: “O ɗon haa saare Makir ɓii Ammiyel haa Loodebar.”

⁵ Daawuda neli ɗaɓɓitoygo mo.

⁶ Mefiboset ɓii Yonatan ɓii Sawulu wari haa Daawuda. O tuggi koppi yeeso maako. Daawuda wi'i: “Mefiboset.” O jaabi: “Na'am, mi maccuɗo ma.”

⁷ Daawuda wi'i mo: “Taa hul, ngam fakat mi woonante ngam daliila baaba ma Yonatan. Mi lornante gese maama ma Sawulu fuu. A nyaamdan bee am foroy.”

⁸ Fahin Mefiboset tuggi koppi, wi'i: “Min mi moy haa a suklano rawaandu waatundu bana am?”

⁹ Ammaa laamiiɗo ewni Siba, suka Sawulu, o wi'i mo: “Ko Sawulu e saare mum marno fuu, mi hokki ɗum taaniraawo jaagorɗo ma.

¹⁰ Sey a rema gese maako, an e ɓiɓɓe ma e huuwanooɓe ma, on mooɓta nafuuda maaje, ngam haa taaniraawo jaagorɗo ma heɓa ko yeeɗira. Ammaa o nyaaman haa saare am nyalɗe fuu.” Siba woodino ɓiɓɓe sappo e njowo e huuwooɓe noogas.

¹¹ O wi'i laamiiɗo: “Mi waɗan ko umruɗa maccuɗo ma fuu, barkaama.”

¹² Mefiboset woodi ɓiŋngel gorgel, innde maagel Mika. Wonɓe nder saare Siba fuu ɓe huuwanooɓe Mefiboset.

¹³ Kaŋko o jooɗi haa Urusaliima, ngam o ɗon nyaama foroy haa saare laamiiɗo. Ammaa o jiijiiɗo kosɗe maako ɗiɗi fuu.