2 Samuyila 8 - Fulfulde Bible

Daawuda mawnini laamu muuɗum

¹ Ɓaawo kuuje ɗe'e, Daawuda jaali Filisti'en, leestini ɓe, rimɗini lesdi Isra'iila diga baawɗe maɓɓe.

² Nden o jaali Mo'abi'en. O wallini naŋngaaɓe fuu haa lesdi, o foondi bee ɓoggol poondirgol mo maayata malla mo yeeɗata nder maɓɓe. O foonda ɓoggi ɗiɗi, wonɓe les maaji mbare, wonɓe les ɓoggol ngola boo ngeeɗa. Mo'abi'en ngarti maccuɓe Daawuda, o yowani ɓe jomorgol.

³ Nden o jaali Hadad'ezer ɓii Rehob, laamiiɗo Soba. Laamiiɗo oo yahno semmbiɗingo laamu maako haa maayo Efratis.

⁴ Daawuda hooci wa'iiɓe mootaaji pucci ujineere e teemeɗɗe njoweeɗiɗo (1.700) e honooɓe ujine noogas (20.000) haa maako. Daawuda soppi korle pucci mootaaji fuu, o acci teemerre ngam hoore maako.

⁵ Siriya'en ngari diga Damas ngam haa ɓe mballa Hadad'ezer, laamiiɗo Soba, ammaa Daawuda mbari nder maɓɓe worɓe ujine noogas e ɗiɗo (22.000).

⁶ Daawuda waɗi saŋngeere aynooɓe nder lesdi maɓɓe, ɓe ngarti maccuɓe maako, o yowani ɓe jomorgol. Jawmiraawo hokki Daawuda jaalorgal koo toy o yehi fuu.

⁷ Daawuda hooci bawarɗe kaŋŋeeri ɗe sukaaɓe Hadad'ezer marno, o yahri ɗe haa Urusaliima.

⁸ Haa Beeta e Berotay, berniiji Hadad'ezer, Daawuda hooci njamndi mboɗeeri ɗuuɗndi masin.

⁹ To'i, laamiiɗo Hamat nani Daawuda jaali jama'aare konu Hadad'ezer fuu.

¹⁰ Ngam maajum o neli ɓiyiiko Yoram haa laamiiɗo Daawuda, o ƴama njamu maako, o yelano mo barka, ngam o haɓi bee Hadad'ezer, o jaali mo. Ngam haɓre ɗonno hakkunde Hadad'ezer e To'i foroy. Yoram yahrani Daawuda kuuje kaŋŋeeri e cardi e njamndi mboɗeeri.

¹¹ Daawuda seni ɗe ngam Jawmiraawo, kanje e cardi e kaŋŋeeri ndi o hoocino haa ummaatooje goɗɗe ɗe o jaalino:

¹² Haa Siriya'en e Mo'abi'en e Ammooni'en e Filisti'en e Amaleki'en, non boo geɗal nder keɓal konu bee Hadad'ezer ɓii Rehob, laamiiɗo Soba.

¹³ Daawuda mbari Siriya'en ujine sappo e njoweetato (18.000) nder Waadiwol Mannda. Nde o lorti, innde maako ɓesdi mawnugo fahin.

¹⁴ O jo'ini caŋngeeje aynooɓe nder lesdi Edoom. Edoomi'en fuu laati maccuɓe Daawuda. Jawmiraawo hisni Daawuda koo toy o yehi.

Saraaki'en Daawuda

¹⁵ Daawuda laamani Isra'iila fuu. O ɗon waɗana yimɓe maako fuu kiita ndarnuka e ngooŋɗuka.

¹⁶ Yo'ab ɓii Seruyatu woni mawɗo honooɓe, Yusafat ɓii Ahiluudi woni hunndukoojo laamiiɗo.

¹⁷ Cadok ɓii Ahitooba e Ahimelek ɓii Abiyatar ngoni liman'en. Seraya woni binndoowo.

¹⁸ Benaya ɓii Yoyada woni hooreejo Kereti'en e Peleti'en. Ɓiɓɓe Daawuda kamɓe boo ɓe liman'en.