2 Samuyila 7 - Fulfulde Bible

Alkawal Allah bee Daawuda

¹ Laamiiɗo Daawuda ɗon jooɗi haa saare mum. Jawmiraawo hokki mo siwtaare, konne'en taariiɓe mo fuu ɓillaay mo fahin.

² Nyannde feere laamiiɗo wi'i annabi Natan: “Ndaa, min mi ɗon jooɗi nder suudu ndu leɗɗe cemmbiɗɗe, ammaa sundukru Allah ɗon jooɗi nder laymaaru godooje.”

³ Natan wi'i mo: “Waɗ ko ɓernde ma numi fuu, ngam Jawmiraawo ɗon wondi bee maaɗa.”

⁴ Ammaa jemmaare maajum wolde Jawmiraawo warani Natan, o wi'i:

⁵ “Yah, wi' jaggiiɗo am Daawuda: Ndaa nii Jawmiraawo wi'i: Kadi an a nyiɓantam suudu haa mi jooɗo nder maaru na?

⁶ Mi meeɗaay jooɗaago nder suudu, diga ngurtinmi Isra'iila'en nder Misra haa wargo hannde. Wakkati man fuu mi ɗon waanca, suudu laymaaru laati jooɗorde am.

⁷ Koo toy njahmi caka Isra'iila'en fuu, kadi mi meeɗi siŋkango koo gooto nder ardiiɓe ɓe umrumi ɗowugo yimɓe am, mbi'mi: Koni on nyiɓanaay yam suudu ndu leɗɗe cemmbiɗɗe?

⁸ Jonta sey a wi'a jaggiiɗo am Daawuda: Ndaa nii Jawmiraawo honooɓe asama wi'i: Mi hoo'i ma haa waalde, haa ɓaawo dammooji, ngam a laato ardiiɗo yimɓe am Isra'iila'en.

⁹ Mi wondi bee ma koo toy njahɗaa fuu, mi halki konne'en ma. Kadiboo mi mawninan innde ma, a laatoto gooto nder mawɓe duniyaaru.

¹⁰ Mi suɓani yimɓe am Isra'iila'en nokkuure joonde, mi hokkan ɓe lesdi ngam haa ɓe njooɗo nder maari bee jam. Ɓillooɓe meetataa torrugo ɓe bana ɓooyma,

¹¹ ɗum laati bana nii diga wakkati alkaali'en laamani yimɓe am Isra'iila'en. An boo mi hokkete siwtaare, konne'en ma fuu ɓillataa ma fahin. Min Jawmiraawo mi hokkete danygol.

¹² To balɗe ma timmi, a hawtoyan bee kaakiraaɓe ma. Ammaa mi jo'inan gooto nder danygol ma dow leeso laamu ma, mi tabitina laamu maako.

¹³ Kaŋko o nyiɓantam suudu, min boo mi tabitinan laamu maako haa foroy.

¹⁴ Mi laatoto baaba maako, kaŋko boo o laatoto ɓiɗɗo am. To o waɗi kalluɗum, mi eltan mo bana baaba eltirta ɓiyiiko.

¹⁵ Ammaa mi ittantaa mo mbooɗeeŋga am bana no ittumi nga dow Sawulu mo ndiiwmi yeeso maaɗa.

¹⁶ Saare ma e laamu ma nduumoto, leeso laamu ma ɗon tabiti haa foroy.”

¹⁷ Natan yecci Daawuda bolle ɗe'e fuu e wahayu oo fuu.

¹⁸ Laamiiɗo Daawuda nasti suudu laymaaru, jooɗi yeeso Jawmiraawo, wi'i: “Yaa Jawmiraawo Allah, mi moy e ɗume saare am haa njottinɗa min haa ɗo?

¹⁹ Kanjum boo ɗum pamarum haa yeeso ma, yaa Allah, Jawmiraawo am. A wolwi haala danygol maccuɗo ma nder zamanuuji garanɗi, bana nii a anndinirta yimɓe ko waɗoto, yaa Allah, Jawmiraawo am.

²⁰ Ɗume mi ɓesdata wolwango ma? A anndi maccuɗo ma.

²¹ A waɗi kuuje mawɗe ɗe'e fuu daliila koŋngol ma e anniya ma, a anndini ɗum maccuɗo ma.

²² Fakat a mawɗo, yaa Allah, Jawmiraawo am. Walaa mo nanndi bee maaɗa, an feere ma woni Allah, fodde ko min nani bee noppi amin fuu.

²³ Walaa ummaatoore feere haa duniyaaru bana yimɓe ma Isra'iila'en. An sootti ɓe ngam haa ɓe laato yimɓe ma. A huuwi kuuɗe mawɗe kulniiɗe ngam maɓɓe e ngam lesdi ma, bana nii a teddiniri innde ma. A rimɗini ɓe diga lesdi Misra, a riiwi ummaatooje goɗɗe e ɗowanteeɓe maaje yeeso maɓɓe haa ɓe laato jeyaaɓe ma.

²⁴ A tabitini Isra'iila'en ɓe yimɓe ma haa foroy, yaa Jawmiraawo, an boo a laati Allah maɓɓe.

²⁵ Ammaa jonta, yaa Allah, Jawmiraawo am, gooŋɗin wolde ma nde mbolwanɗa maccuɗo ma e danygol mum haa foroy.

²⁶ Innde ma ɓaŋgo haa foroy, yimɓe mbi'a: Jawmiraawo honooɓe asama, kaŋko woni Allah Isra'iila. Tabitin danygol maccuɗo ma boo.

²⁷ Yaa Jawmiraawo honooɓe asama, Allah Isra'iila, mi hulaay toraago ma tornde nde'e, ngam a anndini yam a hokkatam danygol.

²⁸ Jonta, yaa Allah Jawmiraawo, an woni Allah, ko mbi'ɗa fuu ɗum gooŋga, a iinani yam hayru oo.

²⁹ Nden, useni barkiɗin danygol maccuɗo ma yeeso maaɗa haa foroy. An Jawmiraawo wi'i ɗum, ngam maajum fakat danygol am heɓan barka ma.”