2 Samuyila 24 - Fulfulde Bible

Daawuda limi Isra'iila e Yahuuda

¹ Saa'i feere Jawmiraawo tikkani Isra'iila'en fahin. Ngam maajum o ummini Daawuda haa nastina ɓe nder saklere. O wi'i mo: “Yah, lim yimɓe Isra'iila e Yahuuda.”

² Laamiiɗo umri Yo'ab mawɗo jama'aare honooɓe, gonduɗo bee maako: “Yah haa le'i Isra'iila fuu, diga Dan haa yotti Biirsaba. Lime yimɓe haa mi heɓta limgal maɓɓe.”

³ Ammaa Yo'ab wi'i laamiiɗo: “Allah Jawmiraawo maaɗa ɓesda yimɓe muuɗum bana ɓe ɗuuɗiri nii cowi teemerre, o waɗa ɗum nder zamanu maaɗa haa a yi'ana yiitere ma, barkaama. Ammaa ngam ɗume a ɗaɓɓata waɗugo irin ɗu'um?”

⁴ Bee non fuu laamiiɗo dooli Yo'ab e hoore'en jama'aare honooɓe ɓe ɗowtano umroore muuɗum. Ɓe ngurti saare laamiiɗo, ɓe njehi limugo Isra'iila'en.

⁵ Ɓe eeri maayo Urdun, ɓe caŋngini haa Aro'er, haa fombina berniwol gonŋgol caka waadiwol, nder lesdi Gada. Ɓe ummi ton, ɓe njehi gal Ya'ajer.

⁶ Ɓe tokki laawol lesdi Gile'at e lesdi Heti'en kommbi Kaades. Nden ɓe ngari haa Dan-Ya'an e lesdi Sidon.

⁷ Ɓe njehi haa berniwol Tirus e berniiji Hewi'en e Kanaani'en fuu, haa ɓe njotti Biirsaba, haa Lesdi Fombina, lesdi Yahuuda.

⁸ Ɓe ngaanci nder lesdi fuu, lebbi joweenayi e nyalɗe noogas, nden ɓe ngarti Urusaliima.

⁹ Yo'ab anndini laamiiɗo limgal yimɓe: Worɓe waawɓe konu nder Isra'iila ujine teemeɗɗe njoweetato (800.000) e worɓe ujine teemeɗɗe njowo (500.000) nder Yahuuda.

¹⁰ Nde Daawuda timmini limugo yimɓe, ɓernde muuɗum ta'i, o annditi o waɗi hakke. O tori Jawmiraawo, o wi'i: “Mi waɗi hakke masin bee waɗugo ɗum. Ammaa jonta, yaa Jawmiraawo, yaafa aybe maccuɗo ma, ngam mi waɗi faataare mawnde.”

¹¹ Jaŋngo maajum fajiri, nde Daawuda ummi, Jawmiraawo wolwanino annabi Gada, gi'oowo ngam Daawuda, o wi'i:

¹² “Yah haa Daawuda, wi' mo: Ndaa nii Jawmiraawo wi'i: Mi ɗon wallinane kuuje tati. Suɓan hoore ma woore nder maaje, haa mi waɗe nde.”

¹³ Gada yehi haa Daawuda, yecci mo ɗum. Nden o ƴami: “Ɗume ngiɗɗaa? Weelo duuɓi joweeɗiɗi nder lesdi ma na? Malla doggugo yeeso konne'en taasnanɓe ma lebbi tati na? Malla nyawu kalluŋgu ndaaɓoowu nder lesdi maaɗa nyalɗe tati? Numtu, anndinam jaawaabu haa mi yahrana Jawmiraawo nelɗo yam.”

¹⁴ Daawuda jaabi Gada: “Huunde nde'e ɓillanake yam masin. Sey min njana nder juŋngo Jawmiraawo, ngam enɗam maako ɗuuɗi. Ammaa taa mi yana haa juuɗe yimɓe.”

¹⁵ Jawmiraawo neldi nyawu kalluŋgu ndaaɓoowu nder Isra'iila, diga fajiri haa saa'iire nde Jawmiraawo ta'ino. Ujine cappanɗe njoweeɗiɗo (70.000) nder yimɓe maayi koo toy nder lesdi hakkunde Dan e Biirsaba.

¹⁶ Nde malaa'ikaajo forti juŋngo mum dow Urusaliima ngam haa o halka ngol boo, Jawmiraawo faasiti waɗugo sarru. O wi'i malaa'ikaajo kalkanɗo yimɓe: “He'i! Ittu juŋngo ma jonta.” Malaa'ikaajo Jawmiraawo ɗon dari haa laarre Arawna Yebusiijo.

¹⁷ Nde Daawuda yi'i malaa'ikaajo kalkanɗo yimɓe, o wi'i Jawmiraawo: “Min woni baɗɗo hakke, min waɗi kalluɗum. Ammaa ummaatoore am nde'e, ɗume nde waɗi? Kiita ma wara dow am e dow saare baaba am.”

¹⁸ Nyalaade maajum Gada wari haa Daawuda, wi'i mo: “Yah, darnan Jawmiraawo hirsirde haa laarre Arawna Yebusiijo.”

¹⁹ Daawuda waɗi ko Jawmiraawo umruno mo bee hunnduko Gada.

²⁰ Nde Arawna yi'i laamiiɗo e saraaki'en mum ɗon ngara haa maako, o yehi fottugo bee maɓɓe, o tuggi koppi, o hippi yeeso laamiiɗo.

²¹ Arawna ƴami: “Ngam ɗume ngarɗa haa maccuɗo ma, barkaama?” Daawuda jaabi: “Mi yiɗi soodugo laarre ma, ngam haa mi darnana Jawmiraawo hirsirde dow maare, haa masiibo timma caka ummaatoore nde'e.”

²² Arawna wi'i: “Hoo'u ko a yiɗi fuu, lii'ana Jawmiraawo barkaama. Ndaa ga'i ngam guleteeɗi, ndaa leɗɗe fiyugo alkamaari e leɗɗe kaɓɓirɗe ga'i boo, ɗum laato leɗɗe yiite.

²³ Mi hokkete ɗum fuu, barkaama.” Nden Arawna ɓesdi wi'ugo: “Allah Jawmiraawo ma yerdo dokkal ma.”

²⁴ Ammaa laamiiɗo wi'i mo: “Naa non, mi soodan nde haa maaɗa. Mi yiɗaa lii'anaago Allah Jawmiraawo am guleteeɗi ɗi keɓmi meere.” Daawuda soodi laarre e na'i, baakin ceede cardi cappanɗe jowi.

²⁵ Nden o mahani Jawmiraawo hirsirde haa nokkuure man, o lii'i guleteeɗi e kirseteeɗi ngam kawtal yimɓe bee Allah. Jawmiraawo woonani lesdi man, masiibo sotti, acci Isra'iila.