2 Samuyila 17 - Fulfulde Bible

Husay wayliti sawari Ahitofel

¹ Ahitofel wi'i Absalom: “Accu mi suɓa worɓe ujine sappo e ɗiɗo (12.000), mi wurto jemmaare nde'e, mi taasna Daawuda.

² Sey mi ukkano mo saa'i o comɗo, ɓernde maako boo ta'i. Bana nii mi hulnan mo, yimɓe maako boo ndoggan. Kaŋko tan mi mbarata.

³ Nden mi waddane yimɓe maako fuu. Ɓe ngaran haa maaɗa, bana ɓe ngarduno ɓooyma haa Daawuda mo a ɗaɓɓata yoŋki mum. Bana nii yimɓe fuu njooɗorto jam”.

⁴ Sawari man fottani Absalom e ndotti'en Isra'iila fuu.

⁵ Ammaa Absalom wi'i: “Ewne boo Husay Arkiijo, haa en nana ko o wi'ata.”

⁶ Nde Husay wari haa maako, Absalom wi'i: “Ndaa ko Ahitofel wolwi. En tokkoto sawari maako na? Malla en tokkataako ɗum? Ko mbi'ɗa, an?”

⁷ Husay jaabi mo: “Jonta kam sawari Ahitofel wooɗaay.

⁸ A anndi baaba ma, kaŋko e worɓe maako ɓe semmbiɗɓe, ɓe tikkanɓe bana ɓoodu ndewu koocanaaŋgu ɓikkoy mum. Baaba ma anndi haala konu, o waalataa caka yimɓe maako.

⁹ Fakat o ɗon nyukki nder lowol feere malla haa nokkuure woɗnde. To o ukkanake ma, woɗɓe nder yimɓe ma boo ndo'ake, koo moy nananɗo ɗum wi'an: Ɓe njaalake yimɓe Absalom.

¹⁰ Nden koo moy, koo cuusɗo marɗo ɓernde mbarooga boo ittan tammunde, ngam Isra'iila'en fuu anndi baaba ma o konoowo mawɗo, yimɓe wonduɓe bee maako boo ɓe waawɓe konu.

¹¹ Ngam maajum ndaa sawari am: Mooɓtu Isra'iila'en fuu haa maaɗa, diga Dan haa Biirsaba, ngam haa ɓe laato ɗuuɗɓe bana njaareendi maayo. An bee hoore ma a ardo ɓe nder haɓre.

¹² En ukkanto mo bana saawawre solirta dow lesdi. Kaŋko e wonduɓe bee maako haa ɓe ngoni fuu, walaa mo luttata.

¹³ To o doggi, o hisi nder berniwol goɗŋgol, nden kam Isra'iila'en fuu ngaddan ɓoggi, ɓe ndasa ngol nder waadiwol, ngam taa hayre maagol woore lutta dow towndiire maagol.”

¹⁴ Absalom e Isra'iila'en fuu mbi'i: “Fakat, sawari Husay ɓuri sawari Ahitofel wooɗugo.” Ɗum waɗi non ngam Jawmiraawo waɗino anniya wonnugo sawari Ahitofel e nastingo Absalom nder sarru.

Daawuda daɗi

¹⁵ Ɓaawo maajum Husay wi'i Cadok e Abiyatar, liman'en: “Ahitofel sarwini Absalom e ndotti'en Isra'iila nii bee nii. Min boo mi sarwini ɓe nii bee nii.

¹⁶ Jonta kam, nele law haa Daawuda, ndeentine mo ngam taa o waala jemmaare nde'e haa eerorde gaa'e Urdun yahrannde ladde, ammaa o eero maayo law ngam taa o halka bee yimɓe maako fuu.”

¹⁷ Yonatan e Ahimaas ɗon ndari haa En-Rogel yaasi berniwol Urusaliima, ngam taa goɗɗo yi'a ɓe ɓe ɗon nasta ngol. Foroy korɗo yaha haa maɓɓe, yecca ɓe kubar. Nden ɓe njaha, ɓe anndina laamiiɗo Daawuda.

¹⁸ Ammaa nyannde maajum derkeejo feere yi'i ɓe, yecci ɗum Absalom. Yonatan e Ahimaas njaawɗi, ngari haa saare goɗɗo haa Bahuriima. Goɗɗo man woodi ɓulndu haa daldal mum, ɓe ndiirti nder maaru.

¹⁹ Debbo maako hoo'i limce, we'iti ɗe dow hunnduko ɓulndu, liiri gabbe dow maaje, ngam taa goɗɗo yi'a ɓe.

²⁰ Sukaaɓe Absalom ngari haa saare man, ƴami debbo: “Toy Ahimaas e Yonatan?” Debbo jaabi: “Ɓe eeri ildugol.” Sukaaɓe ɗaɓɓiti ɓe, ammaa ɓe tawaay ɓe. Ɓe lorti haa Urusaliima.

²¹ Nde ɓe ndilli, Yonatan e Ahimaas ngurti ɓulndu, njehi haa laamiiɗo Daawuda. Ɓe mbi'i mo: “Umme law, eere maayo.” Ɓe ngecci Daawuda ko Ahitofel sarwi Absalom.

²² Daawuda e yimɓe mum eeri maayo Urdun. Hiddeko weeta, ɓe fuu ɓe caali, walaa koo gooto lutti ɓaawo.

²³ Nde Ahitofel yi'i Absalom yiɗaa tokkaago sawari maako, o daɗɗi wamnde maako, o hooti wuro maako. O umri saare maako alkawal, ɓaawo maajum o ɓili hoore maako, o maayi. Ɓe uwi mo nder yenaande baaba maako.

²⁴ Daawuda yotti Mahanayim, Absalom e Isra'iila'en wonduɓe bee muuɗum boo eeri maayo Urdun.

²⁵ Absalom waɗi Amasa mawɗo honooɓe mbattudi Yo'ab. Amasa woni ɓii goɗɗo Isra'iilaajo mo innde mum Itira. Abigayel, daada Amasa, o ɓii Nahas, Seruyatu, daada Yo'ab boo o deerɗiraawo Abigayel.

²⁶ Absalom e yimɓe mum Isra'iila'en caŋngini nder lesdi Gile'at.

²⁷ Nde Daawuda yotti Mahanayim, Sobi ɓii Nahas mo Rabba nder lesdi Ammooni'en e Makir ɓii Ammiyel mo Loodebar e Barjillay mo Rogeliima nder lesdi Gile'at,

²⁸ ngaddani ɓe be'itte e taasaaje e payanɗe loope e alkamaari e sa'iiruuri e kuroori e gabbe ca'aaɗe e nyebbe e irin nyebbe feere

²⁹ e njumri bee kettuŋgol e leeɓol e dammooji. Ɓe ngaddani ɓe ɗum haa ɓe nyaama ngam ɓe numno weelo e ɗomka e comri torri Daawuda e yimɓe mum daliila jahaaŋgal muuɗum'en nder ladde.