2 Samuyila 11 - Fulfulde Bible

Daawuda e Bat-Seeba

¹ Mawri man, haa fuɗɗoode hitaande, wakkati laamiiɓe ngurtoto ngam haɓre, Daawuda neli Yo'ab bee maccuɓe mum e Isra'iila'en fuu ngam nattingo Ammooni'en e hippaago berniwol Rabba. Ammaa kaŋko o yahaay, o jooɗi haa Urusaliima.

² Nyannde feere, kiikiiɗe, Daawuda ummi e ɗoyŋgol mum, ɗon waanca dow soorowol mum haa laamorde. Nden o yi'i debbo ɗon yiiwo, debbo oo o ŋarniiɗo masin.

³ Daawuda neli ƴamugo haala maako. Ɓe mbi'i mo: “Kaŋko woni Bat-Seeba ɓii Eliyam, debbo Uriya Hetiijo.”

⁴ Daawuda neli nelaaɓe haa maako, ɓe ngadda mo. Debbo wari haa maako, o hawti bee maako. Wakkati maajum Bat-Seeba ɗonno seno ɓaawo lootugol mum. Nden o hooti suudu maako.

⁵ Ɓaawo maajum o reedi. O neli, o anndini Daawuda bee wi'go: “Mi reedi.”

⁶ Daawuda neli haa Yo'ab, umri mo: “Neldam Uriya Hetiijo.” Yo'ab waɗi ɗum.

⁷ Uriya wari haa Daawuda. Daawuda ƴami mo njamu Yo'ab e njamu yimɓe e kubar haɓre.

⁸ Nden o wi'i Uriya: “Jippa haa saare ma, siwta seɗɗa.” Nde Uriya dilli, Daawuda neldi dokkal ɓaawo maako.

⁹ Ammaa Uriya yahaay haa saare mum. O waali haa yolnde saare laamiiɗo, kaŋko e aynooɓe fuu.

¹⁰ Nde Daawuda nani Uriya jippaaki haa saare mum, o ƴami mo: “Koni a jippaaki haa saare ma? Naa jahaaŋgal juutŋgal ngartuɗa na?”

¹¹ Uriya jaabi mo: “Sundukru alkawal Allah e yimɓe Yahuuda e Isra'iila fuu ɗon njooɗi nder laymaaji. Jaagorɗo am Yo'ab e mawɓe mum ɗon caŋngini nder ladde. Kadi min mi nasta saare am, mi nyaama, mi yara, mi waalda bee debbo am na? Fakat bana a geeto, barkaama, mi waɗataa ɗum!”

¹² Daawuda wi'i Uriya: “Jooɗa haa ɗo hannde boo. Jaŋngo mi jaɓɓititte.” Bana nii Uriya faɓɓi nder Urusaliima nyalaade man e jaŋngo man boo.

¹³ Nden Daawuda ewni Uriya. Uriya nyaami e yari yeeso maako. Daawuda wuykini mo. Ammaa koo jemma maajum boo Uriya hootaay saare mum. O yehi, o waali haa nokkuure aynooɓe laamiiɗo mbaalata.

¹⁴ Nde weeti, Daawuda winndani Yo'ab bataakewol, hokki ngol Uriya, Uriya yahrani mo.

¹⁵ Ndaa ko o winndi: “Darnu Uriya haa nokkuure nde haɓre ɓuri saatugo. Nden lorte, acce mo feere maako, ngam haa konne'en mbara mo.”

¹⁶ Wakkati Yo'ab ɗon ayna berniwol, o darni Uriya haa nokkuure nde o anndi konne'en suusɓe ɗon ton.

¹⁷ Yimɓe berniwol ngurti, kaɓi bee yimɓe Yo'ab. Nder haɓre man, maccuɓe Daawuda e yimɓe woɗɓe maayi, Uriya Hetiijo boo maayi.

¹⁸ Yo'ab neldi Daawuda kubar haɓre fuu.

¹⁹ O umri nelaaɗo: “To a timmini anndingo laamiiɗo kubar haɓre fuu,

²⁰ teema o tikkan, o ƴame: Koni on ɓaditi berniwol ngam haɓre? On anndaa wonɓe dow mahol taariiŋgol ngol piɗan on na?

²¹ Moy mbari Abimelek ɓii Yerub-Ba'al? Naa debbo gonɗo dow mahol sakkini hayre namarde dow maako, o maayi haa Tebes na? Koni on ɓaditi mahol bana nii? Nden kam wi' mo: Suka ma Uriya Hetiijo boo maayi.”

²² Nelaaɗo yehi, yecci Daawuda ko Yo'ab umri mo fuu.

²³ O wi'i: “Konne'en ɓurdi min semmbe, ɓe ngurti berniwol, ɓe ukkani min haa yaasi. Ammaa min ngerɓi ɓe ɓaawo haa dammugal berniwol.

²⁴ Haa ton wonɓe dow mahol piɗi yimɓe ma. Yimɓe amin woɗɓe maayi. Suka ma Uriya Hetiijo boo maayi.”

²⁵ Daawuda jaabi nelaaɗo: “Ndaa nii mbi'ata Yo'ab: Taa haala ka ɓille. Hannde kam kaafahi mbaran oo, jaŋngo boo oya. Semmbiɗin haɓre dow berniwol haa to a halki ngol. Sey a tiɗɗina ɓernde Yo'ab bana nii.”

²⁶ Nde debbo Uriya nani gorum maayi, o woyi mo.

²⁷ Nde o sudditi, Daawuda neli haa maako, hoo'i mo haa saare mum, te'i mo. Debbo oo danyani mo ɓiɗɗo gorko. Ammaa ko Daawuda waɗi, ɗum halli yeeso Jawmiraawo.