2 Laamiiɓe 8 - Fulfulde Bible

Debbo Sunemiijo heɓti gese muuɗum

¹ Nyannde feere, Elisa wi'i debbo mo o yeeɗitini ɓiyum go: “Umma dillu, an e yimɓe saare ma. Njehe njooɗoye haa on mbaawata, ngam Jawmiraawo umri weelo waɗa nder lesdi Isra'iila duuɓi joweeɗiɗi.”

² Debbo waɗi ko goɗɗo Allah umri mo, o ummi, o dillidi bee yimɓe saare maako fuu. Ɓe njooɗoyi duuɓi joweeɗiɗi nder lesdi Filisti'en.

³ Nde duuɓi joweeɗiɗi timmi, o lorti diga lesdi Filisti'en. O yehi, o tori ballal haa laamiiɗo ngam haala saare e ngesa maako.

⁴ Saa'i maajum laamiiɗo ɗon wolida bee Geehazi, jaggiiɗo Elisa. O ɗonno wi'a mo: “Anndinam kuuje kayɗiniiɗe ɗe Elisa waɗi fuu.”

⁵ Geehazi fuɗɗi anndingo laamiiɗo haala ɓiŋngel ngel Elisa yeeɗitini, nden debbo mo Elisa yeeɗitini ɓiyum go yotti kommbi laamiiɗo ngam toraago ballal ngam haala saare e ngesa maako. Nden Geehazi wi'i: “Barkaama, kaŋko woni debbo mo Elisa yeeɗitini ɓiɗɗo mum.”

⁶ Laamiiɗo ƴami debbo, debbo yecci mo. Nden laamiiɗo umri gooto nder saraaki'en muuɗum, o wi'i: “Lornan mo ko o marino fuu, ndokkite mo boo ƴaamle ngesa maako diga nyalaade o wurtino lesdi haa wargo hannde.”

Hazayel laaminaama

⁷ Nyannde feere, Elisa yehi Damas. Saa'i maajum Benhadat, laamiiɗo Siriya'en nyawɗo. Nde o nani goɗɗo Allah wari nder berniwol,

⁸ o wi'i Hazayel: “Hoo'u dokkal hokku annabi Elisa. Ɓaawo maajum a wi'a mo o ƴama Jawmiraawo ngam anndugo to mi nyawndoto diga nyawu am ngu'u.

⁹ Hazayel yehi tawi annabi Elisa. O yahdi bee dokkal bee kuuje Damas booɗɗe fuu dow geelooɗi cappanɗe nayi, ngam saahaago annabi Elisa. O wari o dari yeeso maako, o wi'i: Ɓiɗɗo ma Benhadat, laamiiɗo Siriya'en, neli yam haa mi ƴame to o nyawndoto e nyawu maako ngu'u.”

¹⁰ Elisa wi'i Hazayel: “Yah wi' mo: Fakat a nyawndoto. Ammaa Jawmiraawo holli yam fakat o maayan.”

¹¹ Elisa suti Hazayel, haa ɗum semtini mo. Nden Elisa, goɗɗo Allah, woyi.

¹² Hazayel ƴami: “Ngam ɗume mboyata, jaagorɗo am?” Elisa jaabi: “Ngam mi anndi halleende nde a tammi waɗugo Isra'iila'en. A wulan berniiji maɓɓe cemmbiɗɗi. A mbaran sukaaɓe maɓɓe bee kaafahi. A dirɓan ɓikkoy maɓɓe pamaroy, a seekan rewɓe maɓɓe reedu'en.”

¹³ Hazayel wi'i: “Min mi maccuɗo ma, mi rawaandu meere, mi he'i waɗugo kuuje mawɗe ɗe'e na?” Elisa wi'i: “Jawmiraawo yi'ni yam a laamanto lesdi Siriya.”

¹⁴ Nden Hazayel acci Elisa, warti haa jaagorɗo muuɗum. Jaagorɗo mum ƴami mo: “Ɗume Elisa wi'i ma?” O jaabi: “O wi'i yam fakat a yamɗitan.”

¹⁵ Jaŋngo maajum, Hazayel hoo'i suddaare, o soofni nde. Nden o suddi yeeso laamiiɗo, nden laamiiɗo maayi. Hazayel laami haa pellel maako.

Laamu Yehoram nder Yahuuda

¹⁶ Nder nduuɓu laamu Yoram ɓii Akab, laamiiɗo Isra'iila, jowaɓu, saa'i Yusafat o laamiiɗo Yahuuda, Yehoram ɓiyiiko laami haa Yahuuda.

¹⁷ Duuɓi maako cappanɗe tati e ɗiɗi saa'i o laamo. O laami haa Urusaliima duuɓi joweetati.

¹⁸ O tokki laawol laamiiɓe Isra'iila, bana saare Akab tokkori, ngam o ɓaŋuno ɓii Akab debbo. O waɗi kalluɗum yeeso Jawmiraawo.

¹⁹ Ammaa Jawmiraawo yiɗaano nattingo laamu Yahuuda ngam daliila jaggiiɗo muuɗum Daawuda. Ngam o iinanino mo haa foroy goɗɗo danygol maako jooɗoto yeeso Jawmiraawo dow leeso laamu.

²⁰ Nder zamanu Yehoram, Edoomi'en tuurtani laamu Yahuuda. Ɓe laamini laamiiɗo maɓɓe.

²¹ Yehoram yahdi bee mootaaji pucci mum fuu haa Sa'ir. Jemma, o ummodi bee hoore'en mootaaji pucci, o mbari Edoomi'en taariiɓe ɓe, ammaa jama'aare konu Yahuuda doggi hooti.

²² Diga saa'i man, Yahuuda walaa baawɗe dow Edoomi'en fahin. Wakkati man berniwol Libna boo tuurti.

²³ Luttuɗum haala Yehoram e kuuɗe mum fuu, ɗum winndaama nder Deftere Habaruuji Nyalaaɗe nde Laamiiɓe Yahuuda.

²⁴ Yehoram maayi, ɓe uwi mo baŋnge kaakiraaɓe maako nder Berniwol Daawuda. Ɓiyiiko Ahaziya laami haa pellel maako.

Laamu Ahaziya nder Yahuuda

²⁵ Nder nduuɓu laamu Yoram ɓii Akab, laamiiɗo Isra'iila, sappo e ɗiɗaɓu, Ahaziya ɓii Yoram laami haa Yahuuda.

²⁶ Ahaziya woodi duuɓi noogas e ɗiɗi, saa'i o laamo. O laami haa Urusaliima nduuɓu. Innde daada maako, Ataliya ɓiɗɗo debbo nder danygol Omiri, laamiiɗo Isra'iila.

²⁷ O tokki laawol saare Akab, o waɗi kalluɗum yeeso Jawmiraawo, bana yimɓe saare Akab, ngam o esiri bee maɓɓe.

²⁸ O yahdi bee Yoram ɓii Akab haa Ramot nder Gile'at ngam haɓugo bee Hazayel laamiiɗo Siriya'en. Siriya'en naawni laamiiɗo Yoram.

²⁹ Kaŋko o lorti haa Yisre'el ngam hurgugo kuuduuje ɗe Siriya'en naawnino mo haa Rama saa'i o haɓi bee Hazayel. Nden Ahaziya, ɓii Yehoram, laamiiɗo Yahuuda yehi Yisre'el laarugo mo, ngam o nyawɗo.