2 Laamiiɓe 5 - Fulfulde Bible

Nyawndeeki saɗawre Na'aman

¹ Na'aman, o mawɗo honooɓe laamiiɗo Siriya'en. Jaagorɗo maako samɗini mo, o tedduɗo masin, ngam Jawmiraawo hokkuno Siriya'en jaalorgal bee juŋngo maako. O konoowo cuusɗo, ammaa o kuturuujo.

² Naane mooɓre Siriya'en hippooɓe njehino lesdi Isra'iila'en, ɓe naŋngino paanyo debbo ton. Paanyo oo laati korɗo debbo Na'aman.

³ Nyannde feere, paanyo debbo oo wi'i jawmum: “To gorko jawmam yehino laarugo annabiijo haa Samariya, o hurganno mo diga saɗawre maako.”

⁴ Na'aman yehi yecci laamiiɗo ko paanyo debbo iwɗo lesdi Isra'iila wi'i.

⁵ Laamiiɗo Siriya'en wi'i: “Yah tawoy laamiiɗo Isra'iila, mi hokkete bataakewol njahrana mo.” Na'aman dilli, o yahdi bee cardi baakin kilo teemeɗɗe tati e kaŋŋeeri baakin kilo cappanɗe joweego e ngapaleeji sappo.

⁶ O yahrani laamiiɗo Isra'iila bataakewol go. Ndaa ko winnda nder maagol: “Mi neli Na'aman, jaggiiɗo am bee bataakewol ngo'ol ngam haa a yamɗitina mo e saɗawre maako.”

⁷ Nde laamiiɗo Isra'iila jaŋngi bataakewol man, o seeki limce maako, o wi'i: “Kadi min mi Allah, mi mari baawɗe mbarugo e yeeɗitingo na? Laamiiɗo Siriya'en, o neldi haa am, haa mi yamɗitina goɗɗo diga saɗawre mum. Fakat, o ɗon ɗaɓɓa jokkirgol bee am!”

⁸ Nde annabi Elisa nani laamiiɗo Isra'iila seeki limce mum, o neli haa maako, ngam ɓe mbi'a mo: “Koni ceekɗa limce ma? Accu goɗɗo oo wara haa am. Nden o anndan woodi annabiijo haa Isra'iila.”

⁹ Na'aman wardi bee pucci muuɗum e mootaaji pucci muuɗum. O dari haa yolnde saare Elisa.

¹⁰ Elisa neli goɗɗo haa maako, o wi'i mo: “Yah, yiiwa nder ndiyam Urdun nde joweeɗiɗi. Nden a yamɗitan e a laaɓan.”

¹¹ Ammaa Na'aman ɓerni, dilli. O wi'i: “Mi tammino fakat annabiijo wurtoto, o daro yeeso am, o ewno innde Jawmiraawo Allah maako, o dimmbina juŋngo maako dow pellel nyawu am, o yamɗitina yam diga nyawu am.

¹² Naa Abana e Parpar, maaje Damas ɓuri maaje Isra'iila fuu wooɗugo na? Mi waawataa yiiwaago ton haa mi laaɓa na?” O wayliti, o dilli bee ɓernuki.

¹³ Ammaa jaggiiɓe maako ɓaditi, mbi'i mo: “Baaba, to annabiijo umruno ma huunde saatunde, a waɗataano nde na? Sakko nde o wi'i jonta: Yiiwa tan, laaɓa.”

¹⁴ Na'aman jaɓi sawari, o jippi nder Urdun, o nasti nder ndiyam nde joweeɗiɗi bana annabiijo wi'no mo, o laaɓi, ɓanndu maako warti bana ndu ɓiŋngel.

¹⁵ Nden o lorti haa annabiijo bee ɗoftuɓe mo fuu. O ɓaditi mo, o wi'i: “Jonta anndumi, walaa Allah haa duniyaaru fuu sonaa nder Isra'iila. Useni, jaɓ dokkal ngal mi hokkata ma jonta.”

¹⁶ Ammaa Elisa jaabi: “Fakat bana Jawmiraawo mo mi jagganto o geeto, mi jaɓataa!” Na'aman tori mo ɗuuɗɗum ngam haa o jaɓa, ammaa o sali.

¹⁷ Na'aman wi'i: “Nde a sali jaɓugo dokkal, useni duŋanam mi nokka mbulwuldi lesdi ma seɗɗa, deydey dimle alfadariije ɗiɗi. Ngam mi meetataa lii'anaago ɗowanteeɓe woɗɓe guleteeɗi e kirseteeɗi, sey Jawmiraawo tan.

¹⁸ Ammaa Jawmiraawo yaafano yam ɗu'um: Koo ndey jaagorɗo am laamiiɗo Siriya'en nastata suudu Rimmon ɗowanteeɗo mum ngam haa o sujida, sey min boo mi sujida bana maako, ngam dow juŋngo am o tuggoto. Kanjum Jawmiraawo yaafano yam ɗum.”

¹⁹ Elisa wi'i mo: “Yah jam.” Nde Na'aman dilli, daayake seɗɗa,

²⁰ Geehazi, jaggiiɗo annabi Elisa numi: “Jaagorɗo am haɗi Na'aman Siriyaajo oo hokkugo mo dokkal, o jaɓaay koo ɗume nder ko o waddani mo. Fakat bana Jawmiraawo o geeto, min kam mi taasnan mo, mi jaɓa huunde seɗɗa haa maako.”

²¹ Geehazi taasni Na'aman. Nde Na'aman yi'i o taasni mo, o jippi moota pucci maako, o wari o fotti bee maako. O ƴami mo: “Jam boo?”

²² Geehazi jaabi: “Jam. Jaagorɗo am neli yam, wi'i: Jonta suka'en ɗiɗo caka pukara'en annabi'en ngari diga kooseeje Efrayim. Ngam daliila maɓɓe hokku mo cardi kilo cappanɗe tati e ngapaleeji ɗiɗi.”

²³ Na'aman wi'i mo: “Ɗum fottane jaɓugo cardi kam cowi ɗiɗi.” O tiɗɗini mo, o haɓɓi cardi kilo cappanɗe joweego nder boorooji ɗiɗi e ngapaleeji ɗiɗi, o hokki ɗum ɗiɗo nder sukaaɓe maako. Ɓe ndoondi ɗum yeeso Geehazi.

²⁴ Nde ɓe njotti babal bi'eteeŋgal Ofel, Geehazi jaɓi boorooji e ngapaleeji go, o sigi haa saare maako. Nden o jaɓɓiti jaggiiɓe Na'aman, ɓe ndilli.

²⁵ Geehazi lori haa jaagorɗo muuɗum. Elisa ƴami mo: “Diga toy ngartuɗaa, Geehazi?” Geehazi jaabi: “Mi yahaay koo toy.”

²⁶ Elisa wi'i mo: “Kadi ruuhu am anndinaay yam wakkati gorko oo jippi moota pucci mum, fotti bee maaɗa na? Ɗum wakkati jaɓugo cardi e jaɓugo limce e jaytunje e gese inabooje e dammooji e na'i e maccuɓe e horɓe na?

²⁷ Saɗawre Na'aman ɗakkete, an e danygol ma haa foroy.” Nde o wurti haa maako, o ranwi tal bee saɗawre.