2 Laamiiɓe 22 - Fulfulde Bible

Yusiya e deftere tawreeta

¹ Yusiya woodi duuɓi joweetati, saa'i o laamo. O laami haa Urusaliima duuɓi cappanɗe tati e go'o. Innde daada maako, Yedida ɓii Adaya mo Boskat.

² O waɗi ko fottani Jawmiraawo, o tokki laabi kaaka maako Daawuda fuu, o selaay ɗi sam.

³ Nder nduuɓu laamu Yusiya sappo e njoweetataɓu, laamiiɗo neli Safan ɓii Asaliya, taaniraawo Mesullam, binndoowo haa haykaliiru Jawmiraawo. O wi'i mo:

⁴ “Yah haa Hilkiyya, hooreejo liman'en, haa o mooɓta ceede gaddaaɗe nder haykaliiru Jawmiraawo, ɗe aynooɓe dammuɗe njaɓi haa yimɓe.

⁵ Hokku ɗe aynooɓe kuugal nder haykaliiru Jawmiraawo. Kamɓe boo ɓe ndokka ɗe huuwooɓe nder haykaliiru Jawmiraawo, waato wo'itinooɓe kuuje nder maaru

⁶ e sehooɓe e nyiɓooɓe e mahooɓe, ngam soodugo leɗɗe e kaa'e cehaaɗe ngam wo'itingo ndu.

⁷ Ammaa taa ɓe mbaɗa lisaafi ceede dokkaaɗe haa juuɗe maɓɓe, ngam ɓe ɗon kuuwa bee hoolaare.”

⁸ Hilkiyya, hooreejo liman'en wi'i Safan binndoowo: “Mi heɓti deftere tawreeta nder haykaliiru Jawmiraawo.” O hokki nde Safan, mo jaŋngi nde.

⁹ Nden Safan binndoowo wari haa laamiiɗo, waddani mo habaru, wi'i: “Jaggiiɓe ma njuppi ceede gonɗe nder sundukru haykaliiru, ɓe ndokki ɗe haa juuɗe hakkilanooɓe kuugal haa haykaliiru Jawmiraawo.”

¹⁰ Nden Safan binndoowo anndini laamiiɗo: “Hilkiyya limanjo hokki yam deftere.” Safan jaŋngani nde laamiiɗo.

¹¹ Nde laamiiɗo nani bolle Deftere Tawreeta, o seeki limce maako.

¹² O umri Hilkiyya limanjo e Ahikam ɓii Safan e Akbor ɓii Mikaya e Safan binndoowo e Asaya, suka laamiiɗo, o wi'i:

¹³ “Njehe, ƴame Jawmiraawo ngam am e ngam ummaatoore Yahuuda fuu dow bolle binndaaɗe nder deftere heɓtaande nde'e. Ngam kaakiraaɓe meeɗen nanaay bolle binndaaɗe nder deftere nde'e haa ɓe mbaɗa fodde ko winnda dow meeɗen fuu. Kanjum ummini tikkere Jawmiraawo saatunde dow meeɗen.”

¹⁴ Nden Hilkiyya limanjo e Ahikam e Akbor e Safan e Asaya njehi haa annabi Hulda, debbo Sallum ɓii Tikuwa taaniraawo Harhas, aynoowo limce cenaaɗe nder haykaliiru. Annabiijo debbo oo ɗonno jooɗi haa fattude hesre nder Urusaliima. Ɓe anndini mo haala man.

¹⁵ O wi'i ɓe: “Ndaa nii Jawmiraawo Allah Isra'iila wi'i: Mbi'e gorko nelɗo on:

¹⁶ Mi ukkan sarru dow nokkuure nde'e e jooɗiiɓe haa maare fodde bolle deftere nde laamiiɗo Yahuuda jaŋngi fuu.

¹⁷ Mi waɗan ɗum ngam ɓe acci yam, ɓe nguli uurle ngam ɗowanteeɓe woɗɓe, haa ɓe tikkinammi bee kuuɗe maɓɓe fuu. Tikkere am ɗon saati dow nokkuure nde'e, nde feewtataako.

¹⁸ Ammaa laamiiɗo Yahuuda nelɗo on ƴamgo Jawmiraawo, mbi'e mo: Ndaa nii Jawmiraawo Allah Isra'iila wi'i: A nani bolle deftere nde'e.

¹⁹ Ɗum meemi ɓernde ma, a leesni hoore ma yeeso am nde nanɗa ko mbolwumi dow nokkuure nde'e e jooɗiiɓe haa maare, haa nde laato daliila kultoreeŋgol e naaloore. A seeki limce ma, a woyi yeeso am, min boo mi jaɓi tornde ma, non Jawmiraawo wi'i.

²⁰ Ngam maajum, mi accete a maaya nder hayru. Ɓe mballinte nder yenaande ma bilaa yi'ugo sarru ngu ukkanmi Urusaliima fuu.” Ɓe ngartirani laamiiɗo Yusiya jaawaabu man.