2 Laamiiɓe 13 - Fulfulde Bible

Laamu Yo'ahas haa Isra'iila

¹ Nder nduuɓu laamu Yo'as ɓii Ahaziya, laamiiɗo Yahuuda noogas e tataɓu, Yo'ahas ɓii Yeehu laami haa Isra'iila. O laami haa Samariya duuɓi sappo e joweeɗiɗi.

² O waɗi kalluɗum yeeso Jawmiraawo, o tokki hakkeeji ɗi Yerobo'am ɓii Nebat nastini Isra'iila'en nder maaji, o accaay waɗugo ɗi.

³ Jawmiraawo tikkani Isra'iila. O hokki ɓe haa juŋngo Hazayel laamiiɗo Siriya'en, kadiboo o hokki ɓe haa juŋngo Benhadat ɓii Hazayel, wakkati fuu.

⁴ Ammaa Yo'ahas tori Jawmiraawo. Jawmiraawo boo jaɓi tornde maako, ngam o yi'i no laamiiɓe Siriya'en toonyori Isra'iila.

⁵ Jawmiraawo hokki Isra'iila kisnoowo, ɓe ndimɗi e baawɗe Siriya'en, Isra'iila'en njooɗi nder cuuɗi laymaaji muuɗum'en bana naane.

⁶ Ammaa ɓe accaay waɗugo hakkeeji ɗi saare Yerobo'am nastini Isra'iila'en nder maaji, ɓe tokki waɗugo ɗi. Koo suura Asera boo lutti nder Samariya.

⁷ Sey wa'iiɓe pucci cappanɗe njowo e mootaaji pucci sappo e yahooɓe bee kosɗe ujine sappo tan luttani Yo'ahas. Ngam laamiiɗo Siriya'en halki ɗuuɗɓe maɓɓe, o yaaɓi ɓe bana yaaɓugo collaaje bee kosɗe.

⁸ Luttuɗum haala Yo'ahas e kuuɗe mum e baawɗe mum fuu, ɗum winndaama nder Deftere Habaruuji Nyalaaɗe nde Laamiiɓe Isra'iila.

⁹ Yo'ahas maayi, ɓe uwi mo haa Samariya. Ɓiyiiko Yo'as laami haa pellel maako.

Laamu Yo'as haa Isra'iila

¹⁰ Nder nduuɓu laamu Yo'as cappanɗe tati e njoweeɗiɗaɓu haa Yahuuda, Yo'as ɓii Yo'ahas laami haa Isra'iila. O laami haa Samariya duuɓi sappo e joweego.

¹¹ O waɗi kalluɗum yeeso Jawmiraawo, o accaay waɗugo hakkeeji ɗi Yerobo'am ɓii Nebat nastini Isra'iila'en nder maaji. O tokki waɗugo ɗi.

¹² Luttuɗum haala Yo'as e kuuɗe mum fuu e baawɗe mum, no o haɓri bee Amasiya, laamiiɗo Yahuuda boo, ɗum winndaama nder Deftere Habaruuji nyalaaɗe nde Laamiiɓe Isra'iila.

¹³ Nde Yo'as maayi, ɓe uwi mo haa Samariya baŋnge genaale laamiiɓe Isra'iila. Nden Yerobo'am, ɓiyiiko laami haa pellel maako.

Annabaaku Elisa ragareewu e maayde muuɗum

¹⁴ Nde annabi Elisa nyawi nyawu ngu o maayrata, Yo'as laamiiɗo Isra'iila wari haa maako, o woyi yeeso maako, o wi'i: “Baaba am! Baaba am! An woni mootaaji pucci e wa'ooɓe pucci Isra'iila.”

¹⁵ Elisa wi'i mo: “Waddu lagaawal e kuri.” Yo'as waddi ɗum.

¹⁶ Elisa wi'i laamiiɗo: “Tiru lagaawal bee juŋngo ma.” O tiri ngal bee juŋngo maako. Elisa waɗi juuɗe muuɗum dow juuɗe laamiiɗo.

¹⁷ Nden Elisa wi'i mo: “Maɓɓitu wurdere gal fuunaaŋge.” Laamiiɗo maɓɓiti. Nden o wi'i mo: “Fiɗ.” Nde laamiiɗo fiɗi, annabi Elisa wi'i: “Kurol ngo'ol ɗon holla jaalorgal ngal Jawmiraawo hokki ma dow honooɓe Siriya'en! A mbaran Siriya'en haa Afek, haa a nattina ɓe fuu.”

¹⁸ Ɓaawo maajum Elisa wi'i mo: “Hoo'u kuri luttuɗi.” Laamiiɗo hoo'i ɗi. Annabi Elisa wi'i mo: “Fiy lesdi.” Laamiiɗo fiyi lesdi nde tati, nden o acci.

¹⁹ Annabi Elisa tikkani mo, wi'i: “To a fiyino haa lesdi nde jowi malla nde joweego, a jaalotono Siriya'en haa ɓe natta fuu, ammaa jonta a jaaloto ɓe nde tati tan.”

²⁰ Elisa maayi, ɓe uwi mo. Mawri maajum, mooɓe Mo'abi'en hippooɓe ɗon nasta lesdi.

²¹ Nyannde feere, yimɓe njehi uwugo maayɗo, nde ɓe ngi'i mooɓre hippooɓe ɗon wara, ɓe ngubi maayɗo go nder yenaande Elisa, ɓe ndoggi. Nde ɓanndu maayɗo meemi i'e Elisa, ndu yeeɗiti, goɗɗo oo ummi, dari.

Konu Siriya bee Isra'iila

²² Hazayel laamiiɗo Siriya'en toonyino Isra'iila'en wakkati laamu Yo'ahas fuu.

²³ Ammaa Jawmiraawo mo'ani ɓe, o enɗi ɓe fahin, ngam daliila alkawal maako bee Ibrahiima e Isiyaaku e Yaakubu. O yiɗaa halkugo ɓe. Haa wargo saa'i maajum o wudinaay ɓe daayiiɗum e maako.

²⁴ Nde Hazayel laamiiɗo Siriya'en maayi, ɓiyiiko Benhadat laami haa pellel maako.

²⁵ Nden Yo'as ɓii Yo'ahas jaɓti berniiji diga juŋngo Benhadat ɓii Hazayel. Kaŋko o jaɓtino ɗi bee haɓre diga juŋngo Yo'ahas baaba maako. Yo'as jaali mo nde tati, o wartiri berniiji nder maral Isra'iila.