2 Laamiiɓe 10 - Fulfulde Bible

Yeehu nattini yimɓe saare Akab

¹ Akab woodino ɓiɓɓe worɓe cappanɗe njoweeɗiɗo haa Samariya. Yeehu winndi bataakeeji, o neldi ɗi haa Samariya, haa Yisre'el, haa ndotti'en e eltooɓe ɓiɓɓe Akab, wi'ugo ni'i:

² “To bataakewol ngo'ol yottake on, nume: Ɓiɓɓe jaagorɗo mon ɗon ngondi bee mooɗon, non boo mootaaji e pucci. On ngoodi boo berniwol cemmbiɗŋgol e balmi.

³ Kadi, cuɓe ɓurduɗo ne'aare e gooŋgaaku caka ɓiɓɓe jaagorɗo mooɗon, njo'ine mo dow leeso laamu baaba maako. Nden kaɓe ngam aynugo saare jaagorɗo mooɗon.”

⁴ Ammaa kamɓe ɓe kuli masin, ɓe mbi'mbi'tiri: “Laamiiɓe ɓeya ɗiɗo ma, mbaawaay dartaago yeeso maako. Noy mbaawreten enen?”

⁵ Kaliifaajo laamorde e kaliifaajo berniwol e ndotti'en e eltooɓe neli haa Yeehu ngam wi'ugo: “Minin min maccuɓe ma, min mbaɗan ko mbi'ata min fuu. Naa minin cuɓata mo laamoto. Waɗ ko fottani ma.”

⁶ Yeehu winndani ɓe bataakewol ɗiɗaɓol, o wi'i ɓe: “To on tokkiiɓe yam, to on nanani yam, ta'e ko'e ɓiɓɓe jaagorɗo mooɗon, ngaddaneeɗam ɗe haa Yisre'el, jaŋngo bana wakkatiire nde'e.” Ɓiɓɓe laamiiɗo worɓe cappanɗe njoweeɗiɗo ɗonno haa mawɓe berniwol, eltooɓe ɓe.

⁷ Nde bataakewol maajum yotti ɓe, ɓe koo'i ɓiɓɓe laamiiɗo cappanɗe njoweeɗiɗo, ɓe mbari ɓe, ɓe mbaati ko'e maɓɓe nder cilaaje, ɓe neldi ɗe haa Yeehu haa Yisre'el.

⁸ Nelaaɗo wari, anndini Yeehu: “Ɓe ngaddi ko'e ɓiɓɓe laamiiɗo.” O wi'i: “Mbaage ɗe baagaaje ɗiɗi haa nastirde dammugal, haa fajiri.”

⁹ Fajiri o wurti yaasi, o dari, o wi'i ummaatoore fuu: “Onon on laaɓɓe. Min, mi waɗi dabare dow laamiiɗo Yoram, mi mbari mo. Ammaa moy mbari ɓe'e fuu?

¹⁰ Annde Jawmiraawo gooŋɗinan bolle ɗe o wi'i dow saare Akab fuu. Jawmiraawo waɗi ko o wi'no bee hunnduko annabi Eliya.”

¹¹ Nden Yeehu mbari luttuɓe saare Akab nder Yisre'el fuu, mawɓe maako e sooba'en maako e liman'en maako, o accaay koo gooto maɓɓe.

Yeehu mbardi banndiraaɓe Ahaziya

¹² Ɓaawo maajum Yeehu ummi, yehi Samariya. Nde o ɗon haa laawol berniwol Bayti-Eket ngol waynaaɓe,

¹³ o fotti bee banndiraaɓe Ahaziya laamiiɗo Yahuuda. O ƴami ɓe: “On ɓeye?” Ɓe njaabi: “Min banndiraaɓe Ahaziya. Min ngari hoofnugo ɓiɓɓe laamiiɗo e ɓiɓɓe daada saare laamiiɗo.”

¹⁴ Yeehu umri, wi'i: “Naŋnge ɓe ɓe yeeɗɓe!” Ɓe naŋngi ɓe, ɓe mbardi ɓe haa waawru Bayti-Eket, worɓe cappanɗe nayo e ɗiɗo. O accaay koo gooto maɓɓe.

¹⁵ Nde Yeehu dilli, o fotti bee Yonadabu ɓii Rekab, garanɗo haa maako. O hoofni mo, o ƴami: “A gooŋgaajo haa am bana min mi gooŋgaajo haa maaɗa na?” Yonadabu jaabi: “Nonnon.” Yeehu wi'i: “To non kam fortanam juŋngo ma.” Kaŋko o fortani mo juŋngo maako. Yeehu wa'ini mo dow moota pucci muuɗum.

¹⁶ O wi'i: “Yahdu bee am, laar tiinaare am ngam kuugal Jawmiraawo.” O yahri mo dow moota pucci maako.

¹⁷ Nde o yotti Samariya, o mbari luttuɓe saare Akab nder Samariya fuu, haa o nattini danygol Akab fodde wolde nde Jawmiraawo wi'no Eliya.

Yeehu nattini kuugal diina Ba'al

¹⁸ Yeehu mooɓti yimɓe fuu. O wi'i ɓe: “Akab rewi Ba'al seɗɗa, ammaa Yeehu rewan mo ɗuuɗɗum.

¹⁹ Kadi ewne annabi'en Ba'al, rewooɓe mo e liman'en maako fuu, ɓe ngara haa am, taa gooto maɓɓe lutta. Mi woodi kirseteeŋga maŋnga ngam Ba'al. Koo moy to waraay, maayan.” Ammaa Yeehu waɗi bee ƴoyre ngam haa o halka rewooɓe Ba'al.

²⁰ Nden Yeehu umri: “Mbaɗe mooɓtorde juulde senaande ngam Ba'al.” Ɓe ngooyni nde.

²¹ Yeehu neli koo toy nder Isra'iila. Rewooɓe Ba'al fuu ngari, walaa mo waraay. Ɓe nasti suudu Ba'al ndu heewi haa ndu facci.

²² Yeehu wi'i kaliifaajo sigordu limce: “Wurtin limce ngam teddinooɓe Ba'al.” O hokki ɓe limce man.

²³ Nden Yeehu nastidi bee Yonadabu ɓii Rekab nder suudu Ba'al. O wi'i rewooɓe Ba'al fuu: “Mbiɗite, ndaare, taa gooto nder jagganiiɓe Jawmiraawo wonda bee mooɗon, sey rewooɓe Ba'al tan.”

²⁴ Nden ɓe nasti ngam lii'aago kirseteeɗi e guleteeɗi. Ammaa Yeehu darnuno worɓe cappanɗe njoweetato haa yaasi, wi'no ɓe: “Mi hokki on worɓe ɓe'e. Koo moy acci gooto maɓɓe daɗi, yoŋki mum laatoto mbattudi yoŋki daɗɗo.”

²⁵ Nde ɓe timmini lii'aago guleteeɗi, Yeehu wi'i aynooɓe e ardiiɓe: “Naste, mbare ɓe, taa goɗɗo wurto.” Ɓe mbardi ɓe bee kaafahi. Aynooɓe e ardiiɓe ngudini ɓe yaasi. Nden ɓe nasti nder suudu Ba'al,

²⁶ ɓe ngurtini daŋraŋge suuraaji nder maaru, ɓe nguli ɗe.

²⁷ Ɓe ngibbini daŋraŋgal Ba'al, ɓe ngibbini suudu Ba'al, ɓe ngartiri ndu nokkuure calka haa wargo hannde.

²⁸ Bana nii Yeehu nattiniri Ba'al nder Isra'iila.

²⁹ Ammaa o accaay hakkeeji ɗi Yerobo'am ɓii Nebat nastini Isra'iila'en nder maaji, o ittaay nga'oy kaŋŋeeri haa Baytila e Dan.

³⁰ Jawmiraawo wi'i Yeehu: “A timmini ko fottani yam, a waɗi saare Akab fodde anniya ɓernde am. Ngam maajum ɓiɓɓe ma njooɗoto dow leeso laamu Isra'iila haa yidere nayaɓre.”

³¹ Ammaa Yeehu ɗowtanaay tawreeta Jawmiraawo Allah Isra'iila bee ɓernde woore, o accaay waɗugo hakkeeji ɗi Yerobo'am nastini Isra'iila'en nder maaji.

³² Nder zamanu maajum, Jawmiraawo fuɗɗi ustugo maral Isra'iila. O hokki laawol haa Hazayel laamiiɗo Siriya'en, o jaali Isra'iila'en koo toy nder lesdi Isra'iila,

³³ o jaɓti lesdi Gile'at fuu haa fuunaaŋge Urdun, waato lesdi le'i Gada e Ruben e Manassa, haa yotti Aro'er haa maayo Arnon e lesdi Gile'at e lesdi Baasan.

³⁴ Luttuɗum haala Yeehu e kuuɗe mum e baawɗe mum, ɗum fuu ɗum winndaama nder Deftere Habaruuji Nyalaaɗe nde Laamiiɓe Isra'iila.

³⁵ Yeehu maayi, ɓe uwi mo haa Samariya. Ɓiyiiko Yo'akas laami haa pellel maako.

³⁶ Yeehu laamani Isra'iila haa Samariya, duuɓi noogas e joweetati.