2 Korintu'en 9 - Fulfulde Bible

Walliinde ngam deerɗiraaɓe

¹ Walaa haaje mi winndana on dow walliinde ngam senaaɓe haa lesdi Yahudiya.

² Mi anndi anniya mooɗon mbooɗka. Mi mantori on haa Makedoniya'en boo. Mi wi'i: “Deerɗiraaɓe nder Akaya ɗon taaski diga rowani ngam hokkugo.” Tiinaare mooɗon findini ɗuuɗɓe maɓɓe.

³ Jonta nelanmi deerɗiraaɓe go ngam taa manoore nde min maniri on laato meere. Mi yiɗi taaskooɗon fakat bana mbi'mi.

⁴ Ngam to Makedoniya'en ngardi bee am, tawi on taaskaaki, min cemtan ngam hoolaare nde min kooli on. Sakkomaa onon!

⁵ Ngam maajum mi laari ɗum kaanduɗum mi toro deerɗiraaɓe go aarta min yahugo haa mooɗon, ɓe cuklo mooɓtugo dokkal ngal on iini, ɓe taaskitina ngal. Ɗum tammi hollugo on ndokki bee ɓernde saahiinde, naa bee doole.

⁶ Paame ɗu'um: Aawɗo peetum, peetum sodata, aawɗo ɗuuɗɗum boo, ɗuuɗɗum sodata.

⁷ Haani koo moy hokka deydey anniya ɓernde mum, naa bee mimsitaare malla bee doole. Ngam Allah yiɗi dokkanɗo bee seyo.

⁸ Allah waawan ɗuɗɗinango on mo'e fuu. On maran ko hiɓɓinta haaje mooɗon tum. Bana nii on keɓan huuwugo kuuɗe booɗɗe koo ɗeye,

⁹ bana ko winnda: “O hokki laafuɓe bee caahaaki, adilaaku maako ɗon tabiti haa foroy.”

¹⁰ Allah woni dokkanɗo aawoowo aawdi e nyaamdu. O hokkan on boo aawdi, o ɗuɗɗinan ndi, o fuɗnan ndi, haa kuuɗe adiliije mooɗon mbaɗa nafuuda ɗuuɗka.

¹¹ O riskinan on nder koo ɗume fuu, haa on laato saahiiɓe foroy. Nden ɗuuɗɓe ngettan Allah daliila caahaaki mooɗon.

¹² Ngam dokkal nga'al laatataako ngam humtugo haaje senaaɓe tan, ammaa ko ɓuri ɗum, ngal ɗuɗɗinan gettooje haa Allah.

¹³ To dokkal maajum waŋgini gooŋgaaku mon, nden kam ɓe teddinan Allah, ngam on ɗowtani seedamku linjiila Almasiihu, on cenndi hayruuji mon boo bee maɓɓe e bee yimɓe fuu.

¹⁴ Ɓe teddinan Allah boo to ɓe ngi'i no mo'ere Allah ɗuuɗani on, ɓe ndo'anto on, ɓe mbaŋginanan on yiide maɓɓe.

¹⁵ Yettoore laatano Allah ngam caahu muuɗum ngu tinndintaake!