2 Korintu'en 12 - Fulfulde Bible

Kaayeefiiji gi'aaɗi e wahayuuji

¹ Haani mi juro na? Ɗum nafataa boo. Ammaa mi wolwan haala wahayuuji e kaayeefiiji ɗi Jawmiraawo yi'ni yam.

² Mi anndi Masiihiŋkeejo goɗɗo, waɗi duuɓi sappo e nayi jonta. O eeŋginaama haa asamaawu tataɓu. O ɗonno nder ɓanndu na malla haa yaasi ɓanndu na! Mi anndaa. Sey Allah tan anndi.

³ Mi anndi goɗɗo oo – o ɗonno nder ɓanndu na malla yaasi ɓanndu? Mi anndaa. Sey Allah tan anndi.

⁴ O eeŋginaama haa aljanna. Ton o nani bolle sirriije ɗe neɗɗo fotaay wolwugo.

⁵ Mi jurorto goɗɗo oo. Ammaa min bee hoore am, mi jurataako, sonaa tampere am tan njurortoomi.

⁶ Koo to mi yiɗi juraago, naa mi paataaɗo, ngam gooŋga mbi'anmi. Ammaa mi yiɗaa juraago, ngam taa goɗɗo ɓurnammi dow ko o yi'i haa am malla ko o nani haa am.

⁷ Ngam taa mi mawnito daliila wahayuuji kaayeefiiji ɗi ngi'mi, Allah hokki yam ko naawni yam bana gi'al nder ɓanndu am, ɗum nelaaɗo Sayɗaanu mo ɓilli yam ngam taa mi mawnito.

⁸ Nde tati toriimi Jawmiraawo haa o ittanammi ɗum.

⁹ Ammaa o jaabi yam: “Mo'ere am he'i ma. Ngam baawɗe am ɓuran huuwugo nder maaɗa yaake a tampuɗo.” Ngam maajum mi jurorto tampe am bee seyo, ngam haa baawɗe Almasiihu ngonda bee am.

¹⁰ Ngam maajum mi ɗon seyoro tampe am, mi ɗon seyoro kuudi yimɓe, cakle, toonyaaŋgeeji e ɓillaaje ngam daliila Almasiihu. Ngam yaake mi tampuɗo, yaake man nden mi cemmbiɗɗo.

Numooji Pol dow Korintu'en

¹¹ On ndooli yam, mi warti mi ɗon wolwa bana paataaɗo ngam haani onon ceedantammino. Koo to mi laataaki koo ɗume, mi famɗanaay nelaaɓe mawɓe ɓe'e sam.

¹² Alaamaaji ɗi kollata mi laati nelaaɗo mbaŋgi caka mooɗon: Mi holli on munyal timmuŋgal, mi waɗi kaayeefiiji e kuuɗe baawɗe boo caka mooɗon.

¹³ Woodi ko mi waɗani jama'aaje nuɗɗinɓe goɗɗe, nden mi waɗanaay on ɗum na? Ɗum huunde woore tan: Mi ƴamaay on kumtanammi haaje am. Njaafaneeɗam aybewol ngo'ol kadi!

¹⁴ Ndaa, mi taaskiiɗo wargo haa mooɗon nde tataɓre. Nden boo mi teddantaa on, ngam naa jawdi mooɗon ngiɗmi, ammaa onon. Fakat, naa ɓikkoy pagganto saaro'en muuɗum'en, ammaa ɗum saaro'en pagganto ɓikkoy.

¹⁵ Ngam am kam, bee seyo ndokkanmi ngam mooɗon ko marmi fuu, koo hoore am boo. Kadi on pamɗitinan yiɗugo yam ngam mi ɓuri yiɗugo on na?

¹⁶ On tabitini no mi teddanaay on. Ammaa woɗɓe ɗon mbi'a mi ƴoyri on, mi naftori on bee dabare.

¹⁷ Woodi gooto caka nelaaɓe am ɓe nelmi, mi ƴoyri on bee maako na?

¹⁸ Mi tori Titus o yahda bee deerɗiraawo goɗɗo haa mooɗon. Kadi Titus ƴoyri on, jaɓti on huunde na? Naa min ɗiɗo fuu, min kuuwi bee anniya ngoota, bee tokkaago laawol gootol na?

¹⁹ Teema on ɗon numa diga ɓooyma, min ngiɗi gooŋɗingo ko'e amin yeeso mooɗon. Naa non sam! Min ɗon mbolwa yeeso Allah bana no Almasiihu yiɗi. Deerɗiraaɓe yiɗaaɓe, min ɗon mbi'a ɗum fuu ngam haa min cemmbiɗina on nder nuɗɗinki.

²⁰ Mi ɗon hula, saa'i ngaranmi haa mooɗon mi tawrataa on bana no ngiɗmi, onon boo on tawrataa yam bana no ngiɗɗon. Mi ɗon hula mi tawan jokkirli e ɓernuki e hallingo woɗɓe e bolle kalluɗe e tufle e mawnitaare e fitinaaji haa mooɗon.

²¹ Mi ɗon hula to mi wari kadiboo haa mooɗon, Allah am leesnammi, haa mi woya dow ɗuuɗɓe tokkotooɓe waɗugo hakke bana naane, saliiɓe accugo kuuɗe muuɗum'en cemtiniiɗe e daakaareeku.