2 Korintu'en 10 - Fulfulde Bible

Jaawaabu Pol haa felanɓe mo dow kuugal maako

¹ Min Pol, mi ɗon toro on barka yaŋkinaare Almasiihu e mbooɗeeŋga muuɗum – Woɗɓe ɗon mbi'a mi leesɗo saa'i mi ɗon wondi bee mooɗon, ammaa mi caatuɗo dow mooɗon saa'i mi daayiiɗo!

² Mi ɗon toro on: Taa ndooleeɗam hollugo on dartaare am to mi yottake caka mooɗon. Ɓe ɗon numa min ɗon kuuwa fodde gikku duniyaaru. Haa maɓɓe kam, mi hollan ɓe caatal am kadi.

³ Fakat, minin min ɗon nder duniyaaru, ammaa min kaɓataa fodde ɗabiya duniyaaru.

⁴ Nder haɓre amin, min kuuwtinirtaa balmi iwɗi haa ɗabiya duniyaaru. Ɗum balmi Allah cemmbiɗɗi, baawɗi yibbingo mahi cemmbiɗɗi. Min ɗon kalka numooji kalluɗi,

⁵ min ɗon ngibbina ko dartanto anndal Allah nder mawnitaare mum fuu. Min ɗon njahra numooji yimɓe haa ɗi ɗowtano Almasiihu.

⁶ To ɗowtaare mooɗon timmidi, min taaskiiɓe hiitaago geddal fuu.

⁷ Ndaare ko waŋganta gite mooɗon. To goɗɗo limi hoore mum nder yimɓe Almasiihu, sey o numta kadi: Ngam minin boo min yimɓe Almasiihu.

⁸ Mi semtirtaa baawɗe ɗe Jawmiraawo hokki min ngam semmbiɗingo on, naa ngam halkugo on, koo to mi maŋgtori ɗum haa ko ɓura.

⁹ Mi yiɗaa mi laato bana mi ɗon hulna on bee bataakeeji am.

¹⁰ Ngam woɗɓe ɗon mbi'a: “Bataakeeji Pol ɗi tedduɗi e caatuɗi. Ammaa to o tawaama bee hoore maako caka amin, o tampuɗo, bolle maako boo ɗe meereeje.”

¹¹ Goɗɗo mo numi non, sey o faama: Bana no bataakeeji amin mba'i saa'i min daayiiɓe, bana non kuuɗe amin boo mba'ata saa'i min ngondata bee mooɗon.

¹² Fakat, min numataa maa fotnugo ko'e amin bee mananɓe ko'e muuɗum'en. Kamɓe ɓe ɗon poondira ko'e maɓɓe bee poondirɗum maɓɓe, ɓe ɗon potnira ko'e maɓɓe bee ko'e maɓɓe boo. Kayto, ɓe faataaɓe!

¹³ Minin kam min ɓurnataa keerol haa min mantoro, ammaa min ɗon tokko keerol ngol Allah waɗani min. O yottini min bee Linjiila Almasiihu haa mooɗon. Kanjum woni keerol juro amin.

¹⁴ Nde min njotti haa mooɗon, min caalaaki keerol ngo'ol. Ngam fakat minin aarti yottaago haa mooɗon bee Linjiila Almasiihu.

¹⁵ Min ɓurnataa keerol haa min mantoro daliila kuugal yimɓe woɗɓe. Min ɗon tammo nuɗɗinki mooɗon ɓesdoto, kuugal amin boo mawnan caka mooɗon.

¹⁶ Nden min mbaawan yahrugo Linjiila nder lesɗe gonɗe gaɗa mooɗon. Ammaa min njurortaako kuugal ngal goɗɗo feere aarti huuwugo nder ngesa muuɗum.

¹⁷ Deftere wi'i: “To goɗɗo yiɗi mantaago, sey o mantoro ko Jawmiraawo waɗi.”

¹⁸ Naa mananɗo hoore muuɗum woni gerdaaɗo, ammaa sey mo Jawmiraawo mani ɗum.