1 Yuhanna 5 - Fulfulde Bible

No en njaalorto duniyaaru

¹ Koo moy nuɗɗini Yeesu woni Almasiihu, o laati ɓiŋngel Allah. Koo moy yiɗi baaba, yiɗi ɓiŋngel boo.

² Bana nii anndirten en ngiɗi ɓikkoy Allah: To en ngiɗi Allah e to en ɗowtanake umrooje maako boo.

³ Ngam yiɗugo Allah, ɗum ɗowtanaago umrooje maako. Ɗowtanaago umrooje maako boo ɓurataa en semmbe,

⁴ ngam ɓiŋngel Allah fuu jaalake duniyaaru. Bee nuɗɗinki meeɗen njaalortooɗen duniyaaru.

⁵ Moy woni jaaliiɗo duniyaaru? Sey nuɗɗinɗo Yeesu woni Ɓiɗɗo Allah.

Seedamku dow Yeesu Almasiihu

⁶ Yeesu Almasiihu wari bee ndiyam baptisma muuɗum e bee ƴiiƴam maayde muuɗum boo. O waraay bee ndiyam tan, ammaa bee ndiyam e ƴiiƴam. Ruuhu bee hoore muuɗum ɗon seeda haala ka'a, ngam Ruuhu woni gooŋga.

⁷ Ngam woodi seedamkuuji tati:

⁸ Seedamku Ruuhu e ngu ndiyam e ngu ƴiiƴam. Seedamkuuji man tati fuu njahdi.

⁹ En ɗon njaɓa seedamku yimɓe, ammaa seedamku Allah ɓuri mawnugo. Ngam kaŋgu laati seedamku ngu Allah seedi dow Ɓiɗɗo muuɗum.

¹⁰ Koo moy nuɗɗini Ɓiɗɗo Allah, woodi seedamku ngu'u nder ɓernde muuɗum. Ammaa mo nuɗɗinaay Allah, o fewni Allah, ngam o nuɗɗinaay seedamku ngu Allah seedi dow Ɓiɗɗo muuɗum.

¹¹ Ndaa seedamku ngu'u: Allah hokki en ngeendam nduumiiɗam, ngeendam ɗa'am ɗon nder Ɓiyiiko.

¹² Koo moy jaɓi Ɓiɗɗo Allah woodi ngeendam, mo jaɓaay Ɓiɗɗo Allah, o walaa ngeendam.

Ngeendam nduumiiɗam

¹³ Onon nuɗɗinɓe innde Ɓiɗɗo Allah, mi winndani on ɗum ngam haa anndon fakat on ngoodi ngeendam nduumiiɗam.

¹⁴ En ɗon bee hoolɗinaare haa yeeso Allah, en anndi o nanan en, to en torake mo koo ɗume fodde muuyo maako.

¹⁵ To nii en anndi o ɗon nana en to en torake mo koo ɗume fuu, en anndi boo en keɓi ko en tori mo.

¹⁶ To goɗɗo yi'i deerɗum ɗon waɗa hakkewol ngol yahrataa mo haa maayde, sey o tora Allah, Allah boo hokkan mo ngeendam. Haala ka'a laarani waɗooɓe hakkewol ngol yahrataa ɓe haa maayde. Ammaa woodi hakkewol jahranŋgol goɗɗo haa maayde. Mi wi'aay on toro Allah ngam maagol.

¹⁷ Kala sooynde adilaaku fuu ɗum hakke, ammaa woodi hakkewol ngol yahrataa goɗɗo haa maayde.

¹⁸ En anndi ɓiŋngel Allah fuu waɗataa hakke, ngam Ɓiɗɗo Allah ɗon ayna mo, Kalluɗo meemataa mo.

¹⁹ En anndi en laati yimɓe Allah, koo nde duniyaaru fuu ɗon les baawɗe Kalluɗo.

²⁰ En anndi boo Ɓiɗɗo Allah wari, hokki en faamu ngam anndugo Allah gooŋgaajo. En ɗon nder kawtal bee Allah gooŋgaajo e bee Ɓiɗɗo mum Yeesu Almasiihu. Kaŋko woni Allah gooŋgaajo e ngeendam nduumiiɗam.

²¹ Ɓikkoy am, ndeente e labbi.