1 Yuhanna 4 - Fulfulde Bible

Fewooɓe wi'anɓe ɓe annabi'en

¹ Yiɗaaɓe am, taa nuɗɗine ruuhuuji koo ɗiye fuu. Sey on poonda ɗi, on paama to ɗi iwi haa Allah. Ngam fewooɓe wi'anɓe ɓe annabi'en ɗuuɗɓe ngari nder duniyaaru.

² Ndaa bana nii anndirton Ruuhu Allah: To goɗɗo seedake Yeesu Almasiihu wari bee ɓanndu neɗɗo fuu, nden kam ruuhu maako iwi haa Allah.

³ Ammaa to o yeddi Yeesu, nden kam ruuhu maako iwaay haa Allah, ɗum ruuhu konneejo Almasiihu. On nani ngu waran, ndaa jonta ngu ɗon nder duniyaaru.

⁴ Ammaa onon ɓikkoy am, on laati yimɓe Allah, on njaalake fewooɓe go, ngam gonɗo nder mooɗon ɓuri gonɗo nder duniyaaru baawɗe.

⁵ Kamɓe, ɓe yimɓe duniyaaru, ngam maajum ɓe ɗon mbolwa haalaaji duniyaaru. Ngam man yimɓe duniyaaru ɗon nana ɓe.

⁶ Ammaa enen en yimɓe Allah. Annduɗo Allah nanan en. Mo laataaki mo Allah, nanantaa en. Bana nii en cenndindirta Ruuhu gooŋga bee ruuhu fewre.

Allah o yiide

⁷ Yiɗaaɓe am, ngiɗindiren, ngam yiide iwi haa Allah. Marɗo yiide o ɓiŋngel Allah, o anndi Allah.

⁸ Mo walaa yiide, anndaa Allah, ngam Allah o yiide.

⁹ Ndaa no yiide Allah waŋgirani en: Allah neli Ɓiɗɗo muuɗum bajjo nder duniyaaru ngam haa en keɓra ngeendam bee maako.

¹⁰ Ndaa ko woni yiide: Naa enen ngiɗi Allah, ammaa kaŋko yiɗi en, o neli en Ɓiɗɗo maako ngam yaafuye hakkeeji meeɗen.

¹¹ Yiɗaaɓe am, nde Allah yiɗi en bana nii, haani ngiɗindiren, enen boo.

¹² Walaa mo meeɗi yi'ugo Allah. To en ngiɗindira, nden kam Allah wondan bee meeɗen, yiide maako laatoto timmunde nder meeɗen.

¹³ Allah hokki en Ruuhu muuɗum, kanjum hollata en ɗon tabiti nder kawtal bee maako, kaŋko boo o ɗon tabiti nder kawtal bee meeɗen.

¹⁴ Minin, min ngi'i, min ɗon ceedo Baabiraawo neli Ɓiɗɗo muuɗum haa duniyaaru, o laati kisnoowo maaru.

¹⁵ Mo seedi Yeesu woni Ɓiɗɗo Allah fuu, Allah ɗon tabiti nder kawtal bee maako, kaŋko boo o ɗon tabiti nder kawtal bee Allah.

¹⁶ Enen kam en anndi yiide Allah ngam meeɗen, en nuɗɗini ɗum. Allah o yiide. Tabitɗo nder yiide ɗon tabiti nder kawtal bee Allah, Allah boo ɗon tabiti nder kawtal bee maako.

¹⁷ To en ɗon bee yiide timmunde, en keɓan hoolɗinaare nyalaade kiita, bana no o wa'i, non ngoneten nder duniyaaru boo.

¹⁸ Marɗo yiide hulataa, ngam yiide timmunde ittan kulol. Ngam kulol ɗon hawti bee yaŋgada. Kulanɗo wonaay nder yiide timmunde.

¹⁹ Enen en ɗon ngiɗindira, ngam Allah aarti yiɗugo en.

²⁰ To goɗɗo wi'i: Mi yiɗi Allah, ammaa ɗon wanya deerɗum, o pewoowo. Ngam to o yiɗaa deerɗiiko mo o yi'ata, noy o waawrata yiɗugo Allah mo o yi'aay?

²¹ Ndaa umroore nde Almasiihu umri en: Mo yiɗi Allah, sey o yiɗa deerɗiiko boo.